ZALEN August 29, 2023 : Vawiin khan Home Minister, Taxation Minister Lalchamliana chuan Aizawl Press Club-ah chanchinthar buaipuitute a kawm a, Non tax revenue ang chi, Tui bill leh Electric bill te tihsan tha a tih thu leh sawrkar chu 'No loss no gain' -a kal ngai a tih tawh thu a sawi.

Taxation Minister chuan, "Sawrkarin kan In-a tui leh electric min pek nan sum tam tak an seng a, man tlawm zawkin kan lei leh a, sawrkarin sum tam tak a chawi phah a ni. Chutiang chiahin ration tur buhfai pawh man tovin a lei a, mipuiin tlawm zawka kan lei leh a, sawrkarin sum tam tak a khawral leh ringawt mai a ni. Chuvangin mipui hian sawrkar kan puih let a ngai tawh," a ti.

Lalchamliana chuan, "Hei hi politics a lak chi pawh a ni lo, mirethei te hmangaih loh vang tia inchirhtheh chi pawh a ni tawh lo, party anga in beihna chi pawh a ni tawh lo," a ti bawk.

State danga a thlawna thil sem intiam ang chi, buhfai a thlawna sem te, electric leh tui a thlawna pek chin an neih chungchangah Taxation Minister chuan state a inhauhsak hleih em avang leh resource kan in neih that hleih avangin intehkhin chi a nih loh thu a sawi bawk.