American singer Taylor Swift hi chu a ropui ngawt mai - tour a neih tawh chuan rimawi khawvel a sawi nghing a ni ber zel mai. A tour hian media hrang hrang a luah khat nghal a, a kalna ramte theihtawpin an lo inbuatsaih thin bawk - ram thenkhatah phei chuan an ram dante pawh an siam that phah hial thin! 

Kum 34 mi Taylor Swift hian Ningani atang khan France khawpui Paris-ah Eras tour a nei tan leh ta a, Europe ram hrang hrang a fang kual leh dawn a ni. A bultan nan Paris a pan a, khawpui hrang hrangah show a nei dawn a ni. Swift hian tour a neih chhunga ticket a hralhna atang ringawt pawhin US dollar tluklehdingawn khat ($tld 1) chuang a lakluh rin a ni - kan inang lo thin mang e! 

Taylor Swift hian tun hnai khan album thar 'The Tortured Poets Department' a tichhuak thar a, hei hian boruak a siam lian leh zual a tih theih awm e. A album thara hlate hi a sa nghal a, Fortnight leh Down Bad te pawh fan ten an sakpui dual dual a ni. 

American Pop star hian kum 18 chhung zet chu rimawi khawvel a chenchilh ve ta a, hetih chhung hian hla lar tak tak sawi tham fe a nei. A tour zan khatnaah pawh hian darkar thum chhung vel hun a hmang a, hla 45 zet a sa leh hem mai. France-a show a neih zawh hian May 17-ah Sweden-ah concert a nei leh ang a, Portugal, Spain, UK, Netherlands, Switzerland, Italy, Germany, Poland leh Austria a pan leh bawk ang. Europe tour hi UK-ah let lehin a kharna a nei dawn a, stadium hmingthang mi 90,000 lenna Wembley Stadium-ah pawh tum eng emaw zat concert a nei dawn a ni. 

UK atang hian North America lam a pan leh dawn a, kumin bika a hmawr bawkna chu December 8-ah Canada-ah a nei dawn a ni.