Taylor Swift chuan kum nga chhung zet tour a neih tawh loh hnuah, nakkum atangin tour a neih leh tur thu a puang chiang ta. Rimawi khawvela boruak nei lian em em mai Taylor Swift-a'n a fans te kianga hun tam zawk a hmang leh thei tur hi chanchin lawmawm tak a ni. 

American singer tour neih tur hi 'Eras Tour' tih a ni a, March 2023 atangin a tan ang a, August 2023 thleng a awh dawn a ni. Hemi hun chhung hian hmun hrang hrangah concert a nei dawn a, hmun 27-ah show a nei dawn a ni. Tun tumah erawh US a pel dawn lo a, an ram khawpui hmun hrang hrang a fangkual dawn a ni. Khawpui 20-ah show hi a kalpui dawn a, chung zingah chuan - Los Angeles, Atlanta, Philadelphia, Chicago leh Arlington pawh an tel. 

Record thar nen
Kum 32 mi Taylor Swift hian tun hnai khan record ropui tak mai a siam thar a, artist piang tawh zinga Billboard Hot 100 chart-a top 10 kai vek thei album 10 nei tling hmasa ber a ni. Artist zingah he tiang tithei hi an la awm ngai lo a, a boruak len laiin tour a nei zui tur hi a lawmpuiawm hle. 

Taylor Swift hian October 21, 2022 khan album thar 'Midnights' a tichhuak a, hei hi a studio album 10-na a ni. A album tihchhuahte khan Billboard Hot 100-ah top 10 an kai vek a, a album thar 'Midnights' pawh rin ang ngeiin top 10-ah a rawn inhlangkai. Billboard Hot 100 song chart hi kum 64 chhung kalpui a ni tawh a, Taylor Swift record ang hi nei an la awm ngai lo. 
Chumai a la ni lo - Taylor Swift hian Hot 100 top 10 a luah khat vek a, pakhatna atanga 10 thleng chu a hming a intlar thla vek a ni! Eng chart pawh nise sawinep theih a ni lo hrim hrim. 

A album atang hian Hot 100-a No.1 hauh phak hla pakua a nei tawh bawk a, chung zingah chuan 'Midnights' album a mi 'Anti-Hero' pawh a tel. A hla zinga No. 1 hauh phak te chu - We Are Never Ever Getting Back Together, Shake It Off, Blank Space, Bad Blood, Look What You Made Me Do, Cardigan, Willow, All Too Well leh Anti-Hero te an ni. Heng zingah hian 'Blank Space' phei chuan kar sarih chhung zet No.1 a luah a, Shake It Off pawh khan kum 2014 khan kar li chhung a zawnin No.1 a lo hauh tawh bawk a ni.