‘Fearless’ (Taylor’s Version) album a tlangzarh tawh a, tunah chuan ‘Red’ (Taylor's Version) lam a hawi leh ta - November-ah tlangzarh a dawn. American singer Taylor Swift hian ‘Red’ (Taylor’s Version) chu November 19, 2021-ah a tlangzarh tur thu Zirtawpni khan a puang. 

Swift hi a album hmasa lam a producer-in a hralh sak avangin a buai hle a, a album lo tih chhuah tawh thenkhat chu  recording ti tha lehin a tlangzarh leh mek a ni. Thla hnih liam ta khan ‘Fearless’ (Taylor’s Version) chu a tlangzarh a, he album-ah hian a hla hit em em ‘Love Story’ pawh a tel a, hla dang thahnem tak nen a tichhuak tha leh a ni.  

‘Red’ chu...
October 22, 2012 khan a studio album palina ni turin ‘Red’ hi Big Machine Records kaltlangin a tlangzarh a, a hun lai chuan a lar vet vet hle a nih kha. He album-ah hian hla 16 zet a awm a, chung zingah chuan - I Knew You Were Trouble, We Are Never Ever Getting Back Together leh Everything Has Changed te pawh a tel a ni. 

Tun tuma a tichhuah leh tur ‘Red’ (Taylor’s Version) ah hi chuan hla 30 zet a awm dawn tih Taylor Swift hian a sawi chiang tawh a ni. ‘Fearless’ a tichhuah lehah khan a hmaa a release tel loh hla paruk zet a telh thar a, ‘Red’-ah pawh hian chutiang chu kan hmu dawn a nih hmel hle.

Kum 31 mi Taylor Swift hian kum 2019 khan a album lo tichhuah tawh thenkhat chu recording a tih that leh tur thu leh, version tharin album a tichhuak leh dawn tih a lo sawi tawh a ni. Hei hi a chhan ber chu American music producer Scooter Braun-a’n a hla master a hralh sak vang a ni a, amah pawh a thinrim hle a, hun rei tak an inkhing nghe nghe a nih kha.