Ram hrang hrangah Telegram hman khap a ni tawh a, India-ah pawh khap tumna a awm mek. Sawrkar laipui chuan Telegram hi a zirchiang mek a, khap a nih dawn leh dawn loh a la chiang lo. 

India rama khap tum a nih chhan hi pawisa inthapna leh a kaihhawih vang nia tarlan a ni a, chhui zui mek zel a ni. Ministry of Home Affairs (MHA) leh Ministry of Electronics and Information Technology (MeitY) te hmalaknain Indian Cybercrime Coordination Center (I4C) te chuan a chhui hna hi an thawk mek a, an report a zirin khap leh khap loh hi thutlukna an siam dawn a ni. 

He messaging application hi tun hnaiah sawiselna a nasa hle a, ram takin hman an khap mek bawk. Telegram hotu Pavel Durov chu August 24 khan Paris-ah man a ni nghe nghe a, hei hian nghawng a nei chho mek a ni. Russian pa Pavel Durov hi bail-a chhuah ni tawh mah se France chhuahsan phal sak a ni lo a, kar khatah vawi hnih police hmaa inlan ziah tura tih a ni. 

Pavel Durov man a nih chungchangah hian khawvela hausa ber leh X neitu ni bawk Elon Musk pawh a tawng chhuak a, Edward Snowden leh milar eng emaw zat an tawng chhuak bawk. 

Telegram hian India Information Technology (IT) Rules a bawhchhia em tih pawh zir chian ve mek a ni. He dan hnuiah hian application neitute chuan nodal officer leh chief compliance officer an nei tur a ni a, monthly compliance report an tichhuak ziah tur a ni bawk. Heng zawng zawng hi zirchian a ni ang a, khap a nih dawn leh dawn loh a chiang dawn a ni. 

Telegram hi Mizoramah pawh hmang an pung ve zel a, Mizo film leakout inthawn kual nan an hmang nasa hle nia hriat a ni.