Aizawl: Health Minister Dr. R.Lalthangliana chuan, "Mizoramah Covid-19 test an tam avangin positive hmuhchhuah pawh an tam lo thei lo a ni," a ti.

Tunhnaia Press mite nen an inkawmna ah Covid-19 chungchangah state dang ngaihtuahin Mizoram chuan a ti tha hle tih sawiin Health Minister chuan, "State dangte ngaihtuahin Mizoramah test te, contact tracing te kan ti ngawrh a, chuvangin positive rate hi a sang lo thei lo a ni," a ti. State dangah chuan Covid test duh lo an tam nia sawiin Dr. Thangtea chuan, "State thenkhatah chuan an in test tha duh tawh lo a. Mizoramah erawh chuan task force te nen tang hovin contact tracing te chhui a ni a, primary mai bakah secondary contact thlengin kan test a. Kan test tam avang hian kan positive rate pawh a sang lo thei lo a ni," tiin, "State thenkhatah chuan Covid vei te hi an dam tawh nia an hriat chuan an chhuah tawp tawp a, keini erawh chu an result a that hma chuan kan chhuah lo a, hei vang hian dama chhuak pawh an tlem phah a ni," a ti bawk. 

Tunhnaia mitthi an tam chhan chu damlo an tam vang nia sawiin Dr. Thangtea chuan, "ZMC a ICU hi a full deuh reng a, tuna natna hrik hi a che rang em em mai a. Thawktu te indaih a ngai a, chuvangin nikum lama damlo pakhat kan enkawl lai leh tun hi chu tehkhin theih a ni lo a ni," a ti a. ZMC thawktute chu an hah hle niin an sawi bawk. Health Minister chuan Covid thawh thumna (third wave) in naupang a tum bik dawn nia mithiam ten an sawi avangin ZMC ah nausen ward tur an buatsaih mek thu leh an peih tep thu a sawi bawk.