Mizoram Sports Minister Lalnghinglova (Tetea) Hmar chuan Thawhlehni chawhnu khan Asia khawmualpuia football tournament upa ber, Durand Cup Kokrajhar Chapter a hawng.

Indian football calendar khuhhawnna, Durant Cup hi kum 1888-a khelh tan niin kumin hi a vawi 133-na a ni a, Asia khawmualpuia football tournament upa ber a ni a. Khawvel huapah pawh English FA Cup leh Scottish FA Cup te nen football tournament upa pathum zingah a tel pha. 

Durand Cup 2024-ah hian Indian Super League, I-League, Indian Services, Central Armed Police Force bakah ram pawn lam team sawm bikte nen team 24 an inel dawn a. Kolkata, Shillong, Jamshedpur leh Kokrajhar-ah te khelh tura a ni a, Tetea hian Kokrajhar-a khelh tur bik hi a hawng a ni.

Kokrajhar-ah hian Group E inkhelte bakah quarter final inkhel pakhat khelh a ni dawn a. Group E-ah hian ISL club pahnih – Odisha FC leh NorthEast United FC bakah BSF Football Team leh Bodoland FC ten quarter final luh an inchuh dawn ang. 

Final hi August 31-ah mi 68,000 lenna, Vivekananda Yuba Bharati Krirangan, Kolkata ah khelh a ni thung dawn a ni.

SAI Stadium, Kokrajhar, Assam-ah Kokrajhar Chapter a hawnnaah hian sports minister chuan politician ang ni lovin, infiamna ngainatu leh football fan anga Kokrajhar mipuite hmaah a din thu a sawi a. “Hun eng emaw chen ram buai ni thinah, boruak ralmuang tak hnuaia Indian Army buatsaih tournament kan khel tur hian infiamna thiltihtheihzia a tilang a ni,” a ti.

NorthEast Football Development Council president ni bawk, Tetea chuan state lian lo leh mihring pawh tlemna, Mizoram atangin ISL leh I-League-ah player thahnem tak an awm reng a, Fifa World Cup qualifier khelh zawh takah pawh India squad-a player 22 zinga pali chu Mizo an nih thu a tar lang a. Bodoland-ah pawh Indian football level sang ber thleng thei tur talent tha tak tak an awm tih sawiin, Bodoland leh Assam football hmasawn nan Mizoramin tih theih a neih chuan a inhawng reng tih a sawi.

Durant Cup hawnnaah hian Pramod Boro, Chief Executive Member, Bodoland Territorial Region pawhin thu a sawi ve bawk.