Mipui nghawngtu lian thil 2 siam that tul a awm mek a; chawhmeh leh bazaara thlai zawrh te chu tehfung inang hmanga hrut rual an ni a, a buaipuitu Department pawh an hah hle a ni. A dang lehah chuan 'tha' (labour) man a to chak em em ; hlawhfa chhawr man pawhin san lam a pan zel a, thiam mumal nei lo (unskilled) te chu an duh zah zah an inchhiar a, thiam thil nei te pawh a thla bia chhutin lehkha thiam sawrkar leh mimal hnuaia thawk thenkhat aiin an hlawh a tam zawk a; a letling zawngin kan kal niin a lang fo thin. 'Hnamdang' puakphur thlengin mipui zahna a awm tawh lo a, an duh ang an inchhiara kan ram chhung vekah chu chu a thleng mek a, mipuiin an zo lo tan ta mai em ni? tih tur a ni ta. Labour an tangruala an duh angin an inchhiar a, mipuiin duhthlan tur an nei loa hreh tak chungin an chhawr lo thei lo a ni. Hemi lo chhuahna chu eng dang nilovin kut hnathawh kan ngaihsan lem loh vang a ni pakhat a. Sawrkar hna a tam vanglaia hna hmu te khan kuthnathawh chu thil zahthlakah an ngai a, an fate rilruah an tuh hneh viau a, 'lehkha i thiam san loh chuan lo i thlo tawrh tawrh ang' tih chu insawithaihna atthlak ni mahse a nghawng tur hrethiam an tam lo. Tunah chuan kuthnathawha mahni inchawmai chuan a thlawna dawn duh an tam tawh a; thawk loa ei dan an zawng zel a ni. Hnathawk (labour) te chu a chhawrtute'n an nek chep lohna turin sawrkarin 'rate' a siam sak thin a, thiamthil an neih ang zelin an hlawh pawh a tamin a tlem bawk a ni. Hetiang harsatna ang hi state dang ah chuan buaipui tham a tling a, mi hausa leh rethei inkar a zau a, a retheite chu rah beh an ni thin a, chhawr hniam theihna ber (minimum wages) sawrkarin a siam phah ta hial a. Chumi zulzui chuan Mizoram pawhin a bithliah a ni. Mahse tun dinhmun han thlir hi chuan an mi chhawrte aiin a chhawrtute chan a chhe zawkin a hriat a, uchuak tak taka inchhiar te pawh a tam zawk an ni. Chhawr theihna sang ber 'rate' (maximum wages) mipui dikna chanvo hum turin siam a ngai ta hialin a hriat rum rum thin e. Hlawhfa thiam thil inang rau rau pawh an inchhiar dan a inang lo nuai ta mai a, chu a chhap ah chhun leh tlaia an ei leh in a chhawrtute'n an tum a ngai a, an pangchang tual tuala, an duh ang ei leh in pek an nih loh chuan hna chawlh an pawi ti tawh lo a, a chhawrtute'n an in-tlawn siak chu a ni ber e. Hetiang tho hian mi ina a tul apiang thawk turin 'awmpui' ram pawn atangin lak an ni thin a. Anni pawhin an duh zat an inchhiar a, an tel loa awm thei lo mi tam tak an awm a, an mamawh luat ah hrawk chawma awm chilhtu tur an zawng chung chunga, midang mit mei an veng lem lo a. A ngam huai te chuan midang tan phurrit an siam mek a, mipui an tangrual thei si lo a, kan in dang zo meuh lo chu a ni hi maw ! Heng hi a hluar zawngin a kal zel dawnin a lang hrih bawk. Nuai 11 awrh chauh awmna; chumi zatve dawn chu Aizawl khawpuiah an awm a, hetiang thilah pawh an tangrual thei lo a nih chuan in enlet fe a tul a ni. Eng ram pawh nise, mahni chenna ram theuhah khua leh tui nihna angin mawhphurhna a awm a; hnawksak lo a awm ngawt hi duh tawk tur a ni lo. khawtlang tana mi tangkai ni turin mi dang an pui tur a ni a. Hemi inkhai diat hi a chah chuan khawtlang angin harsatna a pianga, ram tana hnawksak a tling thei a, tuna kan dinhmun pawh chu chu a ni. Hmanhmawh/ sum ngah vanga inseng ngam tam tak te pawh hian midang mit mei veng thei sela, mi tam zawk ke pen ruala pen zir sela a tha khawp ang. A na zawngah chuan a theih kher lo a nih pawhin engnge maw chin chu ven theih a ni. Mizoram hi hlawhfa hlawk pekah Hmarchhak state chu sawi loh ram pum huapah a sang pawl a ni mek a ni. Labour Law a tha tawk lo a, tlawmngai pawlte'n an thahnem ngaihnaa 'rate' an tuk kan ring mai mai a, chu pawh chu kenkawh har kan ti tlang hle ! Dan leh hrai siamtu tur Sawrkar a kelleh awl daih hi a fuh lo a, mipui tanrualoh chu thuran nise a mawh la tu tur chu Sawrkar a ni tho tho. Thla leh anhnah zawrh dan tur tehfung siam a nih ang hian 'tha man' (labour cost) awmze neia thunun tu tur dan a awm a hun ta khawp mai. State hausa te aia 'tha man' a bin thak thaka a sang hi a inhmeh lo hle a, mipui chanvo inchhuhnaah a ngaih theih a ni. State a pachhiat ang hua 'tha man' a to lutuk hi chuan ngaih pawimawh hlawh sela a tha khawp ang.