ZALEN June 4, 2025 : MZP General Headquarters hruaitute chuan June 3, 2025 khan Home Minister K. Sapdanga'n leng tura a sawm angin, a pisaah an leng a. Phuldungsei khua Thaidawr tlang pan chhohna kawng sir a Tripura Sawrkarin Guest House an rawn sak chungchang leh Tripura sawrkar hmalak dan an sawiho. 

MZP chuan, Home Minister hnenah Phuldungsei khaw bula Thaidawr tlang pan chhohna turah Tripura sawrkar-in Guest House cheng nuai 300 man an sak mek thu leh, Tripura state rifle-te an duty reng thu an an hrilh a. Mizoram state police-te pawh duty nghal se an duh tih an hrilh a. 

Mizoram chhunga Tripura sawrkar-in buiding an sak mek, MZP-in a ngaimawh em avanga a hmuna an lo tlawh tawh thu sawi nawn lehin, tun hnaiah mi tu tih hriat loh ten an beih hnuah pawh sak chhunzawm an tum leh chu theihtawp a dodal turin Home Minister hi an ngen a ni. 

Home Minister chuan MZP ten ram leh hnam veia a mah an finchhuah thin leh theih ang anga hma an la thin chu lawmthu a lo hrilh a. MZP duhdan angin, Kawnpui M atangin Thaidawr tlang pan chhohnaah Mizoram IR te dah phei a ni ang a ti a. Hmalak mek a nih thu MZP hruaitute a lo hrilh.

Mizoram Home Minister K. Sapdanga chuan, Tripura Tourism Minister nen an inbiak thu sawiin, Guest House sak chu chhunzawm tawh lo tura hrilh thu a sawi a. Official Level-ah sawiho tura an ruahman thu a sawi. 

Home Minister chuan, Tripura State Rifle ten Thaidawr tlang pan chhohna turah Check Gate an lo siam ve pawh thiat nghal tura an hrilh thu a sawi a. MZP-in Phuldungsei khawtlang hruaitute hnen atanga thu a dawn danin, Check Gate chu thiah nghal a ni. 

MZP chuan, Home Minister hmalakna avangin lawmthu an hrilh a, Jampui tlangdunga Mizo mipuite leh Mizoram khua leh tuite venghim tura theihtawp chhuah zel turin an ngen nghal a. Ramri kal pawhna kawngpuite chu tun aia ngaihsak lehzual turin an ngen bawk. 

MZP chuan ram leh hnam tana sawrkar hmalaknate chu theih ang anga a thlawp zel tur thu an hrilh a ni.