Er. Chhungpuia Renthlei

Kan zirna line ah Graduate / Master kan nih avang ngawta sorkar hna tha tak thawk tur kan ni vek lo a, Graduate / Master kan nih ve theih loh vanga hnathawh tur hmulo vek tur pawh kan ni chuang lo.Lehkhathiam sang ringawt hian hna an thiam kher lova, kut them thiam tak hian hisap an nei tha bik kher lo a, tharum ngah nazawng an thawk sawt kher lo bawk. 

Kum tin mai zirlai  ti tha deuh ten Science leh Commerce an la a, a bak zawng Arts stream-a kan inbeng khawm nguk thin  hi bansan a hun tawh ta.Tum mumal neilova BA, MA zir chhuak kan pun zel avangin ei zawnna tlak hna mumal thawh a har hle tawh mai.  Heivang hian kan thiamna in a phak tawka hna kan hmuh theih nan  skill development courses  leh entrepreneur development lamah  kan ngaihtuahna kan sen a tha hle mai.

Mistiri leh helper ringawt pawh nitin za tel teh meuh kan ram chhungah hnathawkin an awm mek a.Hna avang kan tih kan tih laia hnamdang ten thawh sen loh an hmuh si te hian  thalaite tana sum thawh chhuahna awlsam zawk , technician education lam hawia  kan inherrem thiam a tul zia a tilang chiang hle mai. COVID 19 hripui leng karah pawh thawhsen loh hna an hmu a.  Lockdown vanga vai ho an haw chuan hlhawfa chhawr tur an vang pharh anih kha. 

Thalai hnathawh tur nei lo tamna hmun a piangah sualna a pung a, Gospel camping leh JAC hmanga tihrem chi a nilo. Kan thalaite nun siamthatna hmanraw pawimawh ber chu an hnathawk tlaka an thiamna tihpuna, an phak tawk ang zela eizawnna tlak hnathawh tur siam sak hi a ni. Kum khat chhung ringawta vai hnathawk ten kan ram sum an lak hi maktaduai tel teh meuh a tling a ni.  Aizawlah ringawt pawh veng tinah  mimal, sorkar leh kohhran  building sa mek leh sa thar  kan tam hle. Vai ho thawh tura kan dah zel chuan sum tam vairamah a luangral zel ang.  Mizo thalai ten training na mumal tak kan neih chuan eizawnna kawng thar a inhawng zel ang.  

Thalai tam zawk ten Infiamna, music leh  social network kan tuipui hle. Mahse, heng  kan thil tuipuite hi kan mamawh ber an ni lem lo. Uluk taka  ngaihtuah chuan  Infiamna hmun hma tha kan sorkarin a buatsaih te hi tuipui viau mahila mizo thalai tam zawk  hmasawn tirtu a ni ber lo tlat. Smart phone leh internet  hmanraw changkang tak takte hi kan hmang tangkai thiam ten  an hmasawn pui laiin a thiamlo te erawh chuan kan chhiatpui mek anih hi. Kan  mamawh ber zawk chu eizawnna  anih tlat vangin  ngaih pawimawh tur kan thliar thiam tul khawp mai.

Zirlai ten lehkha kan zir chhan ber chu ei zawnna tlak sum lalut thei tura sorkar, leh company a thawh emaw, private a sumdawn a ni.Ram hausa kan nih loh avangin sorkar hna nghet thawh hi kan duh vek a, kan tum ber pawh a ni. Tun hnaia Class 12  pass leh  matric pass te hian tum mumal tak nei a uluk taka subject kan thlan a tul hle mai. 

Hnam fing apiangin an fate career an buaipui nasat zia te hi nu leh pa ten entawn ila. Mahni chhungkua leh fanau ngaihsak hi Pathianin rawngbawlna  pawimawh tak a ni tih hria in, uluk taka kan fate career kan ngaihtuah  sak a hun ta e.