Aizawl: Sialkal Range Development Council (SRDC) Chairman leh Lengteng bialtu MLA ni bawk L.Thangmawia chuan Saitual District Hospital, Mimbung PHC leh Lengteng bial chhung VLTF thenkhat te hnenah covid-19 dona hmanraw chi hrang hrang thawnchhuah te a vailiam.

Covid-19 dona hmanrua thawn turte a vailiamna ah hian thu sawiin L.Thangmawia chuan, "Mahni inlum pawh chhuahsan thei lova Mimbung khaw mipuite an awmlaia sum leh pai, buhfai, chawhmeh leh an mamawh dangte Lengteng bial khaw hrang hrangin an pe thin hi a ropuiin Zonun zemawi a parvul a ni," a ti a. Hripui do kawnga rim taka thawktute chungah lawmthu sawiin Mizoram sawr-kar-in SRDC chu a area chhung mipuite mamawh engemaw chen phuhruk thei tura a thuamchak avangin lawmthu a sawi bawk a. Hun harsa tak SRDC Headquarters awmna Mimbung khuain a tawn mek hi pawi a tih thu leh sawrkar, VLTF leh mipuite tanrualna avangin hun rei loteah he hun khirhtak hi Mimbung khawtlang hian an paltlang ngei dawn a ni tiin mipuite chu sawrkar thupekte zawm a, fimkhur chhunzawm zel turin a chah bawk.

Mimbung khuaah hian May ni 27, 2021 khan hrivei pakhat hmuhchhuah a ni a. Contact tracing a tul ang a tihnghal niin hriattheih chinah hrivei 27 hmuhchhuah tawh a ni a. Hrikai hmuhchhuah zinga mi 4 hi ZMC, Falkawn-a dahluh tawh niin Saitual CCC-ah mi 9, Mimbung 4C-ah mi 5 awm mekin Manipur-a enkawl chhunzawm turin mi 1 transfer a ni bawk a. Mi 8-te discharged an ni tawh bawk. May ni 28, 2021-ah Saitual DC-in Mimbung hi Restricted area-ah puangin hrikai hi hmuh belh zel a nih avangin June ni 8, 2021 khan a khaw pumin containment zone-ah a puang leh a ni. SRDC chuan Mimbungah hrikai hmuhchhuah anih avangin May ni 29, 2021 khan Mimbung damdawiin (PHC) mamawh chi hrang hrang thahnem tak a thawnchho nghal a. June ni 7, 2021 khan Mimbung khawtlang mamawh buhfai leh thil chi hrang hrang Mimbung VLTF hnenah a thawnchho tawh bawk.