Aizawl: Lengteng bialtu MLA L.Thangmawia chuan driver-ten him taka Covid veite an phurh theihna tur motor 'Emergency Health Services' chu nimin khan Ngopa CHC tan a hlan.

Ngopa CHC motor hlanna hun tawite hi MLA chenna Mission Vengthlang ah neih a ni a, thu sawiin L.Thangmawia chuan, “Covid 2nd Wave leng mek chuan vanduaithlak takin Lengteng bialchhung a rawn lut a, tunah hian Kawlkulh leh Mimbung-ah te chuan containment zone-a puan hial ngai laite kan nei ve ta hial a, a chhe ber dawnin khaw dangahte he hri vei lo awmpalh ta ila, kan Medical team ten an mamawh hmasak berte zinga mi chu motor a ni a. Lengteng biala kan CHC neihchhun Ngopa CHC hian, covid 2nd wave mai bakah 3rd wave lo thleng thut thei atana inbuatsaih lawk nan motor fit tak pakhat tal a kawl a ngai a ni,” a ti.

L.Thangmawia chuan khawvel leh Mizoramin hripui kan do mek laia politics-a hamthatna zawn nana ngaih theiha thiltih awm leh thin chu pawi a tih thu sawiin, "Mizo mipuite he hripui kan do hneh hma chuan lungrual taka ke kan pen a ngai tak zet a. Kei pawhin Health Minister hnenah Ngopa CHC-a Truenat khawl bun theih a nih dawn chuan MLA Fund hmanga Truenat khawl ka lei theih thu ka thlen a. Minister zahawm tak hian mithiamte min zawhfiahsak nghalin a khawl lo leisak pawh ni ta ila, a behbawmah Truenat Lab tur cheibawl that mai bakah hmanraw hrang hrang cheng nuai 40 chuang man lai lei belh a ngaih thu leh Technician a mamawh dante min zawhfiahsak hnuah, henga thil tul dangte ka tihsak vek theih dawn rih loh avangin khawl hi ka lei ta lo a ni.”

“Chuvangin Truenat a ni emaw, RT-PCR khawl a ni emaw, sawrkar hmalak mekna tichak tura lei a nih loh chuan a khawl ringawt ni lovin, a khawlin a kentel zawng zawng tihsak nghal zel ni thei se, chutiang a nih loh chuan sawrkarin a phak tawka theihtawp a chhuahna piah lamah sawrkar lu tihaitu a ni thei zawk a ni, a khawl ringawt lei hi chu Motor inleisak dawna a Engine ringawt inleisak hmasak ang chauh a ni,” a ti bawk.