Aizawl: Human Resource Development Board Vice Chairman L. Thangmawia chuan nimin khan Naga Students’ Union Mizoram (NSUM) ten Art & Cultural Auditorium, Beraw tlanga '24th Freshers Meet cum Cultural Day' an neih chu a hmanpui.

Khuallian L. Thangmawia chuan Mizorama Naga zirlaite chu duhsakna hlanin zirna chhunzawm nana Mizoram an rawn pan avangin lawmthu a hrilh a, harsatna an tawh apiangah Mizoram sawrkar chu anmahni tanpui turin a inhawng reng a ni a ti. 

Hlawhtlinna duhawm tak nena Mizoram atanga an rama an kir leh ngei theih nan duhsakna hlanin, Thangmawia chuan, "Mahni nihna leh hnama chiangte reng reng chu lehkha an thiam san poh leh mipui vantlang tan an tangkai a, ram leh hnam tana thawk an ni tih an hriat avangin eirukna leh hlemhletnaah an fihlim a, tlawmngaihna nen mipuite tan an mawhphurhna neihsa piah lamah an thawk fo thin a nii. Lehkhathiam, mahni identity hre lo te chu an thiamna a san zawh poh leh ram tana an hnawksakna a tam ting mai a ni," a ti.