Aizawl: Ministry of Micro, Small and Medium Enterprises (MSME) buatsaihin nimin khan Dawrpui Multipurpose Centre-ah Mega National SC-ST Hub Conclave neih a ni a. He conclave hi Commerce & Industries Minister Dr R. Lalthangliana chuan khuallian niin a hawng.

Dr R. Lalthangliana chuan Mizoram hmun tam zawk chu tlangram vek a nih thu sawiin Industry lian tak tak din a rem lova, MSME chhinchhiah danin Mizorama Industry ding zinga 97.36% chu Industry tenau (Micro Enterprises) an ni a, chung zinga a tam ber chu cheng nuai 10 tling lo senga bul tan an ni a, an zinga a chanve (50%) vel phei chuan loan la lovin anmahni sum khawl atangin bul an tan a ni, a ti a. Bul tan tura loan lak kawngah leh thil hrang hrangah kaihhruai kan la ngai hle tih sawiin Ministry lam atangin theihtawp chhuahpui tur leh an inkaihhruaina hman laite pawh Mizoram leh India hmarchhak state te tan tlema thlahdul hlek a tul a a hriat thu sawiin, Bank ho pawh loan pekchhuah kawngah in hawng zauva, loan dilte pawh rang taka tihchhuah kawngah tan la thar leh tura a duh thu a sawi a ni. 

National SC-ST Hub hi kum 2016 khan Prime Minister Narendra Modi chuan a hawng a, a programme in a tum ber chu India rama Scheduled Caste leh Scheduled Tribe zinga mahni kutkawiha eizawnna ngelnghet nei duhte bul tanna tur atana kawng sial sak leh tanpui a ni a, hetiang lama tui leh ngaihven duh tan MSME website https://msme.gov.in/ ah lutin a zirchian theih reng a ni.

Conclave ah hian Technical session pahnih awmin a hmasa zawkah Central Public Sector Enterprises leh Bank aiawh mithiam ten zirtirna pe in inkawmhona hun tha tak  neih a ni a, a hnuhnung zawkah Government e Marketplace (GeM) leh Rural Self Employment chungchang mithiamten zirtirna an pe bawk a ni.