ZALEN November 5, 2023: Congress Working Committee member leh MP ni mek, Shashi Tharoor chuan Mizoram MLA inthlanpui lo awm turah mipuite chu Congress party vote vek turin a sawm.

Nimin Aijal Club-a chanchinbu mite a kawmnaah he thu hi sawiin Tharoor chuan Mizoram thalai zingah 23.5%-te chu hna hmu lo an ni a, hei bakah Mizoram chu cancer vei tamna a ni bawk a. Thalai hna nei lote bultanna siamsak tur hian Congress hi a sawrkar a ngai niin a sawi.

BJP chungchang sawiin India rama hnam hrang hrang leh sakhaw hrang hrangte inlungrual taka an lenho thinna chu a derthawng niin a sawi a. “Mizoramin inhumhimna a neih, Article 371G pawh hi a awm reng ang em a chiang lo hle a ni,” a ti.

ZPM leh BJP chungchang sawiin BJP chuan MNF hawisanin ZPM lam an hawi mek niin a sawi a, BJP chuan ZPM chu Mizorama luhna hmanruaah hman a tum niin a sawi bawk.

Tharoor chuan kumin Mizoram inthlanah Congress-in thuneihna a chan leh ngei a beisei tih sawiin hmarchhak state-a Congress thuneihna hmasa ber nihtir leh an tum tih a sawi a. Kum 2018 inthlanah Congress-in seat an hmuh tlem chhan chu ZPM an lo lan tawh vang a ni tiin seat tam tak hloh mah se vote an hmuh zat belhkhawm chu 2013 nen danglamna a tam lo niin a sawi bawk.