Anmahni tantuten beng lo chhu ngawng ta sela, tun hnaia Manchester City, Chelsea, Liverpool bakah Tottenham Hotspurs thleng pawhin, heti taka Premier League nomawi cho phaka an len hma, kum zabi liam ta tawp lam leh sangbi thar kai tirh kum eng emaw zat chhunga Manchester United leh Arsenal inbeihna nasat thinzia kha mi tam takin an la mitthla phak ngei ang. A bik takin an manager-te pahnih inelna leh tawngkaa ‘game’ an khelh dan zawng zawngte kha ngaihnawm a tling.

Tun lai angin ‘Big Four’ tih te, ‘Big Six’ tih tawngkamte hman lar a la ni lo va; mahse, khatih lai na na na kha chuan club pahnihte hi ‘Big Two’ tia sawi an phu ve viau a ni.

Football khawvela Sir Alex Ferguson leh Arsene Wenger-a te inelna (rivalry) aia pui kha a tam bik lo mai thei a, an chawlh hnuah pawh an infak tawn nasa dun hle a, an inelna lian tak kha manager ropuia siamtu niin an sawi ve ve thin.

March 29, 2023 khan Premier League Hall of Fame-ah lak luh dun an ni a, hemi tum pawh hian an infak tawn nasa hle a, zanriah pawh an kil dun thu an sawi.

Sir Alex-a chuan, “Ropui taka Arsenal Football Club dintu Arsene hian Hall of Fame-a lak luh a phu hlein ka hria a. Team khelh harsa tak an ni a, chak duh ve ve kan ni a, chu chuan min cho thin,” a ti a. “Kan chawlh hnuah Switzerland-a a thingpui dawr hriat te tak tê-ah zanriah pawh kan kil dun a ni,” a ti.

Wenger-a pawhin, “Sir Alex-a nen kan ni hi ka tan chuan chawimawina ropui tak a ni a. Boxer pahnih, nasa taka inbeia thui tak thleng dun ta ang mai kan ni,” a ti a. “Ani hmuh lehna remchang ka nei hi ka lawm a, uaiin in dunin kan lo inbeih tawh dante pawh kan sawi dun,” a ti.

Kum 81 mi ni tawh, Sir Alex-a hi Premier League nomawi 13 zet latu niin la ngun ber a ni a. Manager of the Season pawh vawi 11 zet dawngin 2012-13 season tawpah khan a chawl a ni.

Kum 73 mi, Wenger-a pawh hi Premier League season tluana hneh lo nei lova Arsenal hruaitu niin 2003-04 season khan chiang takin a champion-pui a, khelh 26 chakin vawi 12 an tumpuite an hnehtawk a. A nomawi lak dang chu thuhran ni se, he season-a a team a chetpui dan vang ringawt pawhin chawimawi a phu.

Scottish pa thluak tha, Sir Alex-a leh French pa fing, Wenger-a te hi vawi 49 zet an inhmachhawn a. Heng zawng zawng hi Manchester United leh Arsenal an enkawl laia mi vek a ni a, club dang hmingin an inhmachhawn miah lo.

Vawi 49 an inhmachhawn zinga vawi 34 hi Premier League-ah a ni a, FA Cup-ah vawi sarih, Uefa Champions League leh League Cup-ah vawi hnih ve ve bakah Community Shield inchuhin vawi li an inhmachhawn.

An inhmachhawn hmasak ber hi Wenger-a’n Arsenal a enkawl hmasak ber season, 1996-97 khan niin Premier League-ah a ni a, Old Trafford-ah niin Sir Alex-a hote hian si khat faiin an hneh a, goal awm chhun hi Gunners defender Nigel Winterburn-a’n an lama a tihluh palh a ni nghe nghe.

An inhmachhawn hnuhnung ber chu Emirates Stadium-ah ve thung niin 2012-13 Premier League season-ah a ni a. Arsenal tan Theo Walcott-a’n goal thun hmasain an player hlui, Dutch striker Robin van Persie-a’n United tan a sut ve thung.

Heng an inhmachhawn vawi 49-ah hian Sir Alex-a hian vawi 23 zet hnehna changin Wenger-a hi vawi 16 a chak ve thung a, vawi 10 an inhnehtawk a ni.