USA hian anmahni pual deuh bik sports lar leh lian tak tak an neih nual vang pawh a ni mai thei a, khawvelin a ngaihhlut, football-ah hian hnuhma lian sawi tur an ngah lem lo va, ‘an thiam’ tia sawi pawh an hlawh ngai kher awm lo ve.

Mahse, chanchin hlui han hai neuh neuh chuan hnuhma an lo nei nual a, Fifa World Cup-ah phei chuan hmasa ber nihna pawh an lo hauh ve nawk tho mai.

Kum 1930-a Fifa World Cup hmasa ber, Uruguay-a khelhah khan ram 13 an tel a, heng zingah hian US pawh hi a tel a, a che chhe lo phian bawk a, pathumna niin an haw.

Kha inelnaah khan Group 4-ah awmin Belgium leh Paraguay an awmpui a. An khelh hmasak ber, Montevideo khawpuia Estadio Parque Central-ah entu mi 18,346 hmaah si thum faiin tun laia ram tha tak ni ta, Belgium chu an hneh a. Fifa World Cup-a goal chhuah lo ram ni hmasa ber an nih phah ta a ni.

An goalkeeper Jimmy Douglas chuan Belgian player-te pet tha tak takin a dangin an ram a chhanhim a, amah leh an ram chu World Cup-a goal chhuah lo tluan hmasa ber an nih phah a. An rual chiah hian Group 1-ah France leh Mexico an inkhel ve bawk a, hetah erawh European giants hian 4-1 in hnehna an chang ve thung a ni.

USA hian hei lo pawh hi World Cup-a hmasa ber nihna an hauh va, an chak hmasakna khelmualah tho hian ni li hnuah entu mi 18,306 hmaah Paraguay chu si thum fai bawkin an hneh leh a, hemi tum hian Fall River FC forward Bert Patenaude chuan goal thum thunin World Cup-a hattrick siam hmasa ber a ni leh bawk a ni.

USA hi an awmna khawmualpui, North America-ah football thiam ram dang an tam lem loh vang pawh a ni mai thei a, World Cup-ah hian an tel zing phian hrim hrim a. A hmasa bera an tel hnuah 1934, 1950, 1990, 1994, 1998, 2002, 2006, 2010, 2014 leh 2022-ah te khan an tel leh tawh a; mahse, Uruguay-a pathumna an nih bak kha chu result chhuan tur erawh an nei zui lem lo.

Kum 1994-a an thlen hnuah kum 2026 hian an thenawm, Canada leh Mexico ramte nen inthlen tawmin an khel leh ngei dawn tih a chiang leh tawh bawk a ni.