ZALEN, Sept. 06, 2026: Kar hmasaa Nigeria-a final a tlawm hnua Mizo tlangval, H.Lalthazuala chuan nomawi a hlawh chhuak ta a, Pathianni khan Cameroon International 2026-ah kar hmasa final-a a hneh loh hnehin a champion.

Yaoundé khawpui, Warda-a Palais Polyvalent des Sports de Yaoundé-a Ningani atanga inelna tan hi Pathianni khan final khelh a ni a. Chanmari West, Aizawl tlangval hian mipa maltanah Tankara Gnaa Dattu Talasila chu 2-1 (21-13, 13-21, 23-21)-in a hneh a ni.

Thazuala hian August 29 khan Nigeria khawpui, Lagos-a 9th Lagos International Badminton Classics mipa maltanah academy-a a awmpui thin, Tankara lakah hian 2-0 (9-21, 20-22)-a tlawmin silver medal a lo la tawh a, tun tumah erawh a thianpa lakah phuba lain nomawi a la ta a ni.

Cameroon khawpuia inelnaah hian final lut turin semifinal-ah Indian shuttler tho, Kavin Thangam a hneh a. Quarterfinal-ah World No. 112 Ade Resky Dwicahyo a hneh bawk.

Thazuala hi TATA TRUSTS, NEIDA, Mizoram State Sports Council (MSSC) leh MBA thawhhona kaltlanga inzirna hmuna awm a ni a. Mizoram Badminton Association (MBA) chuan a chhuang tak zet a, a kal zelna turah duhsakna a hlan tih a sawi.