ZALEN, Sept. 08, 2026: Tun hnaia khawvel huap tournament pahniha final lut zawna pakhat zawka champion, H.Lalthazuala chu Thawhlehnia Badminton World Federation (BWF) ranking chhuak tharah a hmaa a awmna atanga dinhmun 77 zeta hma sawnin mipa maltanah World No. 161 a ni thar.

Tar lan tawh angin Mizo shuttler hi tun hnai tournament pahniha a che tha hle a, chawlhkar hnih liam taa Lagos, Nigeria-a Lagos International Classics 2026-ah final lutin silver medal a la a, BWF mipa maltan ranking-ah point 3,400 hmuh belhin No. 238-ah a kai.

Kar liam ta khan Younde, Cameroon-a Cameroon International 2026-ah champion-in point 4,000 a hmuh belh leh a, hei hian a ranking a vawrh sang dawrh a. No. 161 kaiin a vaiin point 11,900 a hmu tawh.

BWF hian ranking hi tennis-a chawlhkar 52 (kum khat) chhung zela an point hmuh atanga tehin a siam a. Kar tin Thawhlehni apiangin dinhmun thar hi tihchhuah thin a ni a, ranking tihchhuah thar atanga chawlhkar 52 liam ta chhung zela an point hmuh belhkhawm a ni a, an tehna chawlhkar 52 hma lam china an point lo hmuh tawh erawh paih zel a ni thung.

Chanmari West, Aizawl tlangval, Thazuala hian chawlhkar 52 liam ta chhungin BWF tournament vawi riat a khel a. Tun hnai inelna pahniha final a luh hma hian SBH Singapore International Series 2026-ah pre-quarterfinal thlengin Austrian Open 2026-ah round of 32 a thleng bawk a ni.

BWF tournament hi grade thuma then niin grade tinah hian level a awm zel bawk a. Kum 19 mi, Thazuala hi Level 3 Grade 1 (Level 3-a grade sang ber)-a champion niin Level 2 Grade 6) a khel phak dawn em tih erawh hriat chian theih a ni rih lo.

Thazuala hi Tata Trusts, NEIDA, Mizoram State Sports Council (MSSC) leh Mizoram Badminton Association (MBA) te thawhhona atanga Pullela Gopichand Badminton Academy (PGBA), Hyderabad, Telengana-a inzir tura kum kum 2021 atanga tun thlenga la awm mek a ni. 

MBA chuan India leh Mizoram tihmingthatu, Mizo zinga BWF tournament (senior level)-a nomawi la hmasa ber leh champion hmasa ber hi a chhuangin a lawmpui tak zet tih a sawi.