English rock band lar The Beatles ten hun rei tak chhung record an lo chelh tawh chu Taylor Swift chuan a rawn thai chhe ta tlat mai. American pop star Swift hian thla kaw (9) chhung lekin UK chart-a No.1 kai thei album pathum ngawt a nei a, The Beatles te record lo siam tawh chu a rawn khum ta a ni. 

Kum 31 mi Taylor Swift hian nikum July khan a studio album pariatna 'Folklore' a tichhuak a, nikum December vek khan 'Evermore' a release leh bawk. Tun hnai khan Fearless (Taylor's Version) chu a tlangzath leh bawk a, heng album pathumte hian UK chart-ah No.1 an hauh phak vek a ni. LP Fearless (Taylor's Version) hi April 16, Zirtawpni khan UK chart-ah No.1 a ni a, American singer & songwriter Taylor Swift hian record duhawm tak a siam theih phah ta a ni. 

Hetiang ti thei tur hian ni 259 a mamawh laiin, The Beatles te hian ni 364 zet an mamawh thung. Chutih rualin The Beatles - John, Paul, George leh Ringo te record hi dah hniam chi rual a ni lo - kum 54 chhung zet chu khumtu awm loin record hi an lo chelh tawh a ni! The Beatles hian kum 1965-66 khan an album pathum - Help!, Rubber Soul leh Revolver hmangin record hi an siam a, kum 2021-ah khumtu an tawng chauh a ni. 

An record khumtu Taylor Swift pawh hi mi bik tih loh theih a ni lo, hmeichhe artist zinga Grammy Award-a 'Album of The Year' tum thum la thei awm chhun leh hmasa ber a ni tlat.  

The Beatles record khum tur hian kum 54 zet nghah a ngai a, Taylor Swift record thaichhe tur hian kum engzat tak nghah ngai ve ang maw?­