The Week That Was

The Week that Was on April 11

Admin - Apr 11, 2021

The Week that Was on April 11

PM leh CM te
April 8, 2021 zan khan Prime Minister Narendra Modi chuan COVID-19 hri leng chungchangah India state Chief Minister-te video conference kaltlangin a kawm a, he hripui second wave laka ram mipui an him zawk theih nan leh, kan do hneh theihna tura hmalak dan pawimawh a tih te a sawi.

RASHTRIYA GAURAV AWARD DAWNG
Dr. ZR Thiamsanga MLA, Health and Family Welfare Board chuan April 9, 2021 khan India International Friendship Society (IIFS) hnen atangin India khua leh tui, ram chhung leh pawna awm, mi dang te tana hnathawk tha chawimawina Rashtriya Gaurav Award chu a dawng . 

CM-in MHSA hmanpui
Chief Minister Zoramthanga chuan Ningani (8.4.2021) khan Aijal Club-ah Mizoram Horticulture Service Association General Conference 24-na chu khuallian niin a hmanpui. Addl. Chief Secretary J.C Ramthanga chu khualzahawm a ni bawk. Conference thupui hi "Horticulture for economic growth in Mizoram" a ni.

Special Package
April 8, 2021 khan New Delhi-a thukhawm DoNER Ministry Parliamentary Consultative Committee hnenah C.Lalrosanga, MP, Lok Sabha chuan Mizoram mamawh hrang hrang te a thlen. Video Conferencing-a he Consultative Committee thutkhawmah hian C.Lalrosanga chuan Mizoram-a hmun hnufual bik te tana ruahmanna hran 'Special Package' siam turin DoNER Ministry chu a ngen. 

COMPUTER SET 7 PE
Romawia Royte chuan Mizoramin IT zirna lama hma a sawn theih nan Mizoram chhung High School hrang hrang 71-te hnenah April 8, 2021 khan Vanapa Hall-ah Desktop Computer Set-7, UPS-4 leh Printer-1 theuh a sem. Computer dawngtu High School 71 zinga 59 hi Aizawl khawpui pawn an ni.

JORDAN CENTRE HAWNG
Ruihhlo avanga harsatna tawkte chhanchhuahna leh tanpuina hmunpui Jordan Centre, Sethawn chu Thawhlehni (06.04.2021) khan Chief Minister Zoramthanga chuan khuallian niin a hawng. Social Welfare Minister Dr. K. Beichhua chu khualzahawm a ni.

ARECANUT
April 7, 2021 khan SEDP hnuaia Arecanut (Kuhva) Plantation Pilot Project hawnna Land Resources, Soil & Water Conservation Department Conference Hall-ah neih a ni a, LR,S&WC Minister R.Lalzirliana chu Khuallian niin Lalrinsanga Ralte, MLA, Vice Chairman, Rubber & Allied Crops Development Board chu Khualzahawm a ni.

Covid-19 leh hmalakna
Health Minister Dr. R. Lalthangliana chuanApril7 , 2021khan a pisaah khawtlang hruaitute leh kohhran hruaitute kawmin COVID-19 second wave thawk mek laka Mizoram leh kan khawtlang a him theihna tur a sawipui. He hunah hian MKHC, Jt. NGO Coordination Committee, Mizoram Village Council Association leh Aizawl City Local Council Association aiawhte an tel a. Health Department Secretary, DM&R Secretary leh State Nodal Officer on COVID-19 te an tel bawk a ni.

Sipai lak
Dr Lalhriatzuali Ralte, Aizawl District Bawrhsap hovin Aizawl DC’s Conference Hall-ah kumin May 1 atanga May 8 thlenga Rajiv Gandhi Stadium, Mualpuia neih tur Sipai Lak Runpui 2021 atana inpuahchahna chu April 7,2021 khan sawiho a ni a. Col RS Dhingra, Director, Army Recruiting Office – Aizawl hnen atanga hmalakna kalmek leh thil tul dang te ngaihthlak hmasak a ni a. Army Recruitment Rally 2021, Mizoram atana Sawrkar Department hrang hrangte, CYMA, Salem Veng YMA leh Salem Veng Local Council te mawhphurhna lak tur rel nghal a ni.

Ex-Gratia Payment pek remti
April 6, 2021 khan Chief Minister Zoramthanga hovin Council of Ministers chuan CM Office Conference Hall-ah sawrkar department hrang hrang atanga thu pawimawh ngaihtuah tur lutte sawihoin an thukhawm. COVID-19 VLTF/LLTF volunteer te an duty na hmuna COVID-19 hri an kai avanga nunna chan an awm chuan puihna (Ex-gratia payment) cheng nuai 20 pek tura Finance department atanga rawtna lut awm chu pawm a ni.

ADVISER TO CM in office luah
Adviser to Chief Minister (Technical) Er. K. Sawmvela, Engineer-in-Chief, PWD (Rtd.) chuan Chief Minister Office-ah 5.4.2021 khan a office room thar a tuah lut. 

HINDU REFUGEE CAMP TLAWH
April ni 3, Inrinni khan Mizoram Rajya Sabha MP Pu K.Vanlalvena chuan North Delhi huam chhunga Jehangirpuri, Yamuna luikama Pakistan Hindu raltlante camp a tlawh a. An hruaitute kawmin an dinhmun tlangpui te a zawt fiah a ni.