FSL Asst. Director Ammie-i’n Mizoram tan lawmman la

Aizawl: Forensic Science Laboratory, Mizoram Assistant Director Ammie Lalnunpuii chuan 2-day Satellite Conference (SetCon) on Forensic Biological Sciences-ah India-a Forensic, DNA-a thawkte tana a buatsaih Best Oral Presentation (Professional Category)-ah Mizoram tan lawmman pahnihna a la.

  April 7 & 8, 2026-a Forensic Science Laboratory, Patna, Bihar-a conference-ah hian abstract 47 lutin a tha zual 18 thlan chhuah zingah Ammie hi telin presentation neihin a titha thlan leh an ni a, pahnihna lawmman hi a la a ni.

  Conference-ah hian India-a forensic thiam, state leh Central Forensic Science Laboratory atangin mi 150 vel an kal.

  FSL (CID), Patna, Bihar leh union home ministry hnuaia Directorate of Forensic Science Services (DFSS), New Delhi buatsaih SetCon Conference-ah hian lawmmante hi Bihar Chief Secretary Arvind Kumar Chaudhary, IAS leh Dr. S.K. Jain, Director-cum-Chief Forensic Scientist, DFSS ten an hlan a ni.

DGP-in Police Station/Outpost 9 tan Electric Scooter 15 vailiam

Aizawl : Mizoram DGP Sharad Agarwal, IPS chuan Police Modernization hnuai atanga lei Electric Scooter 15, Ather Company siam chu Police Station/Outpost 8 leh Aizawl Traffic Police hman turin April 6, 2026 khan Police Headquarters kawt atangin a vai liam. 

  He hunah hian DGP chuan Electric Scooter te hi hmeichhiate himna’n leh khawtlang ralmuan zawkna atana hman tura lei a nih thu sawiin, a dawngtu ten Patrolling nan leh khawtlang ralmuanna atan tangkai taka hmang turin a chah a ni. Heng scooter te hi a hnuaia mi ang hian sem a ni:

1. Aizawl Police Station - 2

2. All Women Police Station - 1

3. Bawngkawn Police Station - 2

4. Vaivakawn Police Station - 2

5. Kulikawn Police Station - 2

6. Zonuam Outpost - 1

7. Aizawl City Traffic Police - 3

8. Lunglei Police Station - 1

9. Champhai Police Station - 1

Mizo Hlakungpui Mual thawh rukna leh Ruby Jubilee

Aizawl: Minister of State Prof. Lalnilawma chuan April 9, 2026 khan Mizo Hlakungpui Mual thawh rukna leh Ruby Jubilee chu Khuallian niin a hmanpui a, hemi rual hian hla phuahthiam mi pahnih leh thuziakmi pali chawimawina lungphun a hawng nghal a ni. He hunah hian East Tuipui bialtu MLA Ramthanmawia chu khual zahawm a ni.

  He hun hi Mizo Hlakungpui Mualah hman niin Mizo Hlakungpui Mual Committee Chairman C. Lalluia chuan a kaihruai a, Rev. Dr. C. Rosiama, Mission Veng Aizawl chuan hunserh hmangin Khawbung Branch YMA zaipawl an zai a, Secretary te hnen atangin report ngaihthlak niin Lalchhandami Pachuau, BDO Khawbung bakah sengluh thar chhungte leh sengluh tawh chhungte atangin thusawi ngaihthlak a ni.

  Mizo hlakungpui mual thawhruknaah hian hla phuahtu pahnih - Hawva (1893-1956) leh Lalmama (1901-1959) te bakah thu ziaktu pali - Capt. LZ Sailo (1924-2008), Kawlkungi (1927-2015), Rev. Zairema (1917-2008) leh Lalhmingliana Saiawi (1937-2016) te sengluh an ni a, mi 41 sengluh an ni tawh a ni.

Mission Shakti review meeting cum training

Aizawl: Women & Child Development hnuaia Mission Shakti (Safety, Security & Empowerment of Women) - Hmeichhiate venhimna, humhimna leh chawikanna programme kalpui mek hnuaiah ni thum chhung awh tur Annual Review Meet cum Training chu 09.04.2026 khan I&PR Lianchhiari Run Conference Hall-ah neih a ni.

  Poshan Pakhwada (Nutrition Fortnight), April ni 9 atang ni 23, 2026 thleng awh tur chu Zoramthangi Chhangte Director WCD in a hawng nghal a, Poshan Pakhwada hman dan tur sawifiahna te neih nghal niin, Mizoram mai nilo, India ram pumpuia hman tur a nih thu a sawi. Hemi atan hian Zoram mipui te kan theihna zawn theuh a lo tawiawm a hma lo lakpui turin Women & Child Development Department chuan a ngen a ni.

Mizo Sports Hall of Fame hawng

Aizawl: Sports & Youth Services Minister Lalnghinglova Hmar chuan April 8, 2026 khan Bungzung khuaah Mizo Sports Hall of Fame chu khuallian niin a hawng a, East Tuipui Bialtu MLA Ramthanmawia chuan khualzahawm niin a hmanpui bawk.

  Khuallian Lalnghinglova Hmar leh bialtu MLA Khualzahawm Ramthanmawia, South Tuipui bialtu MLA Jeje Lalpekhlua bakah S. Malsawmtluanga (Mama) Footballer te'n thu an sawi a, Aizawl Bungzung Welfare leh Champhai Bungzung Welfare te'n thu an sawi bawk.

  Goldena, VCP, Mizo Sports Hall of Fame Chairman ni bawk chuan kaihruaiin Rev. Samuel Lalmuanpuia Pachuau, bialtu Pastor chuan hunserh a hmang a, J. Zakhuma, Secretary, Mizo Sports Hall of Fame Committee chuan report pe in T. Lalchhuanawma, Asst. Secretary hnen atangin infiammi chawimawite chanchin ngaihthlak a ni bawk.

  Mizo Sports Hall of Fame ah hian infiammi pasarih - K. Kawla (L), Jeje Lalpekhlua, S. Malsawmtluanga, Lalremsiami Hmar, Lalremsanga, T. Zoramthanga (L) leh Jeremy Lalrinnunga te lim dah a ni.

Cheng nuai 20 man hu Heroin man

Aizawl : Champhai Police chuan kar kalta chhung khan Heroin gram 100, cheng nuai 20 man hu an man:

  07.04.2026 tlai dar 4:30 PM khan Champhai Police team, Chhungte dai (Chalbawiha Junction, Khankawn Check Gate piah)-a patrolling te chuan mi pakhat, kawng sira thu chu ringhlelin thu an zawt fiah a, he mi hi Lalbuatsaiha (21), Tlangsam khua nia insawiin, a bulhnai hnim karah ruihhlo a thuhruk thu a sawi a ni.

  A inpuanna bawhzuiin a sawina lai vel hi dap a ni a, Heroin gram 48, (hawng 4), Rs. 9,60,000/- man hu, sarang duma dah hmuh a ni. Amah bakah hian mobile phone pakhat man tel a ni. Chhui zuina atangin he thila inhnamhnawih midang pahnih, Lawmnasanga (40), S/o R. Lalrinmawia, Khawhai khua leh Lalrinthangi (35), D/o Zohmingliana, Tlangsam khua te pawh man belh leh an ni.

  06.04.2026 zing dar 7:00 AM khan Champhai Police, Chalbawia Junction, Khankawn Check Gate-a duty te chuan lirthei veivak an check a, Sumo pakhat (Regn. No. MZ-02B-0743) Champhai atanga Aizawl lam pana kal chu check in, Heroin gram 52, sahbawn bawm 3 leh plastic bawm 2 a dah, Rs.10,40,000 man hu chu a mi chuang pakhat, Lalpekthuama (30), Seling (Bethel) hnen atangin an man bawk.

Chhiarpui atan Mizoram Larsap inziaklut

Aizawl : Mizoram Larsap, General (Dr) Vijay Kumar Singh, PVSM, AVSM, YSM (Retd) chu April 7, 2026 khan Lok Bhavan, Aizawlah Chhiarpui, Census of India 2027 Phase-I (Houselisting leh Housing Census) hnuaia self-enumeration-ah a inziaklut.

  Chhiarpui 2027 hi India rama digital census hmasa ber tur niin, thawh hniha kalpui tur a ni a. Thawh khatna Houselisting leh Housing Census hi April 1, 2026 atang khan kalpui tan a lo ni tawh a. Thawh hnihna Population Enumeration hi February 2027-ah neih tan tur a ni a. Self-Enumeration hun hi April 1 atanga April 15, 2026 thleng a ni a, April 16 atanga May 15, 2026 thleng House Listing leh Housing Census Mizoram pumpui-ah kalpui a ni ang.

Social Welfare leh Mizoram Synod hotuten tlawh

Aizawl: Mizoram Synod hotuten leh Social Welfare Department hotute chuan April 6, 2026 khan Jordan Centre, Sethawn a mi chu an enfiah a. 

  Mizoram Synod lam hi Moderator Rev John Raldosanga bakah Synod Social Front atangin Rev K. Lallawmzuala, Executive Secretary, Rev P. Zohmangaiha, Secretary, Rev. Lalrinmawia leh member dang mi 3 an kal a, Social Welfare Department hi Joint Secretary Zonunthari hovin offcial 5 an kal a ni.

  Jordan Center hi Mizoram Sorkar chuan Mizoram Synod enkawl turin inremna kum 15 atan a lo ziah pui tawh a. A hmunhna, building leh a chhung bungrua awm te hi a nih ang ang a inpek turin an lo inrem tawh a ni.