Mi pathum hnenah zangnadawmna pe

Aizawl : Aizawl District Legal Services Authority (ADLSA) chuan April 8, 2025 khan Aizawl Aizawl District Court-a District Judge Meeting Room-ah pawi khawihna tuartu mi 3 hnenah zangnadawmna an hlan.

   March 21, 2025 khan mi 14 hnenah zangnadawmna hi a lo semchhuak tawh bawk a ni. Crime Victim Compensation semna inkhawm hi Aizawl District & Sessions Judge Helen Dawngliani, ADLSA Chairman hoa hman a ni a; Mizoram BAR Association ten an tel pui bawk a ni. Mi kut tawrh avanga thi leh kumtling lo pawngsual tawk mi 3 hnenah zangnadawmna Rs 4,50,000 semchhuah a ni a, an zingah Aizawl Hospital Doctor, vanduaithlak taka mi kut tuar avanga boral Dr. Laltanpuia, Kulikawn, Aizawl a nupuiin a thah fate pawh an tel.

Chite luia bawlhhlawh ip 245 thian

Aizawl : UPC North East India hnuaia Aizawl East District (AED) thalaite chu April 10 khan Chite luia bawlhhlawh thiana hnatlangin ip 245 vel an paih fai.

   PYD hnuaia Environment Protection Committee hmalaknaa hnatlangah hian bial hrang hrang atangin member 200 vel thawkchhuakin Bethlehem Vengthlang kâiah lui hi an tifai a, Sanitation Department-in bawlhhlawh paih motor an hmantir hmangin garbage bag 245 vel an chhar khawm chu an paih a ni.

Mizo nu cocaine tawlhruk Sri Lanka-ah man

Aizawl : Sri Lanka news website www.adaderana.lk in April 7-a a tarlan danin Mizo hmeichhia pakhat hnen atangin Bandaranaike International Airport (BIA), Sri Lanka ah cocaine nen man a ni tih a tarlang a, cocaine an man hi Rs. 65,760,000 hu niin tarlan a ni.

   India mi, Mizo hmeichhia kum 29 a upa hi Sri Lanka Police Narcotics Bureau (PNB) chuan an man a, an chhui thuina atanga a landanin he nu hian tunhma lamin Sri Lanka hi vawi thum a lo tlawh tawh a ni.

   PNB hian Thawhtanni chawhnu khan India mi pakhat an man a, he an mi man hian Mizo nu in cocaine a pek tur hi a inpuanna atangin an hrechhuak a, Kollupitiya hotel pakhata inhmu tur an nih thu PNB te hnenah hian a puang ta a ni.

National Tribal Youth Festval khar

Aizawl : April 8, 2025 atanga April 10, 2025 chhunga Social Welfare, Women & Child Development hnuaia Directorate of Social Welfare huaihawtin a vawi khatna atana buatsaih National Tribal Youth Festival kharna chu Health Minister Lalrinpuiin khuallian niin a hmanpui.

   Ni thum chhung awh festival-ah hian Mizoram chhunga tribal thalai nunphung, hla, leh culture hausa tak takte lawmna leh pholanna hun hman a ni a, tribal nunphung, culture leh tradition vawn nun nan a tha hle a ni.

   April 11, 2025 kha Naupang pual kut bik-ah hman a ni a. Naupangte tana ni bik a nih angin Mizo thawnthu leh nunphung behchhanin Zo Kawsplei inelna neih a ni.   Naupangte zingah Mizo thuama inchei mawi ber thlanna pawh buatsaih a ni a, Open quiz Competition buatsaih a ni. Zirna in hrang hrang tana hnam lam inelna MCO ten an buatsaih bawk.

Lalnghinglova Hmar leh Japan Embassy te inkawm

Aizawl : Labour, Employment, Skill Development & Entrepreneurship Department minister Lalnghinglova Hmar chu April 9, 2025 khan Japan Embassy-a First Secretary pahnih - Hagiwara Ryusuke and Tsubakimoto Mayumi te nen Mizoram House, Chanakyapuri ah an inkawm a, Japan Embassy kaltlanga Mizo thalaite tana hamthatna awm thei hrang hrang an sawiho.

   LESDE Minister Lalnghinglova Hmar chuan Mizoram chu state lian lo, workforce pawh tam lo ni mah se thalaite’n thil an thiam chak a, a bikin kum upa tamna ram Japan in a mamawh heng - nursing, caregiving leh hospitality sector ah te Mizo thalai theihna a sang tih a sawi. Mizoram chhunga huihawt cosplay-ah pawh kan thalaite’n Japanese culture pholan an uar a ti a. Hei hi intihhlimnaa tawp mai lovin eizawnna tling, Mizoram leh Japan thlunzawmna hmanrua pakhat ni thei se a duh thu a hrilh.

Union Minister of State for Home-in Siaha tlawh

Aizawl : Siaha the 9th April 2025: Union Minister of State for Home Affairs, Nityanand Rai chuan April 9, 2025 khan Siaha a tlawh a, sawrkar official ten an lo hmuak.

   Union Minister Nityanand Rai hmuahna hun hi CEM Bungalow ah hman a ni a, felicitation hun hman a nih hma hian Siaha District MLA te, MADC hotute, Mizoram sawrkar official-te bakah NGO hrang hrang hruaitute nen inkawmna hun tawi an nei hmasa a, hemi zawh hian a lawmna hun hman chhunzawm nghal a ni.

Dr. Vanlalthlana'n Union Minister Kiren Rijiju leh Dr. Sukanta Majumdar te a kawm

Aizawl : Sawrkar kaihhnawih hna pawimawh buaipuia New Delhi-a cham mek, School Education Minister Dr. Vanlalthlana chuan April 8, 2025 khan Sawrkar laipuia Minority Affairs leh Parliamentary Affairs changtu Minister Kiren Rijiju bakah Development of North Eastern Region (DoNER) leh Education changtu Minister of State Dr. Sukanta Majumdar te chu hmuin, Mizoram hmasawn nana pawimawh leh tul hrang hrangte a sawipui.

   Hei bakah hian Minister hian Medhavi Skills University, Gurgaon a tlawh a. Education leh IT sector kaihhnawih company/corporate pariatte chu a thlenna Mizoram House-ah a kawm bawk.

PWD Minister-in KMMTTP leh PMGSY III Road enfiah

Aizawl : PWD Minister Vanlalhlana chuan April 8, 2025 khan Kaladan Multi-Modal Transit Transport Project (KMMTTP) leh PMGSY III ROAD, Diltlang 'S' - Chawngte 'P' kawngpui sial mek chu a hmunah kalin a enfiah.

   Minister hi Dy. Speaker Lalfamkima, Adviser to Chief Minister Dr. Lorrain Lalpekliana Chinzah, Lawngtlai East bialtu MLA ni bawk bakah Lunglei West bialtu MLA T Lalhlimpuia leh Lawngtlai West bialtu MLA C. Ngunlianchunga ten an tawiawm a ni.

   Minister hi Er. H Zoramliana, Engineer in chief (PWD) Er. David Sapzova, Chief Engineer (Roads), Er. Hrangthanga Zote, Chief Engineer (Building), Er. Robin Lalrinawma, Chief Engineer ( Highway), Er. Lalchhandami, Chief Architect (PWD) leh Official dangten an tawiawm bawk.

National Review Conference-ah Rinpuii

Aizawl : Ministry of Social Justice & Empowerment, Government of India buatsaih ni hnih awh National Review Conference chu April 7&8, 2025 chhung khan Dehradun, Uttarakhand ah neih a ni a, he hunah hian Social Welfare Minister Lalrinpuii pawh a tel.

   Union Minister, MoSJE Dr Virendra Kumar a hovin, Minister of State pahnih - Shri BL Verma leh Shri Ramdas Athawale te bakah State hrang hrang Social Welfare ministers leh officials ten Ministry of Social Justice & Empowerment hnuaia scheme hrang hrang hmalaknate thlir hovin, hmalakna nei thate hnathawh dan an zirho bakah hmalak theihna hrang hrangte an sawi ho bawk a ni.

   Lalrinpuii chuan CM Lalduhoma hova Ruihhlo Do kalpui anih dan a tarlang a, National Action Plan on Drug Demand Reduction leh Nasha Mukt Bharat Abhiyan hnuaia hmalakna piahlama hmalakna te tanpui ve theihna tura ruahmanna siam turin Ministry lam hotute a ngen a ni.

Governor-in TRC NCC te hlawhtlinna lawmna hmanpui

Aizawl : April 8, 2025 khan Govt. T. Romana College (GTRC) leh 1 Mizo Bn. NCC tangkawpte chuan GTRC Auditorium, Aizawl-ah Govt. T. Romana College NCC te hlawhtlinna lawmna leh NCC cadet-te chawimawina hun an buatsaih a. He hun hi Mizoram Larsap, General (Dr) Vijay Kumar Singh, PVSM, AVSM, YSM (Retd) chuan khuallian niin a hmanpui a ni.

   March 25, 2025 a Guwahati-a North East Region (NER) huamchhunga NCC titha 'Best Educational Institutes for NCC NER 2024-2025' lawmman semnaah khan Govt. T. Romana College (1 Mizo Bn. NCC) chu Mizoram College zinga NCC kalpui tha ber 'Best NCC College in Mizoram 2025' atan thlan a ni a. Nikum khan he chawimawina hi lo dawng tawhin a kum zawna an dawnna a ni. Hemi bakah hian an College zirlai Junior Under Officer (JUO) Jacksy Lalhlimsangi chu Best Cadet NCC NER 2024-25 hnuaiah Silchar Region, Girls (Army wing & others) category-ah cadet tha bera thlan a ni.

CM-in ruihhlo tawlhruk hmachhawn dan tur sawipui

Aizawl : Chief Minister Lalduhoma chuan a office-ah Director General of the Narcotics Control Bureau (NCB) Anurag Garg, IPS chu April 8, 2025 khan a kawm a. Mizoram paltlang ruihhlo tawlhruk hmachhawn dan tur thil te a sawipui.

   Chief Minister hian an hmalakna tichak thei tur rawtna an neih hrang hrang te chu ziaka pe turin a hrilh a. Khaw chhak lam atanga ruihhlo lo lut nasa tireh thei tur hian ramriah infrastructure tha neih belh a tul a, thawktu indaih (manpower) neih a ngai bawk a. Chuvang chuan central sawrkarah pawh rawtnate thlen a, Mizo Territorial Army dinsak turin Ministry of Home Affairs lam te pawh a ngen, a ti.

FC&CS Minister-in Gas chawkluh tum hotute kawm

Aizawl : Dated : Food & Civil Supplies, Consumer Affairs, Land Revenue & Settlement Minister B. Lalchhanzova chuan Tripura atanga Gas pipe line hmanga Mizoram gas chawk luhna tura hnathawktu Indradhanush Gas Grid Limited (IGGL) leh Tripura Natural Gas Company Limited (TNGCL) Company-te chu April 7 khan DC Conference Hall, Mamit-ah meeting a neihpui.

   Gas pipe line hi Tripura Panisagar atanga Sihmui thlengin Km 104 tur a ni a, Km 100 hi Mamit District chhunga kaltlang tur a ni. Hna zawh hun atan hian March 31, 2027 chu ruahman a ni a, tunah hian Km 23.148-a thui pipe hi phum tawh a ni. Gas pipe line hi Tripura sawrkar hnuaiah kum 1990 atanga kalpui a lo ni tawh a. Tripura atanga Mizorama lakluhna hna hi Indradhanush Gas Grid Limited te'n an thawk anga, Mizoram chhunga In tina connention pek hna hi Tripura Natural Gas Company Limited te'n an thawk thung ang.