‘Deterring Wildlife Crimes: Challenges and Opportunities’ workshop nei

Aizawl : April 11, 2024 khan Mizoram State Legal Services Authority leh Aaranyak tangkawpin an buatsaih ‘Deterring Wildlife Crimes: Challenges and Opportunities’ chungchang Workshop chu Gauhati High Court, Aizawl Bench, MINECO, Aizawl ah neih niin Supreme Court of India Judge Justice Ujjal Bhuyan chuan kuallian niin a hmanpui. Justice Prasanna B. Varale, Judge, Supreme Court of India chuan Guest of Honour niin a hmanpui bawk.

Ambassador-Designate to Myanmar-in Zokhawthar tlawh

Aizawl : Indian Ambassador to Myanmar mawhphurhna chelh tura ruat, Ambassador-Designate to Myanmar Abhay Thakur, IFS chuan April 10 khan Circuit House Champhaiah District Official, NGO leh ramri behchhana sumdawngte meeting a neihpui a, ramri dep khua Zokhawthar a tlawh nghal bawk.

   He hunah hian NGO te'n Free Movement Regime (FMR) tihtawp leh ramri hungte an do tlat thu an thlen a. Inkalpawhna kawngpui, raltlan chungchang, border trade, ramri kaltlanga ruihhlo tawlh ven chungchang leh pawimawh danga ngaihdan leh rawtna an neihte Ambassador-Designate to Myanmar hnenah hian an thlen bawk a ni.

SVEEP Bike Rally buatsaih

Aizawl : Lok Sabha inthlanpui 2024 inbuatsaihna kal mekah 11.04.2024 zing khan Bike Rally buatsaih a ni a. SVEEP (Systematic Voters Education & Electoral Participation) Aizawl District chuan mi tam zawkin vote an thlakna tura inhrilhriatna atan Bike Rally hi a buatsaih a, Bawngkawn Brigade Field atangin DEO Nazuk Kumar chuan vailiam in, CEO Madhup Vyas hovin biker thahnem takin Silaimual thleng an tlan a ni.  He Bike Rally ah hian Matchlezz Motor Cycle Club, Mizoram leh Biker Girls, Mizoram te an tel a ni.

Service Voter-te tan e-postal ballot 4963 thawnchhuak

Aizawl : 1-Mizoram (ST) Parliamentary Constituency for General Election to Lok Sabha, 2024 atan Venhimna lama hnathawktu service voter 4,963 te hnenah e-postal ballot (Electronically Transmitted Postal Ballot) chu April 10 khan thawnchhuah a ni. Heng Postal Ballot hi service voter-te awmna hmuna print chhuah a ni ang a, vote an thlak fel hunah Returning Officer hnenah an thawn dawn a ni. Service voters hi mipa 4872 leh hmeichhia 91 an awm a ni.

Governor Discretionary Fund hlan

Aizawl : April 9, 2024 khan Saitual DC Office Chamber ah Governor Discretionary Fund atangin tanpuina pawisa fai cheng Rs.23,400 chu Hlimna In Girls Home Superintendent hnenah Saitual DC,Dr Lalngura Tlau in a hlan. Salvation Army enkawl Hlimna In ah hian tun dinhmun ah naupang 11 awm in School kallai vek an ni a. Thawktu 10 an awm a, a building leh a enkawl hna hi Salvation Army in tum in Funding hi ICPS hnuaiah a ni a, home a naupang admit chungchang erawh hi chu CWC ruahmanna angin an kal pui a ni.

Aizawl District-ah Home Voting kalpui

Aizawl : Lok Sabha MP inthlanpui 2024 atan Aizawl District chhunga Assembly Segment sawm leh pahnih (12) tan , 8.4.2024 atang khan Home Voting kalpui tan niin, April ni 10 thleng a awh. Election Commission of India (ECI) ruahman angin kum 85 chin chunglam leh Persons with Disabilities te, vote thlak tura polling station pan tura harsatna neite tan mahni in lum atanga vote an thlak theih na tur Home Voting hi kalpui a ni.

   Aizawl District ah hian tun inthlanpui atan hian home voting atan mi 874 chhinchhiah niin, an zinga 54 chu Persons with Disabilities an ni. Hemi atan hian election duty ni engemawzat chu team 22 an inthen in Assembly segment hrang hrangah an kal a, Postal Ballot hmangin vote hi thlak a ni.

National Level Hackathon event - Hackventure 2.0 hawnna neih a ni

Aizawl : Mizoram Police leh NIT Mizoram-te tawngkawpiin a an buatsaih, ni thum awh National Level Hackathon event – “Hackventure 2.0” chu April 8, 2024 khan Mizoram DGP Anil Shukla, IPS chuan Arya Mess, PHQ-ah a hawng.  “Hackventure 2.0” hi Mizoram Police leh NIT Mizoram-te tawngkawpiin a an buatsaih Hackathon vawi hnihna niin he event-a tel tura sawmna hi India ram NIT zawng zawng mai bakah Mizorama engineering institution hrang hrang hnenah thawn chhuah a ni a. He hun hi 8th April,2024 – 10th April, 2024 chhunga neih tur niin a event hrang hrang te tarlan ang hi a ni.

Ruah leh thli vanga nunna chan mi 2 awm

Aizawl : Tunhnaia Mizoram a ruah sur nasa leh hemi kaihhnawih thli leh rial tla vanga nunna chan April 9, 2024 thleng khan mi pahnih an awm. Mizoram sawrkar a Disaster Management & Rehabilitation (DM&R) tarlan danin, ruahsur nasa leh a kaihhnawih vanga nunna chan te chu Aizawl a thing tlu in hmeichhe pakhat a delh hlum leh Lawngtlai district a tek tla in a den mi pakhat an ni a, hliam tuar mi 5 awmin, ran thi pakhat a awm bawk.

   Ruahsur nasa leh hemi kaihhnawiha thli leh rial tla vanga chenna in chhia zawng zawng chu 2,938 a tling. Chung zinga 81 te chu chhe vek (fully damage) niin, chhe nasa 483 leh in chhe nual 2,374 a ni.