Laldenga Cultural Centre sakna tur hmunhma enfiahin
Aizawl : Chief Minister Zoramthanga chuan April 10, 2023 khan Laldenga Cultural Centre sakna tur hmunhma enfiahin a kaihhnawih department hotute nen Lammual an tlawh.
    April ni 1, 2023 a Union Home Minister Amit Shah-a'n Laldenga Cultural Centre sakna tur lungphum a phum tak chu tukin khan Chief Minister leh PWD, Planning & Programme Implementation Department, Home Department leh department dang hotute chuan a enho a. He building hi Smart City project hnuaia sak tur niin project cost chu cheng vbc 193 a ni.

Mizoram-ah Fentanyl la lut lo
Aizawl : Excise & Narcotics Minister Er. Lalrinawma chuan April 10, 2023 khan a pisa, MINECO-ah thuchah sawiin, ruihhlo dona kawngah Zoram mipuite  kan tanrual a ngaih takzet thu a sawi.
    Er. Lalrinawma chuan tunhnaia Zombie Drug, Fentanyl leh tunlai ruihlo (New Psycho Active substance-NPS) khawthlang ram ten an buaipui em em thinin  Mizoram lo lut tawh ni a sawi leh mizo thalaite zingah a hmang sual an awm ni a sawi chu Excise & Narcotics Department chuan rang taka chhuiin a zir chiang nghal tih sawiin, he thu thang hi a diklo a ni tih Ni.6.4.2023(Ningani) khan  finfiah nghal a ni, a ti

DoNER Minister-in Lengpui Airport thawh
Aizawl : Zan khat riaka Mizoram lo zin Sawrkar Laipui Ministry of Development of North Eastern Region (DoNER) Minister Shri B L Verma chuan April 11, 2023 khan Lengpui Airport rawn thlengin Lengpui Airport tihchangtlunna hna ‘Improvement/Upgradation of Operational/Non-Operational facilities of Lengpui Aiport’ thawh mek chu a hmunah a en nghal.
    Lengpui Airport VIP Lounge a meeting neihah, Minister chuan he hna chungchang a hriatduh hrang hrang project in a huam chin te, hna hrang hrang thawh mekte, hna an zawh beisei hun te PWD hotute a zawt a. Minister chuan he hna zawh hun hi March 2023 atanga December 2023 pawhsei nimahse October 2023 chhunga zawhfel ni thei se tiin a duh thu a sawi.

Rotary India Literacy Mission nen MoU ziak
Aizawl : April 11, 2023 khan Secretary School Education Dr Lalzirmawia Chhangte Office chamber, MINECO-ah School Education Department leh Rotary India Literacy Mission-ten naupangte zirtirna TV programme-a pek chhuah kawnga thawhdunna tur MoU an ziak.
    Ministry of Education, Government of India chu state tinten zirna (education) atan bik liau liau, a thlawna hman tur TV channel pe turin a in ruahman mek a, hei hi zirlai hmun kilkhawr bera awm te, zirtirtu awm mumal lohna hmuna zirlai awmte pawhin zirna tha an dawn theihna atana ruahman a ni.

ZMC-a MBBS zirlai hmasa ber result chhuak
Aizawl : Zoram Medical College-a MBBS zirlai hmasa ber (2018 batch) te result chu April 11, 2023 khan tihchhuah a ni a. Exam beitu zirlai 95 zingah mi 68 ten hlawhtlinna changin, pass percentage hi za zela 71 a ni a, Lalrempuii Hmar chu pakhatna a ni.
    Zoram Medical College result chhuak chungchangah hian Health Minister Dr. R. Lalthangliana chuan thuchah siamin Zoram Medical College-in chanchin lawmawm tak a nei chu Mizoram tan mellung pawimawh tak a nih thu a sawi a. Sawrkar hmasain theihtawp chhuaha bul a lo tan tawhna ah lawmthu sawiin, Medical College puitlin nan tun sawrkar pawhin theihtawp a chhuah a ni, a ti.

DoNER Minister hovin hmalakna thlirho
Aizawl : April 12 khan sawrkar laipuia Ministry of Development of North Eastern Region (DoNER) enkawltu Minister of State BL Verma hovin Mizoram chhunga DoNER ministry hnathawh chi hrang hrang thlirhona Chief Minister’s Conference Hall-ah neih a ni a. 
    Chief Minister Zoramthanga chuan telpuiin, Planning Vice-Chairman H. Rammawi, Finance Principal Secretary Vanlalchhuanga, Secretary to CM K. Lalthawmmawia bakah DoNER Ministry hnuaia project khawih department aiawh te an tel a ni.

Thiam thil zirna buatsaih khar
Aizawl : April 12 khan School Education Directorate Conference Hall-ah Adult Education-in model centre hrang hranga eizawnna kawnga thiam thil zirna Ramhlun South leh Chawnpui Veng Model Centre-a an buatsaih kharna hun hman a ni a. School Education Minister Lalchhandama Ralte-in khuallian niin he hun hi a hmanpui.
    Minister chuan he hunah hian thu sawiin Adult Education-in skill development lamah huang an zauh a, an hlawhtlinna a lo lang chu lawmawm a tih thu leh zau zawka hma an lak zel a beisei thu a sawi. Zir chhuakte chu an hlawhtlin leh hlawhtlin loh anmahni kutah a awm dawn a, teirei peih ni tur te, taimakna leh tumruhna nei a, hmathlir fel tak nei turin a fuih a ni.

National Webinar Aizawl a neih a hmanpui
Aizawl : Agriculture Minister C.Lalrinsanga chuan April 13, 2023 khan “National Webinar on Awareness and Use of Information and Communication Technology among the Farmers of Mizoram,” Aijal Club, Aizawl a neih chu a hmanpui.
    He inkhawm ah hian khuallian Minister C.Lalrinsanga chuan ICT kaltlanga loneitute chawikanna programme a a tel chu lawmawm a tih thu a sawi a. ICT hmanraw chi hrang hrang chu Mizorama loneituten an hmang chho zel a ni, a ti a. Hei hi loneitu tam takin an hmang tangkai tan hle a, lo neihdan kalphung pawh zawi zawi in a siam tha chho zel a ni, a ti.

Biate leh Bungzung inkar kawng hawng
Aizawl: Home Minister Lalchamliana, Hrangturzo Assembly Constituency bialtu MLA chuan April 13, 2023 khan Biate leh Bungzung inkalpawhna kawngpui siam chu a hawng.
    Home Minister Lalchamliana chuan a bial chhung Biate khaw mipuite ngaih pawimawh leh nghahhlelh em em, Biate atanga Bungzung panna kawng laih tlanga hawn fel a ni ta chu lawmawm a tih thu a sawi a. Biate atanga Bungzung panna kawng hawn tak chu Biate leh Bungzung mai bakah Champhai lam thleng pawha inkalpawhna tangkai tak a nih zel a beisei thu a sawi.

Mitdel hawrawp-a chhut SCERT text books hlan
Aizawl : Social Welfare & Tribal Affairs Minister Er. Lalrinawma chuan Tribal Art Centre, Tanhril ah Mizorama a vawikhatna atan mitdel hawrawp-a chhut, SCERT text books hlanna hun April 13, 2023 khan an hmang.
    He hunah hian Er. Lalrinawma chuan Mizoram tan ni chhinchiah tlak tak kan hmang a ni a ti a. A vawikhatna atan Mizoram chhung ngeiah mitdel hawrawp (Braille) a chhut, zirlai bu buatsaih fel a ni thei hi rualbanlo te hmakhua ngaihtuah tu Department changtu ka nih ang pawh in ka lawm a ni, a ti.