The Week That Was

The Week That Was on April 18, 2021

Admin - Apr 17, 2021

The Week That Was on April 18, 2021

COVID-19 DINHMUN THLIRHO
April 15, 2021 khan SAD Conference Hall, MINECO ah Mizoram COVID-19 dinhmun thlirho a ni a, he hun hi Health & Family Welfare Minister Dr. R. Lalthang--liana'n kaihruaiin, Home Minister Lalchamliana, MOT Chairman Dr. ZR Thiamsanga, MLA, Chief Secretary Lalnunmawia Chuaungo bakah COVID-19 dona kawnga hmalatu department hrang hrang hotute, Indian Medical Association (IMA) leh Mizoram Kohhran Hruaitute Committee aiawhte an tel.

VACCINE PE TURIN THUPEK CHHUAH
Sawrkar Laipui atanga hriattirna angin  April 15, 2021 khan Mizoram Sawkara Health Special Secretary chuan thupek a chhuah a. Rang taka mipui mimirin COVID-19 vaccine an lak theihna turin vaccination programme-a thawktu te zawng zawng chu sawrkar leh private Covid Vaccination Centre ah Pathianni tih loh nitin April, 2021 chhunga vaccine pe turin a hriattir

PMVDY
Cooperation Minister C.Lalrinsanga chuan April 15, 2021 khan a pisaah tlangmi, ramngaw tharchhuaha innghat kuthnathawktute tana buatsaih Prime Minister Van Dhan Yojana (PMVDY) thawhkhatna Mizorama kalpui dan te thlirin Cooperation Department hotute nen meeting an nei. Van Dhan Scheme hnuaiah hian Self Help Group te thawk hovin Van Dhan Vikas Kendra (VDVK) engemawzat din a ni a

PM leh Governor te 
April 15, 2021 zan dar 6:30 leh dar 9 inkarah khan Prime Minister Narendra Modi chuan Covid19 hrileng dona kawng leh hri danna kalpui mek chungchangah State Governor te Video Conference kaltlangin hmalakna kal mek leh hmalak zel dan tur te a sawipui a. Governor P.S.Sreedharan pawh he hunah hian a tel a ni.

THU PAWIMAWHTE NGAIH-TUAH HO
Chief Minister Zoramthanga hoin 14.3.2021 khan H&FW Minister Dr. R. Lalthangliana leh H&FW officer bakah Finance officer te nen Covid19 thawh hnihna laka mipui himna tura hmalakna pawimawhte CM office meeting room ah an sawiho.

Fire Service DayFire Service Day/ Martyrs Day pualin Fire & Emergency Services Headquarters, Aizawl-ah April 14, 2021 zing khan programme neih a ni a. Aizawl pawn lama Fire Station te pawhin hemi ni vek hian hun an hmang.

SLOGAN CHHIAR HO
April 14 kha India ram Danpui duang chhuaktu Dr.B.R.Ambedkar-a piancham ni a, amah hriat rengna pualin sawrkar department hrang hrang ten mahni office ah India Constitution Preamble chhiar hona hun an hmang a. Mizoram Secretariat officer leh staff te chuan Preamble chhiar hona hi Lalnumawia Chuaungo IAS, Chief Secretary hovin Secretariat building kawt tualah hun an hmang.

FOCUS, MIZORAM
April 13, 2021 khan Agriculture Minister C. Lalrinsanga chuan FOCUS Project Review Meeting chu a pisa-ah hmanpuiin, Khuallian a ni a. H.Biakzaua, MLA leh Vice Chairman, Agriculture Development Board chu Khualzahawm a ni.

MSFC leh Minister
April 13, 2021 khan Mizoram State Food Commission (MSFC) member-te chuan an chairman thar H.L. Rochungnunga hovin Supply Minister K. Lalrinliana chu a pisa ah an hmu. Minister K. Lalrinliana chuan  Mizoram State Food Commission member-te chu Commission Chairman leh member-te a bikima kan nei thei ta chu lawmawm a tih thu a sawi.

ASF
SAD Conference Hall, MINECO ah AH&Vety Minister Dr K.Beichhua hovin April 13, 2021  khan African Swine Fever chungchanga hmalak dan tur ngaihtuahin meeting pawimawh neih a ni a. Report dawn chinah nimin thleng khan Mizoram chhung hmun hrang hrangah vawk pul hri avang hian vawk 771 an thi tawh a ni.

Rs. 10,05,000/- HLAN.
April 12, 2021khan Robert Romawia Royte te nupa chuan Chhinga Venga an chenna inah WBC World Youth Boxing Champion Lalrinsanga Tlau hnenah,  lawmpuina thilpek atan an chhung-kua leh țhianțha ten an thawh khawm Rs. 10,05,000/- (Cheng nuai sawm leh sangnga) an hlan.

hridanna chak zawka pek
 Aizawl DC’s Conference Hall-ah Dr Lalhriatzuali Ralte, Aizawl District kaihruaina hnuaia Covid-19 hridanna pekchhuah mek chungchang te April 12, 2021 khan thlir ho a ni a. Aizawl District chhung bikah Covid -19 Vaccine tam zawk a lo thlen hun atana hmalakna kalpui dan tur te pawh rel a ni.

HEALTH OFFICIAL-TE MEETING NEIH PUI
April 12, 2021 khan Mizorama COVID-19 hri lo pung thar leh thut chungchangah Health Minister Dr. R. Lalthangliana chuan SAD Conference Hall-ah Health Department Officers-te a Meeting pui a. Health department anga an lo inpuahchah leh inbuatsaih dan tur relin, Mizoram hmun hrang hranga kan lo inbuatsaih dan tur te, hmalak mek chungchang te, vaccine indaih loh leh pek chungchang te, thawktu (manpower) indaihlohna leh lirthei indaihlohna phuhruk dan turte an sawiho a ni.