NCPR portal inzirtirna hun hmang
Aizawl : March 27, 2023 khan National Commission for Protection of Child Rights leh Mizoram Commission for Protection of Child Rights tangkawp buatsaihin ni khat awh NCPR portal chungchang zirhona hun hman a ni a. Social Welfare Minister Er. Lalrinawma chu khuallian a ni.
    Er. Lalrinawma chuan naupangte, hmangaih leh duat taka kan enkawl tur ten tharum thawhna te, mipat hmeichhiat kawnga khawih khawloh te an lo tawk thin chu a lungchhiatthlak tak zet a ni, a ti a. Chaklo leh humhim ngai zawk, naupangte leh hmeichhiate hamthatna hi sawrkar pawhin a ngai pawimawh a, workshop a tel ten tangkai takin hun hmang se, rampum nghawng ngei se a duh thu a sawi. 

SEDP Executive Board thukhawm
Aizawl : SEDP Executive Board Chairman, Deputy Chief Minister Tawnluia hovin March 27, 2023 khan SEDP Executive Board chu Aijal Club ah Family Oriented SEDP Phase 2 kalpui dan tur chungchang leh Phase I kalpui mek thlirin an thukhawm.
    Meeting kaihruaitu Deputy Chief Minister Tawnluia chuan Family Oriented SEDP Phase 2 chu kalpui leh tur a nih thu sawiin beneficiaries 60000 dang thlan leh tura ruahmanna siam fel a nih tawh thu a sawi a. Phase 2 atan hian sum cheng vaibelchhe 300 dah a nih thu leh Phase 2 hi August ni 30 ral hmain tanpuina 2nd Instalment sum chu pek tlak vek tur a nih thu a sawi lang. Phase I a beneficiaries tam zawk te pawhin tanpuina sum second instalment Rs. 25,000 theuh an account ah an dawng mek tiin a sawi a. Sum leh pai renchem a ngaih avangin Phase 2 a Administrative Cost tih hniam rawtna te chu thil tul tak nia a ngaih thu a sawi bawk.

Governor hovin Sangha tharchhuah chungchang sawiho
Aizawl: Governor Hari Babu Kambhampati chuan Raj Bhavan-ah March 27, 2023 khan Fisheries Department hotute a kawm a. Fisheries Department hnuaia hmalakna leh Mizorama Blue Economy kalpui dan te sawi ho a ni.
    Meeting-ah hian Fisheries Department aiawhin Laldawngliana, Secretary ; F. Vanlallawma, Director leh senior official te an tel. PowerPoint hmangin Fisheries Department hmalakna kal mek leh Blue Economy - lui luang, dil, tuikhuah leh a dangte fisheries kaihhnawih eizawnna atana siam tura hmalakna kal mek te thlirho a ni bawk.

Art and Culture Minister hovin World Theatre day hmang
Aizawl : March 27, 2023 khan World Theatre Day chu Assembly House Annexe, Conference Hall ah hman a ni a.
    He hun hmanpuitu Art and Culture Minister R Lalzirliana chuan he hun buatsaihtu Mizo Drama society chu pawl naupangte nimahse pawl changtlung leh hma la chak tak an ni, a ti a. UNESCO chuan 1948 khan International Theatre Institute a din a, he pawl hian 1962 atangin  World Theater Day hi an hmang tan a ni, a ti.

Inter District Junior Boys football hawng
Aizawl : Mizoram Football Association leh Kolasib District Football Association tangkawp buatsaihin March 27, 2023 khan Diakkawn YMA Hall, Kolasibah Inter District Junior Boys (Under 17) Football Championship 2023 chhuih hawnna chu Minister K.Lalrinliana hovin hman a ni. 
    Khuallian Food, Civil Supplies & Consumer Affairs Department minister K.Lalrinliana chuan MFA leh KDFA hmalakna a Mizoram chhung a district zawng zawng football hmanga inelna felfai leh thianghlim huaihawt thei a Kolasib district thlan a ni chu lawmawm a tih thu sawiin hriselna ngaih pawimawh leh ruihhlo lak a fihlim tur a inthunun theihna nei tura intihhmuhna hun tha hmang turin infiammi kalkhawmte chu a chah.

National Conference on Tourism-ah Robert Romawia Royte
Aizawl : Ni 2 awh National Conference on Tourism in Mission Mode, New Delhi-a March 28-29, 2023-a neihah Tourism Minister Robert Romawia Royte a tel.
    Union Tourism Minister G Kishan Reddy leh Union Minister of State for Tourism Ajay Bhatt leh Sripad Naik te bakah State Tourism Minister hrang hrang te bakah Tourism Industry-a mi pawimawh dangte he huna hian an tel. Robert Romawia Royte chuan Mizoram-in Responsible Tourism Policy 2020 a lo neih tawh hmanga responsible & sustainable tourism chu thingtlang khaw hrang hrangah kalpui a nih mek thu te, Ministry atanga tourism infrastructure development te hmangin Mizoramah nasa zawka tourism hmasawnna kalpui mek a nih thu a sawi a, Tourism Department chuan mirethei te thleng phak hmasawnna a neih a ngaih thu a sawi bawk.

AR insawnfel tur thu Union HM-in MP (LS) hrilh
Aizawl : MP (LS) C.Lalrosanga chuan March 29 khan Union Home Minister Amit Shah chu a pisa ah a hmu a, Union Home Minister chuan C.Lalrosanga hnenah hian Aizawl atanga Zokhawsanga Assam Rifles an insawnfel vek tur thu a hrilh.
    C. Lalrosanga chuan Amit Shah chu Assam Rifles an insawn chhuah dawn avanga a lawmthu hrilhin, hemi chungchangah hian amah leh Central sawrkar hruaitu dangte pawh vawi engmawzat alo nawr tawh thute a sawi a, Sawrkar laipui laka an thil ngiat tihhlawhtlin a nih dawn takah chuan Chief Minister Zoramthanga pawh a lawm hle a ni tih Union Home Minister chu a hrilh a. Assam Rifles hi hun bituk chhunga insawnfel vek tura an duh thu a sawi chu chhangin Amit Shah chuan an insawn ngei ang a ti.

CM hovin ALL India Police champion lawm
Aizawl : 71st BN Mullik Memorial All India Police Football Championship 2022-23 a Mizoram Police an champion chu 29.03.2023 khan 1st Bn. MAP Ground, Armed Vengah lawm a ni. Chief Minister Zoramthanga chu khuallian niin Home Minister Lalchamliama chu khualzahawm a ni.
    Chief Minister Zoramthanga chuan All India Police te football intihsiakna a champion Mizoram Police football player te leh anmahni buaipuitu te chungah a lawmpui thu a sawi a. Mizoramin state nihna a chan tirh a ramchhung mi tam takin Mizoram chungchang an hriat loh thin ngaihtuah chuan football leh infiamna discipline hrang hrangah champion nihna kan chang fo ta chu thil lawmawm tak, Mizoram hmingthatna a nih thu a sawi. 
    Chief Minister chuan ram leh mipui tana Mizoram Police te hnathawh leh hmalakna te sawilangin, an inpekna chungah lawmthu a sawi a. Mizoram chu thenawm ram nena ramri intawm a nih avanga dan phalloh hrang hrang tawlhluhna kawnga hman a nih dan te, chumi do let a lo dan hna chu thil pawimawh tak a nih thu leh hengah hian Police te an pawimawh hle tih a sawi bawk.

LMC inthlang zo, 74.26% vote tla
Aizawl : 1st General Election to Lunglei Municipal Council 2023 chu March 30, 2023 khan Lunglei Municipality area huamchhunga polling station 44-ah neih niin tluang taka zawhfel a ni a, vote 74.26% a tla. 
    LMC Electoral Roll-ah hian Voter 40,548 (mipa – 19,123, hmeichhia – 21,425) an awm a, vawiin polling ah hian vote 30,111 (postal ballot tiamin) za zelah 74.26 a tla a ni. Luangmual Polling Station chu zo tlai berin zan dar 7:30 ah an zo fel a ni. 

National Paragliding Training Programme hawng
Aizawl : March 29, 2023 tlai khan National Paragliding Training Programme hawnna neih a ni a. James Lalrinchhana, Deputy Commissioner, Champhai District chu Khuallian niin training programme hi a hawng.
    Khuallian James Lalrinchhana chuan India rama National Paragliding Training Programme hmasa ber Mizoram a neih a ni leh Champhai-a nghah a ni chu lawmawm a ti a; thalaite zingah chona nasa tak a thlen a beisei thu sawiin state hrang hrang sawm pahnih (12) atanga kalkhawmte chu lawmin, Paragliding Pilot hlawhtling ni theuh turin a chah. 

Lal Nikuala Lungphun hawng
Aizawl : Deputy Chief Minister Tawnluia, Tuichang bialtu MLA chuan March 30 khan Lal Nikuala Lungphun Hawn leh Chawngtlai Khawchhuak Hawrunpui chu khuallian niin a hmanpui a. Chawngtlai Welfare Committee (CWC) leh Mizo Historical Village Society (MHVS) te lehkhabu buatsaih ‘Lal ropui Nikuala leh Chawngtlai Khua’ chu a tlangzar nghal bawk.