A thlenna hotel atangin US khualzin tla hlum

Aizawl : Thawhtanni zan khan US atanga Mizorama zin mipa chu a thlenna hotel atangin a tla hlum.

   Kum 50 mi, Vàn Uk Chung hi Texas atanga Mizorama zin niin Emerald Hotel, Tuikual South-a a thlenna chhawng thumna atangin zan dar 11:30 vel khan a hnuai kawngpuiah tlain a thi a ni.

   He chetsualna chungchangah hian Zalen chuan Aizawl PS biain case I/O chuan rinhlelh tur a awm lova, vanduai chetsualna a nih thu an sawi.

   Police hnen atanga thudawn danin Van Uk Cung hi US khua leh tui nihna nei tawh niin a pa lungphun hmanga lo kal a ni a, Lawngtlai lama lungphun a hman zawh hnuah Aizawl-ah lo kirin April 15, 2025 khan USA pan tura New Delhi lama a thlawh thlak ni tur a ni.

GZRSC zirlaiten nawrh huaihawt

Aizawl : Govt. Zirtiri Residential Science College zirlaite chuan zirtirtu transfer chungchangah April 15, 2025 khan nawrh (silent protest) an huaihawt.

   An zirtirtu (botany) Lalthanpuii Hnamte sawn chhuakin zirtirtu dang dah a ni dawn a, heihi zirlaite zirna nghawng thei thil a ni a, exam dawn hnaih hun tepter lutuk a thil tih a nih avang leh hun hmasa-ah pawh hetiang thil an college-a a lo thlen fo tawh avangin a lungawi thlak loh niin zirlaiten an sawi.

Bike chesualah nula kum 18 mi boral

Aizawl : April 15, 2025 zing khan Zemabawk forest check gate bulah bike a chesual a, a hmunah nula kum 18 mi a boral.

   ZALEN thudawn danin, Zemabawk lam pana tlan bike chu forest check gate, Zemabawk tawngtaina hmun thlang deuh, kawng kual laiah a tlu a, anmahni tawk zawnga tlan truck in bike hnunga chuang Angely Ramngaihawmi (18) d/o J Lalrosanga, Thingsulthliah, Hospital Area chu a chil a, a hmunah ka pawh chhawn loin a boral a ni.

Naupang 2 tuiah an tlahlum

Aizawl : April 14, 2025 tlai thim dawn khan Siaha Meisa Vaih naupang pahnihte chu vanduaithlak takin tuiah an tlahlum.

   Tui tlate hi SN.Lallawmkima (12) S/o SN.Thanzara Siaha Meisa vaih West leh Zakaria (8), S/o LC.Jonasia, Siaha Meisa vaih West an ni a. Anni pahnih hian an chhungte Chhimtuipui, Tuipui Ferry kai a pick up a insu tur motor-ah an chuang ve a. An insukna hi Siaha leh Lawngtlai inkar R. Beinò (Chhimtuipui lui) Leilawn (Seasonal Bridge) chhak a insukna thinah a ni.

   Thu laknain a tarlan danin, an chetsual lai tak hi tuman an hmu lo va, haw tuma an insingsak vel chuan anni pahnih hi an kim lo a ni tih an hre chauh a ni.

   T. Ferry khaw chhungah zualkoin tlangvalhoin an chapal leh thawmhnaw awmna zawnah chuan an rin zawn ta a. April 14 zan dar 8 velah khan an ruang hi inhlat vak loin an hmu ta a ni.

Henry L. Chhundeng leh ZPM sawizawmtute lakah FIR thehlut

Aizawl : ZPM Thalai chuan tun hnaia Heroine Kg 4.722 man neitu-a puh Henry Lalbiakzinga Chhungdeng nena ZPM-in inzawmna nei ang leh ZPM Minister leh Party hruaitute tihhmingchhiat tumna chu tha an ti lo a, thubelhchian dawl lo thehdarhtute hi a tawp thlenga dan hmanga umzui an tum thu an sawi a, April 14, 2025 khan Aizawl Police Station-ah FIR an thehlut nghal.

   ZPM Thalai Vice President Rokhuma chuan, "Ram hlui zia politics changchawitute'n thlalak hlui zawng khawm a, zeldin thubawla dawt phuahchawp hmanga mipui rilru huai kawi thei tura social media-a thu an vawrh darh hi ZPM Thalai chuan kan ngai thutak hle a; ruihhlo tawlhtu hnen atanga ZPM-in pawisa an dawng anga inpuhna phei hi chu ngawih bopui chi-ah kan ngai lo a ni," a ti.

Phawngpui National Park hawng leh tawh

Aizawl : Phawngpui National Park chungchangah Deputy Conservator of Forest, Chhimtuipui Wildlife Division, Lawngtlai chuan thuchhuah a siam a, April 16, 2025 atanga khan hawn leh tan a ni.

   Kangmei chhuak avanga Phawngpui National Park khar lailawk chu kangmei a mih tak avangin 16.04.2025 atang hian tlawh theiha hawn a ni. Phawngpui National Park hi tlawh theiha hawn ni mah se la, thuenitu sang atanga phalna nei an nih loh chuan tumah ni chhuah atana ni tlak thleng (Khaw ên chhung) bâk Park- chhungah an chamban phal a ni lo.

Health Minister Lalrinpuii'n Kulikawn Hospital a tlawh

Aizawl : Health Minister Lalrinpuii chuan April 16 khan khum 50 awmna Kulikawn Hospital a tlawh a, Hospital building thar sakna tur atan ruahmanna a awm mek chungin, mipui te tan tuna a nihna ang ang hian engtin nge tangkai zawka service an pek theih ang tih a hmunah a enpui.

Health Minister hi Dr James RE Mawia, Medical Superintendent leh a hoten an lo dawngsawng a, tun dinhmun ah chuan MUHCS beneficiary - 30 an enkawl tawh a, Bed occupancy - hi a tlangpuiin 52% vel anih bakah, Mizoram a Psychiatry ward nei awmchhun an nih avangin Psychiatry - bed 24 te chu a full deuh reng thu an sawi.

Mizoram State Boundary Committee thutkhawmna nei

Aizawl : Mizoram State Boundary Committee chu an Chairman K. Sapdanga, Home Minister hovin April 16, 2025 khan Directorate of Forensic Science Laboratory Conference Hall, MINECO-ah a vawi 7-na atan an thukhawm.

   Meeting-ah hian Revenue Minister B. Lalchhanzova, Adviser to Chief Minister (Political) Lalmuanpuia Punte, Chief Secretary charge la mektu H. Lalengmawia leh Study Group on Assam-Mizoram Boundary memberte an tel a, Boundary Committee Member zingah ZPM, MPCC, AAP, BJP, MZP, MSU, CYMA, JAC on ILRFD aiawhte telin, ramri chungchanga mithiam sawm bikte leh Home Department official pawimawhte an tel bawk a ni.

LESDE Minister-in Japan a hnathawk tur thlahliam

Aizawl : LESDE Minister Lalnghinglova Hmar chuan April 15, 2025 khan MINECO-a a office-ah India leh Japan sawrkar thawhdunna hnuaia Japan a Caregiver hna thawk tura kal turte a thlahliam.

   India leh Japan sawrkar in Specified Skilled Worker (SSW) programme kalpui turin Memorandums of Cooperation (MoC) an lo ziak tawh a. Hemi hnuaiah hian Kobe International University, Japan leh Mission Foundation Movement te chuan Japanese Language course kalpuiin, he program ah hian Japanese Language N4 thleng a zir theih.

   Zir chhuak te chu Certificate of Eligibility, Ministry of Justice, Japan Government in a pek hnuah working visa pek niin vawiin khan Japan an pan. Hnathawk tura kalte hi Auxiliary Nurse Midwife course zirchhuak pahnih leh Phamacist 1 te an ni.

CM hovin World Art Day 2025 hmang

Aizawl : April 15, 2025 khan I&PR Mini Theatre-ah Mizoram sawrkar leh International Association of Art - India (IAA) tangkawp chuan World Art Day 2025 lawmna leh a pualin National Art Exhibition leh Seminar te an buatsaih a, Chief Minister Lalduhoma, IAA Mizoram Chief Patron chuan a hawng, patron pahnih Art & Culture Minister C. Lalsawivunga leh I&PR Minister Dr. Vanlalthlana te chu khualzahawm an ni.

   UNESCO World Art Day hi lemziak thiam hmingthang Leonardo Da Vinci piancham April ni 15-ah IAA chuan a lawm thin a. Kum 2019 atang khan UNESCO chuan a pawmpui a, UNESCO World Art Day tih a lo ni ta a ni.

Aizawl khawpui chhung kawng thawmthat dan tur sawiho

Aizawl : April 15 khan Secretariat Conference Hall, MINECO-ah Aizawl khawpui chhung kawng thawmthat zelna tur a ruahmanna leh hmachhawpte sawi hovin Coordination Meeting chu an thutkhawm a. PWD Minister Vanlalhlana’n thutkhawm hi a kaihruai a ni.

   Aizawl khawpui chhung kawng thawmthat hna hi thuang hnih a kalpui tur niin Aizawl Road North Division hnuai ah Km 44-a thui leh Aizawl Road South Division hnuai ah km 40-a thui thawmthat tur a ni tih a ni a. Aizawl khawpui chhung kawngpui tam zawk hi Bituminous Concrete (BC) hmang a thawmthat tum niin Thuampui leh Selesih kawng bik ah hi chuan Rigid pavement-a siam that tum a nih thu thutkhawm ah hian tarlan a ni.

Fire Service Day/ Martyrs Day hmang

Aizawl : Kum tina India ram puma April 14-20 chhunga hman thin Fire Service Week leh Fire Service Day/ Martyrs Day chu April 14 khan Mizoramah pawh Fire Station hrang hrangah hman a ni a, Martyrs Day/ Comemmoration Day Parade hi Aizawl ah chuan Fire & Emergency Services Headquarters, Hunthar Vengah hman a ni.

   Kum 1944, April ni 14 khan Indo lawng lian tak 'S.S Fort Stikine' an tih chu Mumbai lawng chawlh hmun a thleng a. He lawng, ralthuam leh bomb lam chi tam tak phur hi a kang ta vak mai a. He kangmei chhuakah hian Bombay Fire Brigade mi 66 leh Bombay Salvage Corps mi 11 kangthelh tute chuan an nunna an chan phah a. Heng mitthi te hriatrengna atan hian Fire Service Day hi April 14-ah hian hman a ni ta a ni.

   He week chhung hian India rama Fire Service te chuan kangmei laka himna tur zirtirna an nei thin a ni. Sawrkar laipui chuan rampum a hman tur in kumtin Fire Service Week thupui a nei thin a. Kumin 2025 Fire Service Week thupui atan hian "Unite to ignite, a fire safe India" tih a thlang.

Lirthei chesualah a driver thi

Aizawl : April 17, 2025 zing dar 5:30 vel khan Keifang bulah lirthei a chesual a driver mipa kum 25 mi a thi.

   Saitual police station atanga ZALEN thudawn danin, lirthei chesual hi Mahindra V 20 niin, bungraw phur a ni a, a driver Gospel Lalremruata (25) s/o Haukhama, Champhai Zion Veng chu a hmunah a thi a ni.

   Chetsualna thlenna hmun hi Saitual atanga Champhai lam, km 9 bawr velah a ni.

NGO ten Union Home Secretary hoin ramri hung chungchang sawiho

Aizawl : April 15, 2025 (Thawhlehni) tlai khan Ministry of Home Affairs North Block New Delhi-ah, Mizoram-a NGO hrang hrang - CYMA, MHIP, MZP leh MSU bakah ZoRO aiawh ten Home Ministry ruahmannain Union Home Secretary Govind Mohan hovin Meeting an nei a. FMR leh Border Fencing chungchang sawiho a ni.

   Union Home Secretary chuan, Mizoram leh Myanmar inkar hung tura hmalaknaah Mizoram Civil Society (NGO) te thlawpna an beisei tih a sawi a. Dodal lo hram turin a ngen.

   NGO hruaitute chuan, FMR leh Border Fencing chungchângah hian NGOCC anga ngaihdan awmsa an sawi chhuak a, a tul anga a ram mipuite ngaihdan leh duhdan ngaipawimawh thiam turin an ngen.

   Union Home Minister Aizawl lo zin laia a sawi, Lengpui Airport, Airport Authority of India (AAI) kuta hlan chungchang hmalak tawh dan an zawt a. Mizoram a Drugs hluar lutuk chungchang, Mizoram a Foreigner luh phalna P.A.P chungchang leh pawl hrang hrang hmachhawpte an sawi nawn a ni.