MPSC office kawtah pungkhawm

Aizawl : MPSC Staff thenkhatte office an kai luih avangin April 16, 2024 dar 5:30 khan MPSC Office kawtah MZP hruaitute pungkhawm.

   MZP thuchhuah tarlan danin, MPSC hna lakah thil diklo a awm ngeia MZP-in a hriat avanga, MPSC Office kai tur ni hnih chhung dan a nih hnuah, Sawrkarin Inquiry Officer a ruat a. MZP chuan Inquiry Officer chu ring tawkin, tha taka hna a thawh theih nan MPSC Office kawta punkhawm chu a titawp rih a ni.

   MZP hruaitute haw hnu dar 3 velah MPSC Controller of Examination (COE) Zosangzuali Pachuau chuan a staff-te office kal tura koin, office a hawn tir a. MZP chuan COE hmalak dan hi a hrethiam lovin an pungkhawm ta a ni.

   MZP-in MPSC hnalak hrang hrangah thilfello tam tak awmin a hria a, hma a lak mek laia hetiang thil thleng hian an rinhlelh a ti zual bawk.

Special drive chhunzawm zel

Aizawl : Traffic jam avanga mipuiin harsatna an tawh thin sukiang turin Aizawl khawpui chhung leh a kawtchhuah kawngpui dung (black top) rapa lirthei dah hnawkte thianfai tura traffic police-ten special drive an kalpui mek chu April 17, 2024 khan neih leh a ni.

   Kulikawn Ngaizel lam atanga bul tan niin a hlawhtlinna an hmu mek zel a, hemi atana Kulikawn Local Council hruaitute thlâwpna leh thawhpuinaah lawmthu an sawi.

   Tun dinhmunah Upper Republic atanga Sikulpuikawn, Mission Veng panna kawngpui dunga lirthei dah hnawkte Mission Veng leh Upper Republic Local Council hruaitute nena tanghoin enfel leh mek.

Governor-in Mizoram ah vote a thlak

Aizawl : Governor Dr Hari Babu Kambhampati chuan tukin zing khan Aizawl South - I Assembly Constituency huam chhunga Polling Booth 2, Government Primary School, Venghlui-ah vote a thlak a. Governor hian MLA inthlanpui hnuhnungberah pawh khan Mizoramah tho vote a thlak tawh a ni.

   Vote a thlak hnuah Governor Dr. Hari Babu Kambhampati chuan media mite chu rei vak lo a hmachhawn a, vote nei thar te leh kum naupangte zawk te ran hruaitu thlannah hian phur taka tela, an duh zawng, state aiawh a Parliament a thu tur, uluk taka thlang turin a sawm nghal a ni. Governor chuan voter te chu MLA inthlan ang tho MP inthlan ngai pawimawh turin a chah nghal bawk.

Kawlphetha leina bill ba pe

Aizawl : Tum khata Kawlphetha leina atana sum pek chhuah tam ber ni turin Rs. Vbc. 81.69 finance department in April 16, 2024 khan a pe chhuak.

   Chief Minister Lalduhoma'n a official instagrame page a a tarlan danin, December, 2023 thleng-a Mizoram pawna Central Power Generating Station atang te leh Transmission Company te, Mizoram chhung Tuirial Hydel Project atang te a Kawlphetha lei tawhna man ba la pek loh tlingkhawm leh, February, 2024 thlenga Vankal Solar Park atanga Kawlphetha siamchhuah lei tawhna man ba la pek loh tlingkhawm, a vaiin Rs. 81,69,49,255/- chu April ni 12, 2024 Zirtawpni khan Mizoram State Finance Department chuan a pe chhuak.

   Hei hi tum khatah Kawlphetha leina atana sum pek chhuah tam ber a la ni a, chumai bakah Power & Electricity Department in Kawlphetha leina man pek tlakna atan thlatin Aizawl North Treasury Office ah Cheque an thehluh tang khang mek te a zavaiin pek tlak vek a ni ta a ni.

MPSC hna lak chhui dawn

Aizawl : Chief Minister Lalduhoma chuan tun hnaia MPSC-in MCS exam a kalpui dan leh Forest Officer a lak danah thil fello nia zirlai hruaitu ten a hnena an thlen chu chhui chian a nih tur thu a sawi.

   April 15, 2024 zana Khawzawl Zaingen YMA hall-a an party campaign ah he thu hi sawiin zirlai hruaitu ten MPSC hna lak danah thil fel lo a awm a ni tih a hnena an thlen chu thil dik lo a awm ngei leh awm ngei loh a sawi theih loh thu sawiin, hetianga thil a kal takah chuan chhui chian a ngai tiin chhui-chianna thupek April 15 vek khan tih chhuah a ni a ti.

   Hemi chungchang chhui tur hian IAS officer pension M Lalmanzuala chu a ruat thu leh ni 7 chhunga report pe tura tih a nih thu a sawi bawk a ni.

Sangha bomb tu police kutah hlan

Aizawl : Maubawk Branch YMA thuchhuah chuan April 18, 2024 zing dar 6:40 vel khan Tlawng lui, Lidung sei, PHE tui pump na chhak lawka Sangha bomb tu Andy Malsawmtluanga S/o Thanvela, Maubawk chu man a ni.

   A kut atang hian Gelatin -3, Detonator -6 leh Fuse bakah thildang man a ni a, Andy Malsawmtluanga hi tun hma pawhin humhalh laiah hian sangha lo man fo tawh nia hriat a ni. Branch YMA chuan FIR thehlutin Andy Malsawmtluanga hi Police hnenah pek a ni.

Police ten ruk ruk thubuai ngah tak man

Aizawl : April 16, 2024 khan Rukruk thubuai hrang hrang pariat (8) nei Vohbik Malsawmdawngzela chu police te chuan an man tih an puang a, thu zawhfiah mek a ni.

   Police thuchhuah tarlan danin, April ni 12, 2024 khan rukruk thubuai a rinhlelh thil-ah Vohbik Malsawmdawngzela (23) s/o Lalrintluanga, Darlung, Zemabawk a khawsa mek nia insawi chu man a ni a, thu an zawhfiahna atangin Aizawl khawpui chhung police station hrang hrangah rukruk thubuai 8 a lo nei tih hriat chhuah a ni.

   Thubuai a neihna hrang hrangte hi rukruk thubuai vek niin, Aizawl PS ah thubuai 2, Bawngkawn PS ah thubuai 5 leh Kulikawn PS ah thubuai 1 a nei. Police te'n a kut atangin ram hrang hrang pawisa leh a thil ruk ni ngei a hriat bungraw thenkhat an man tel.

CM hlui fapa dawta puhtu puang

Aizawl : Kolkata Ballygunge Mizoram House leinaa inhnamhnawih anga puh a nihnaah Chief Minister hlui Zoramthanga fapa Ramthiansiama chuan January ni 18, 2024 khan H.T. Lalmawizuala, Judicial Magistrate 1st Class, Aizawl District Court-ah Criminal Complaint a thehlut a “Criminal Complaint No. 10 of 2024 dt. 22.01.2024 u/s 190 Cr.PC” hmangin Case Register a ni.

   Court chuan Officer-in-Charge, Cyber Crime Police Station Aizawl hnenah chhui chiang turin a hriattir a. Cyber Crime chuan March ni 26, 2024 khan an chhui zawh­na ‘Investigation Report’ chu Court-ah an submit. Hemi chung­changa thu thehdarh (post) siamtu chu Zosangzuala (Sena Zote) Phullen khua chu an hmawr bâwkna a ni tih April 17, 2024 khan puan a ni.