Ngopa VC kutah NDSPSVP Award

Aizawl : India ram pum huap Gram Panchayat (Village Council) hna thawk thate inelna neih zawh takah Ngopa Village Council, Saitual District, Mizoram chuan Nanaji Deshmukh Sarvottam Panchayat Satat Vikas Puraskar (NDSPSVP) lawmman pakhatna an dawng.
    India ram President Droupadi Murmu hnen atangin lawmman hi Dt.17.04.2023 khan New Delhi ah an dawng a ni. India ramah Gram Panchayat 255000 aia tam mah an awm a, chung zingah chuan Ngopa Village Council hian India ram pum huap lawmman pakhatna an dawng a ni.
    Lawmman hian thuziak mawi leh pawisa fai Rs.1,50,00,000/- (Cheng nuai za leh sawmnga) a keng a. Lawmman semna hmun hi Plenary Hall, Vigyan Bhawan, New Delhi ah niin lawmman semna Programme hi neih a ni.

US Consul General & Governor

Aizawl: Consul General Melinda Pavek, U.S. Consulate General, Kolkata (India) hotulu ber chuan Governor Hari Babu Kambhampati chu April 18 khan Raj Bhavan-ah a kawm.
    Governor chuan Consul General Melinda Pavek leh a naut e chu Mizoram an rawn tlawh avangin lawmthu a hrilh a. US Palai Melinda Pavek hnenah hian Mizoram a rawn tlawh chhan leh a rawn ngaih pawimawh deuh te pawh a zawt bawk a ni.

Hospital Disaster Management Planning

Aizawl : Health & Family Welfare Department, GoM chuan GeoHazards International (GHI) leh GeoHazards Society (GHS) te nen tangkawpin Directorate of Health & Medical Education, MINECO-ah ni 2 chhung awh ‘Hospital Disaster Management Planning’ tih training programme chu April 18 leh 19, 2023 chhung khan Directorate of Health & Medical Education Auditorium-ah an buatsaih.

CM leh US Consul inkawm

Aizawl: April 18 khan Chief Minister Zoramthanga chu a Chenna CM bungalow ah Consul General Melinda Pavek, U.S. Consulate General, Kolkata (India) hotu ber chuan hmu in an inkawm.
    US Consul General chuan Chief Minister hi ei leh bar, zirna leh environment lama Mizoram dinhmun chungchang te zawtin, Mizoram hmathlir te Chief Minister chuan a sawipui a. Thenawm ram Myanmar leh India inlaichinna te sawidun bawkin, khawchhak atanga ruihtheih thil lo thlengin khawtlang nun a nghawng dan te an sawi dun bawk.

NEP-2020 Symposium hawng

Aizawl : Sawrkar laipui Union Cabinet thukhawmin 2020-a a lo pawm tawh National Education Policy (NEP) zirhona ni-2 awh tur chu April 18 khan Mizoram Rural Bank Auditorium Hall, MINECO-ah hawn a ni. 
    He symposium hi Planning & Programme Implementation Department, Higher and Technical Education Department leh School Education Department tangkawp buatsaih niin School Education Department changtu Minister Lalchhandama Ralte chuan hmanpuiin a hawng nghal.

Health Minister leh US Consule

Aizawl : Consul General Melinda Pavek, U.S. Consulate General, Kolkata-a an hotulu ber chuan Health Minister Dr. R. Lalthangliana chu April 18 khan MINECO Confernce Hall-ah a kawm.
    Higher & Technical Minister Dr. R. Lalthangliana chuan Consul General Melinda Pavek ten Mizoram an lo tlawh chu a lawmawm hle a ni, a ti a. Mizoram chu Bangladesh leh Myanmar te nen ramri thui tak intawmin, hei hian ramdangte nena insumdawntawnnaah kawngro thui tak a su a ni, a ti bawk.

Mi 123 hnenah Incentive Cash Award hlan

Aizawl : Directorate of Sports & Youth Services Department buatsaih 'Incentive Cash Award 2020-2021' semna inkhawm chu April 18 zan khan Vanapa Hall-ah neih a ni a, Sports Minister Pu Robert Romawia Royte chu khuallian niin Award semna a nei a ni.
    Incentive Cash Award 2020-2021 hi infiamna discipline hrang hrang 11 : Taekwondo, Muaythai, Shooting, Arm wrestling, Table Tennis, Boxing, Motor sport, Sepaktakrow, Kick boxing, Weightlifting leh Football-a medal la te infiammi 109 leh official mi 14, an vaiin mi 123 te hnenah hlan a ni a. Heng discipline te medal lak zat hi 199 a ni a, tun tuma Incentive Cash Award sem zat hi a vaiin Rs 44,88,150 niin kum 2020-2021 chhunga medal dawngtute hnenah Rs 22,88,150 leh kum 2022-a buatsaih Khelo India Youth Games 2021-a tel medal dawngtute hnenah Rs 22,00,000 pek a ni.

ADDMA te thukhawm

Aizawl : Aizawl District Disaster Management Authority (ADDMA) chu sawrkar kum thara a vawikhat nan April ni 18, 2023 (thawhlehni) khan S.P’s Conference Hall, Treasury Square-ah an thukhawm a. Meeting hi Dr Lalhriatzuali Ralte, Deputy Commissioner & Chairman, Aizawl District Disaster Management Authority in kaihhruaiin S.P, Aizawl, Addl D.C, Aizawl te bakah D.C office Officers te leh PWD, PHED, AMC, DRDA, CMO, Civil Hospital, Aizawl aiawh te an tel a ni.

P&E minister hovin NE Regional Power Committee

Aizawl : Power & Electricity minister R. Lalzirliana chuan Thenzawl Golf Course & Resort Convention Centre-a 48th Commercial Coordination Sub-Committee Meeting of North Eastern Regional Power Committee hawnna inkhawm chu April 19 khan khuallian niin a hmanpui.
    R. Lalzirliana chuan Electricity chu mitin mamawh thil pawimawh a nih avangin Power Supply hnianghnar neih hi kan mamawh em em a. Mizoram sawrkar pawhin mipuite mamawhna phuhru turin power siamtu Company te nen indawrna a kalpui reng a, kumtin power supply engemawzat kan lei thin a ni. Heng power kan leina sum leh pai pek thuah hma an sawn thu leh theihtawp an chhuah thu a sawi.

MADC Village Council Election result

    Mara Autonomous District Council huam chhunga Village Councils General Election vawi 15-na tluang taka neih zawh a ni.
    State Election Commission chuan 23.03.2023 a Mara Autonomous District Council huam chhunga Village Council inthlanpui neih ni tura a ruat 18.04.2023 ah inthlanna tluang taka neih a ni.
Village Council Constituency : 99
Political Party, Independent, etc.VC lak zat:
Bharatiya Janata Party : 41
Indian National Congress : 8
Mizo National Front : 25
Zoram People’s Movement : 2
Independent : 1
No Majority : 22

Leitan, ITI Veng & Zemabawk Local Councils by-election result

Aizawl : Aizawl Municipality huam chhunga Durtlang Leitan leh ITI Veng Local Council member pakhat ve ve-te hmun a ruak leh Zemabawk Local Council dissolved avanga Inthlanna chu ni April 19, 2023 khan neih a ni a. Vote tlak dan leh result chu hetiang hi a ni.
    Durtlang Leitan, Zemabawk leh ITI Veng Local Council Inthlanna ah hian Polling Station 15-ah vote 9154 tlain, vote tla hi za-zelah 62.63 a ni. 
    Durtlang Leitan, Zemabawk leh ITI Veng Local Council member tur mipuiin an thlante chu hengte hi an ni. 

Durtlang Leitan
1. H. Lalbiakkima, ZPM
Zemabawk
1. Lalhmunsiama, ZPM
2. P.C. Lalnunkima, ZPM
3. Lalramhluna, ZPM
4. P.C. Vanlalngaia, ZPM
5. Zosangliana, ZPM
6. Lalmuanpuii, ZPM
7. Tlangkungi Tochhawng, ZPM
ITI Veng
1. Lalpianmawia, MNF

Solid Waste Management chungchang DC hovin sawiho

Aizawl : Dr. Lalhriatzuali Ralte IAS, Deputy Commissioner, Aizawl District hovin April 20 khan Solid Waste Management chungchanga mipuite inhrilhhriatna nei tura ruat Special Task Force te an thukhawm. 
    Meeting ah hian Information & Public Relations Department, NSS, DDK, AIR, MJA leh Biodiversity Conservation Network (BIOCONE) te an tel a ni. Meeting-ah hian bawlhhlawh thliar hran dan tur te leh Single Use Plastic hman chungchangah te zirtirna pek dan tur sawiho a ni. Bawlhhlawh paih dan inzirtirna hi zirna inah kalpui mek a ni.

MIGASTU khawmpuiah CM

Aizawl : Chief Minister Zoramthanga chuan 20.4.2023 khan MIGASTU (Mizoram Govt. Adhoc Aided School Teachers' Union) Inkhawmpui lian, Vanapa Hall-a buatsaih chu khuallian niin a hmanpui.
    School Education Minister Lalchhandama Ralte chu he hunah hian khualzahawm a ni. MIGASTU hnuaiah hian Mizoram khaw hrang hrangah High school 129 leh Middle School 64 awm mekin, thawktu mi 1300 an awm mek a ni.
    Chief Minister chuan hun reilo te ah adhoc school thenkhat chu provincialise tum a nih thu a sawi a. MIGASTU pawlin sawrkara an thil beisei an thlen te chu a theih leh remchan dan ang zela a hlawhtlinna tur dap a nih thu sawiin, adhoc aided school te provincialise chungchangah sum dinhmun zirchiang zel chungin school provincialise tura hmalakna hi a tahtawl zela kalpui tum a nih dan a sawi.