Ruatfela Nu in FIR thehlut

Aizawl : April 26, 2024 khan Social Activist Ruatfela Nu in chhun pachanga septic tank ni ngeia lang sah chungchang chhui a, a titute lak a dan anga action la turin FIR a thehlut.

   Ruatfela Nu in Aizawl Police Station a FIR a thehluh a a tarlan danin, ni 25.4.2024 (Ningani) chawhma dar 11:05 vel khan Sikulpuikawn atanga Mission veng chhukna, Theipalingkawh road ah chhun pachangah septic tank ni ngei a lang paih an awm a. He thil titute hian an mihring puite engatan mah an ngai lo a, khaw eng pawh zah loin mipui tawrhna an thlen a ni. Septic tank sah ni ngeia lang hi chhui chiang a, a titute chunga dan anga action la ngei turin a ngen tih a tarlang.

   He thil hi a hriat veleh tawngka/phone call in police a hrilh a, a hmuna an kal nghal tur thuin an chhang a, FIR hian a um zui leh a ni.

Kuhva ro leh a neitu a puh mi 3 an man

Aizawl : Custom Preventive Force, Champhai leh Assam Rifles ten April 24, 2024 khan Rs. Vbc. 1.14 man hu kuhva ro an man.

   Customs leh AR te hian 24.4.24 khan Champhai Tlangsam ah dan lova lakluh kuhva ro leh a neitu nia hriat mi 3 an man a, kuhva ro an man te hi bag 205, Rs. Vbc. 1.15 man hu a ni. Kuhva ro leh a neitu nia hriat an man te hi Custom Preventive Force, Champhai kutah hlan an ni.

Kolasib ah chenna in kang

April 24, 2024; Tukin dar 5 vel khan Kolasib Vengthar a chhungkaw pathum luah lai Assam type In, chhawng thum chu bungrua engmah chuh hman loh in a kang a, mihring thi leh hliam erawh a awmlo.

   In kàn chhan hi hriat chian nilo mah se, a chung ber luahtu te in a eichawp dawr te atanga kang tan ni a hriat ani. Kolasib Fire service te chuan In kang hi theihtawp chhuah in thelh an tum nain, a zualpui chu a kang hman a, a ruangam erawh a kan ral hma in an thelh thei a ni.

   In kang ah hian eirawngbawlna Gas hman lai pahnih a puak tel tih hriat a, hetihlai hian mihring hliam leh thihna a thlenglo a ni.

CYMA in Myanmar raltlan tanpuina a dawng

Aizawl : 22.04.2024 khan Central YMA Office-ah Global Chin (Falam) Organisation hruaitute, Switzerland, USA leh Singapore atanga rawn kal te leh Central YMA hruaitute an inkawm a. Global Chin Organisation hruaitute hian Central YMA hnenah raltlante tanpuina atan Rs.2,00,000/- an hlan.

   Central YMA aiawhin Prof. Malsawmliana, General Secretary in a dawng a, MS Ralte, Fin. Secretary leh R. Lalngheta, CEC te an tel bawk. Inkawmhonaah hian Myanmar atanga raltlante dinhmun chungchangte, ruihhlo chungchangte leh inpumkhatna chungchangte sawiho a ni.

MAL-in Book of the Year - 2023 an hlan

Aizawl : Mizo Academy of Letters (MAL) chuan April 23, 2024 khan kum 2023 chhunga lehkhabu ?ha ber atana an thlan, 'Pangparhnima' tih ziaktu Ahmangaihi Khiangte hnenah 'Book of the year 2023' an hlan.

   BoY hlanna inkhawm ni paha MAL Diamond Jubilee lawmna inkhawm hi Chanmari YMA Hall-ah neih a ni a. Inkhawm hi MAL Ptesident?, Prof. RL Thanmawia chuan a kaihruai a, khual lian Pu JH Zoremthanga, Chairman, MBSE chuan Book of the year lawmman hi a dawngtu hnenah a hlan a. Chawimawina hian thuziak chei (Citation) leh tangka fai Rs. 10000 a keng tel a ni.

   Kum 2023 chhung khan MAL chhinchhiah dan chuan lehkhabu 170 a chhuak a. Heng zingah hian Ahmangaihi Khiangte ziak 'Pangparhnima' tih chu Book of the Year, 2023 atana thlan a ni.

Ministry of Minority Affairs Secretary-in Governor hmu

Aizawl : April 25, 2024 khan Ministry of Minority Affairs, Government of India Secretary K. Srinivas chuan Governor Hari Babu Kambhampati chu Raj Bhavan-ah a hmu.

   Governor leh K. Srinivas chuan Mizoram chhunga minority-te dinhmun an sawi dun a, Central sawrkar hnuaia scheme hrang hrang hmanga hma an sawn theih dan tur te sawi dunin, minority-te kaihhnawih thil pawimawh tak tak an sawi dun bawk a ni.

Adventure Training Course certificate sem

Aizawl : Sports & Youth Services Department chuan 25.4.2024 khan Adventure Training Course chi hrang hrang tunhnaia neihte Certificate semna hun an hmang.

   He programme hi Lalngilneia Colney, Youth Welfare Officer chuan a kaihhruai a. Adventure Course, Rafting and Canoeing Course leh Basic Adventure course camp a tel te hnenah certificate hlan a ni. Adventure course-ah hian mi 29 hnenah Certificate hlan a ni a, Rafting & Canoeing course-ah member 28 ten certificate hi an dawng a, Basic Adventure course-ah mi 20 ten certificate hi an dawng bawk. Certificate hi mi 77 hnenah hlan a ni.

PMJVK chungchangah Ministry of Minority Affairs Secretary hovin nei

Aizawl : April 25,2024 khan Ministry of Minority Affairs Secretary Shri Katikithala Srinivas hovin Secretariat Conference Hall, MINECO-ah thutkhawm neih a ni a. He thutkhawmnaah hian Sawrkar laipui ruahman(scheme), Pradhan Mantri Jan Vikas Karyakram (PMJVK) hnuaia project kalpui tawh leh hna thawhte thlirletna hun neih a ni.

   He hunah hian PMJVK hnuaia hmalakna hrang hrang te sawi ho niin, hnathawh tawhte thlirletna hun neih a nih mai bakah, hma lak zel dan tur te sawi ho a ni bawk. Department hrang hrang in a project a lo kalpui tawh dan te thlir ni in, kalpui zel dan tur sawi a ni. He meeting ah hian department hrang hrang Secretary te an tel a, district tin DC leh sawrkar official hrang hrang te an tel bawk a ni.

AMC office-ah Taxation Department Site Office hawng

Aizawl : Aizawl Mayor Lalrinenga Sailo leh Taxation Department hotute ruahmanna angin April 24 atanga khan Aizawl Municipal Corporation Office ah Taxation Department chuan an Site Office an luah tan.

   Site Office ah hian H Lalramsanga, Assistant Commissioner of State Tax chu 'GST Facilitator' niin, kar tin Nilaini leh Ningani in a thu thin ang, State Tax Officer (STO) pakhatin a pui ang. Site hawnna programme neih niin, Pu C Vanlalchhuana, Joint Commissioner of State Tax & GST Nodal Officer leh Hrangthanmawia, Asst. Commissioner of State Tax & GST Nodal Officer ten thusawina hun an hmang a, Site Office a Officer-in-Charge/GST Facilitator H Lalramsanga, Asst. Commissioner of State Tax pawhin report pekna hun a hmang. He programme ah hian GST Investigation Cell hnuaia STO-te an tel bawk a ni.

2nd Mizoram Film Awards 2024 sem

Aizawl : April 24, 2024 zan khan Vanapa Hall-ah Mizoram Film Development Society leh Information and Public Relations Department, Govt. of Mizoram tangkawpin 2nd Mizoram Film Awards, 2024 an buatsaih a, he hunah hian Dr. Kenneth Chawngliana, Vice Chairman, Mizoram State Planning Board chu khuallian (chief guest) niin Er. F. Sanglura, Executive Engineer, PHE Department chu khual zahawm (guest of honour) a ni bawk.

   Film awards dawngtute:

1) Best Feature Film - Nunna Thar

2) Best Short Feature Film - Zu Vangin Maw

3) Best Horror/Thriller Film - Nutei Thingpui Dawr

4) Best Educational Film - Ka U Liana

5) Best Director - Mapuia Chawngthu

6) Best Action Director - T.C. Lalrinsanga

7) Best Actor - Tommy Rosangliana

8) Best Actress - Ruthy Chenkual

9) Best Supporting Actor - David L. Sangmuana

10) Best Supporting Actress - Dr. Louis Hauhnar

11) Best Child Artiste - Samson Vanlaltanpuia

12) Best New Actor - Zohmingliana

13) Best New Actress - Florence Vanlalhriatzuali

14) Best Villain Actor - Aaron Malsawmdawngzuala

15) Best Villain Actress - Assy Chhangte

16) Best Male Comic - Zorammawia

17) Best Female Comic - H. Zorampari

18) Best Costume - Laltheri

19) Best Make-up - Nunna Thar

20) Best Cinematography - The Ghost Hunter

21) Best Editing - Nunna Thar

22) Best Script Writer - C. Hmingthangvunga

23) Best Dialogue - P.C. Lallawmzuali

24) Best Original Soundtrack - Laltheri

25) Best Music Video - Wendy Zaithanpuii

26) Lifetime Achievement - Lalawmpuia Khiangte

MSPMC hnuaia Lengpui Airport-a hmalakna endik

Aizawl : Mizoram State Project Monitoring Committee (MSPMC) hmalakna hnuaiah an Vice-Chairman R. Lal Rinawma, IRS (rtd) kaihhruaiin Lengpui Airport a hmalakna hrang hrang awm mekte chu April 23, 2024 khan endikna neih a ni.

   MSPMC Vice-Chairman R. Lal Rinawma chuan Lengpui Airport a hmunhma hrang hrang, a bikin building, electricity leh kalkawng chungchanga hmalakna awm mek te chu endikna a nei a. Hmasawnna la awm theih dan tur leh project awm laite changtlung leh chak zawka kalpui anih theih dan tur officials hrang hrangte nen a hmunah enfiahin an sawi ho a ni.