Thlanmual hmasa ber thlah

Aizawl : Mizorama thlanmual hmasa ber nia hriat, Venghlui Thlanmual thlahna hun chu March 31, 2025 tuk khan Venghlui leh College Veng Branch YMA huaihawtin thlanmual thlah tak hmunah neih a ni.

   Chhinchhiah danin Venghlui Thlanmual thlah takah hian kum 1922 khan hnam dang (Gorkhali) inawk hlum chu phum a niin he lai hmuna phum hmasak ber a ni a. Sawrkarin kum 1924-a thlanmual nei tura thuchhuah a siam hnuah Mizo zinga phum hmasak ber chu Thangsabuti niin kum 1926 khan phum a ni thung.

   Tun dinhmunah thlanmual chhuahsan takah hian mi 1,601 phum an ni tawh a, heng zinga 1,006 hi mipa niin hmeichhia 595 an awm bawk a. Mitthi zinga 63% hi mipa niin hmeichhia 37% an ni.

   Thlanlung inziak chhiar theih zinga upa ber chu kum 1932 a thi a ni.

Meth Mum 42,000 man

Aizawl : April 1, 2025 zan khan Lawngtlai District-a Bualpui (NG) ramchhung Serzawl kawngah Assam Rifles, Mizoram Police leh YLA te chuan Join Operation neiin Methamphetamine Kg. 4.600, mum 42,000 an man.

   Methamphetamine neitu-a hriat mi 2 chu Bike-in Myanmar lama an tlanchhiat hman avangin man hman an ni lo. An ruihhlo man hi tualchhung hralhnaa chhutin cheng nuai 59 leh sing 8 man hu niin Myanmar atanga Mizoram a pêk tur ni ngeia rin a ni. Assam Rifles lam chuan an thil man hi cheng vaibelchhe 12.54 man nia an sawi

Exotic animal nuai 130 man chuang man

Aizawl : Champhai Forest Division a thawkte leh Assam Rifles tangkawp chuan April 2 khan Zokhawtharah exotic animal chi hrang hrang- ‘The Wildlife (Protection) Act -1972’ kalh a tawlh ruk te an man a.

   Exotic animal tawlh an man te hi Albino Burmese Python -1 , African spurred tortoise - 27 leh Patagonian mara - 3 te an ni. Heng exotic animal tawlhruk an man te hi international market ah chuan Cheng nuai 130 man vel ni a chhut a ni.

CM-in Zuangtuia PWD hmun leh RIPANS tlawh

Aizawl : Chief Minister Lalduhoma chuan April 3 khan Zuangtui venga PWD hmun a tlawh a, Zemabawka RIPANS damdawiin panna kawng a en bawk.

   Zuangtui khawtlang hian an venga sawrkar Middle School leh Primary School, lei tlahniam huam chhunga awm, thawm that zui zel atana him tawh lo va ngaih sawnna atan PWD ram thenkhat chu ruahman turin sawrkar an ngen a. An dil hmun hma hi Chief Minister hian a en a ni.

   Zuangtui PWD ram School hmun atana Education Department hnena pek thu hi dan anga dilna te thehluh a nih hnuah la ngaihtuah zui tur a ni a. RIPANS panna kawng hi a rang lama siam tur a ni ang.

RDC 2025-a tel Mizo NCC te lawmpuina hlan

Aizawl : Mizoram Larsap, General (Dr) Vijay Kumar Singh, PVSM, AVSM, YSM (Retd) chuan April 3 khan kumin Republic Day lawmna pui ber, New Delhi-a neih taka Republic Day Camp (RDC) 2025 a tel Mizo NCC Cadet 6, mipa 4 leh hmeichhia 2 te chu Raj Bhavan-ah kawmin lawmpuina thilpek tablet a hlan.

   Republic Day Camp 2025-a Mizoram atanga telte hi 1st Mizo Battalion NCC atangin Junior Under Officer Jacksy Lalhlimsangi leh Cadet Laltlanhlua, 2 Mizo Battalion NCC atangin Cadet Asraful Haque Laskar, 1st Mizo Air Squadron NCC atangin Cadet Rohit Kumar, Cadet F. Malsawmtluanga leh Cadet Lalremruati te an ni a. Ngaihhlut hlawh tak Kartavya Path, PM Rally, Line Area leh Youth Exchange Programme (Cultural) ah te an tel a ni.

MUHCS chungchang zirhona nei

Aizawl : April 1, 2025 khan Directorate of Hospital & Medical Education Auditorium, MINECO-ah Mizoram Universal Health Care Scheme (MUHCS) chungchang zir hona hun buatsaih chu Health & Family Welfare minister Lalrinpuii hovin hman a ni.

   Dr. Lalthlengliani, Principal Director chuan hun kaihruaiin District tin a Chief Medical Officer, District Medical Superintendent, Community Health Centre leh Primary Health Centre-ah thawktute an tel a ni.

   Mizoram Universal Health Care Scheme inzirtirna huna kal khawmte chu midangte hnen a MUHCS pawimawhna leh a kalphung zirtirtu tur an nih thu leh he scheme hlawhtlinna tur thui tak innghahna an nih thu hrilh an ni.

Treasury Office pahnihte Financial Year kharna CM-in hmanpui

Aizawl: Chief Minister Lalduhoma, Finance Minister ni bawk te nupa chuan Aizawl Treasury Office pahnihte Financial Year khar ni March 31, 2025 khan an hmanpui a. Vanlaldina Fanai, Finance Commissioner ; Ramchuana, Finance Secretary leh Finance Department hotu dangten an telpui.

   Chief Minister chuan sawrkar kum khar a lo hun leh ta a, Finance Department-a thawktute, Treasury Office hrang hranga thawktute zarah engkim fel fai takin an inching fel thei hi a lawm tih a hrilh. "Kuminah hian Rs. 900 Crore chuang hret kan chhuahpui dawn a, nikumah khan Rs. 500 Crore vel kan chhuahpui thung a. Hei hian kan sum leh pai dinhmun a lo that deuh deuh zia a tilang a ni," a ti.

Faina Hnatlangpui hawnna nei

Aizawl : Central YMA, Aizawl Municipal Corporation leh UD&PA Department te thawhhona a Aizawl khawpui “Faina Hnatlangpui” chu UD&PA Minister K. Sapdanga chuan 31.03.2025 khan Sikulpuikawnah a hawng a. Hemi rual hian YMA Branch Fai Inelna 2025 a khuhhawng bawk. Minister hian CYMA hruaitute hnenah bawlhhlawh bawm lian 300 a hlan nghal a ni.

   CYMA, UD&PA leh AMC te tangkawp chuan kum 2025-26 chhung atan Aizawl khawpui faina kawnga chak zawka hmalak a nih theih nan thawhhona thuthlung an siam a. Chumi hnuaia hmachhawp hrang hrang te zingah Faina Hnatlangpui hi a hmahruaina a ni a. Thawhdunna kal zela YMA Branch Fai Inelna neih turah hian branch hrang hrangte kum khat chhung an inel dawn a ni.

   Vawiin inkhawm hi Prof. Lalnuntluanga, Central YMA Vice-President chuan a kaihruai a. UD&PA bakah AMC leh YMA aiawh hrang hrangte an tel a ni.

UNESCO World Art Day 2025 hman dan tur sawiho

Aizawl : UNESCO World Art Day April ni 15-a lawm turah Mizoram chu Official Host-ah thlan a ni a, he ni lawmna leh hman dan tur atana inbuatsaihna leh hmalak dan tur April 1, 2025 khan Art & Culture Minister C. Lalsawivunga hovin sawiho a ni.

   Meeting hi Office Chamber MINECO ah neih niin, United Nations Educational Scientific & Cultural Organization (UNESCO) in khawvel huapa art hmasawnna atana a thawpui pawl Association Internationale des Arts Plastiques/International Association of Art (AIAP/IAA) hnuaia India-a he pawl hruaitute nen neih a ni.

   World Art Day lawmna atana Mizorama IAA hruaitute Department pali – Art & Culture, Tourism, Information, Public Relations, Printing & Stationery leh Commerce & Industries Department te thawhpui an tum dan chu chipchhiar takin an sawi a ni.

Dr. Vanlalthlana leh NCERT hotute an inkawm

Aizawl : New Delhi-a meeting pawimawh chhim tura kal School Education Minister Dr. Vanlalthlana chuan April 2, 2025 khan Central Institute of Educational Technology (CIET) tlawhin, National Council of Educational Research and Training (NCERT) hotute nen inkawmhona hun an hmang.

   He hunah hian NCERT-in zirna hmanrua pangngai piah lama zirtirna (alternative learning system) an kalpui dante, DIKSHA portal kaltlanga digital education content siama dah chhuah a nih dante bakah zirlai leh zirtirtute tana educational technology hman tangkai a nih dante a hmun ngeiah en hova sawi ho a ni.