A dahna atangin savawm a chhuak

Aizawl : Aizawl Sahuan a savawm dahna hmun enclosure ah thing a tluk luh avangin April 1, 2024 khan savawm a chhuak a , hetihlai hian sahuan chhungah ngei a la awm a, man tumin hmalak nghal a ni a, he thu ziah lai thleng hian an la man lo a, a awmna chu an hre tawh thung.

   Savawm an hmuhna hmun hi sahuan chhungah niin, a tawmna hmun a pik bakah, chet vel a rem lo a, he thu ziahlai thleng hian man theih a la ni lo. Sahuan pawh thu leh awm hma atan khar mek zel a la ni.

Gaza Israel Air Strike-ah Lalzawmi'n nunna chan

Aizawl : April 2, 2024 khan Lalzawmi Frankcom chu Gaza-a Israel Air Strike avangin a boral, ani hi Paul Frankcom leh Lalrinmawii(L) te fa pahnih zinga a upa zawk niin, nau mipa a nei a. A pa hi Australian niin, A nu hi Saitual khawchhuak a ni a, Upa Darthankima (L) Chanmari, Aizawl-a mi farnu Puithluaii (L) fanu a ni.

   Sydney, Australia ah seilian in, World Central Kitchen -ah a thawk a, a hna avangin Bangkok ah a in bengbel a, Asia rama an operation hrang hrang ah hotu niin, Senior Manager hna a chelh mek a ni.

   World Central Kitchen hi Non-profit/ Non-Government NGO niin, khawvel ram hrang hrang a indo na leh chhiatna thlen na hmun a chhiat tawk te hnen ah chaw a thlawn in an sem thin a ni. Zawmi pawh hi chutiang hna thawk tur chuan Gaza ah hian a thawhpui te nen April 1, 2024 khan lut in, a tuk April 2 khan he vanduaina hi a chungah a thleng ta a ni. A ruang hi Australia ah haw pui a ni ang.

Raltlante awmna in 3 a kang

Aizawl : April 3, 2024 chawhma dar 10 vel khan Myanmar raltlan te chenna Lungpuk (Siaha dist.) a In 3 a kang.

   Kangmei a chhuak tih hi helai hnai a duty Assam Rifles te chuan hmuin, a thelh hna an thawk a, vanneihthlak takin mihring thi leh hliam an awm lo.

   AR ten kangmei chhuak an thleh avang hian chhiatna nasa zawk a thleng lo niin AR thuchhuahah tarlan a ni.

KPP pandal ni 4 chhungin sa zo

Aizawl : April 1, 2024 khan Rampum huap kohhran pavalai pawl (KPP) intawhkhawmna tur pandal chu thli in a nuai chhiat vek hnuah, ni li (4) chhungin sak zawh leh nghal a ni.

   ZALEN thudawn danin, East Lungdar a KPP pandal hi mi 5,000 bawr vel lenna tur niin, tun April ni 12-14 chhungin KPP rampum huap intawhkhawmna neih a ni ang.

   Tarlan tawh angin pandal hi March ni 31 khan thli leh ruahin a nuai chhe vek a, a tuk atangin hnatlangin thawh nghal a ni a, East Lungdar bakah a khaw thenawm atangin hnatlangin an pui a, sum faia tanpuina lut pawh thahnemtham tak a awm.

Observers ten Governor hmu

Aizawl : April 4, 2024 khan Police Observer K. Satyanarayana, Expenditure observers Arvind Sharma leh Anita Rinesh te chuan Dr. Hari Babu Kambhampati chu Raj Bhavan-ah an hmu.

   K. Satyanarayana chuan Lok Sabha Inthlanpui 2024 lo awm tura an inbuatsaihnate chu Governor a hrilh a. Governor chuan Lok Sabha MP inthlan lo awm turah hian Mizoramin inthlan hmasaa an lo neih thin anga inthlanna felfai leh thianghlim tak an neih leh theih ngei a beisei thu observer-te a hrilh.

   Governor chuan Mizoram People's Forum chu inthlan felfai leh thianghlim tak an neih theihna atana mawhphurtu pawimawh tak a ni tih sawiin, mipuite pawhin dan leh thupekte an ngai pawimawhin an zawm tha thin hle tih a sawi bawk.

Chief Electoral Officer hovin vote tlak that dan tur sawiho

Aizawl : Vawiin khan Chief Electoral Officer, Mizoram Madhup Vyas hovin April 4, 2024 khan a pisa ah Lok Sabha MP thlan huna vote tla a that theihna tur ngaihtuahin sawrkar hotu pawimawh an thukhawm.

   Chief Electoral Officer chuan India ram inthlanpui lo awm tur hi khawvelin a ngaichangin a thlir thup dawn tih sawiin, khawvela democracy ram lian ber a nih ang ngeiin khawvel mithmuhah entawntlaka awm a ngai a, hemi atana pawimawh chu mipui vote tla a that hi a ni a ti a. A tlem berah MP election hmasa aia 5% tala vote tla a pun theihnan theihtawp chhuaha tan tlan a ngai a ni a ti.

LS-a Home Voting hmasaber Lunglei-ah tan

Aizawl : Election Commission of India (ECI)-in MP (Lok Sabha) Inthlanpui, 2024 lo awm tura vote thlak tura polling station pan thei lo - kum 85 chung lam (senior citizen), Covid-19 vei mek te leh vohbik (person with disability - PwD) te tana postal ballot hmanga mahni in chhung luma vote thlak theih dan (home voting) a ruahman angin Lunglei District chhungah April 4 atang khan postal ballot hmangin vote an thlak ṭan a ni a.

   Lunglei District chu Lok Sabha 2024 Inthlanpuia Home Voting kalpui hmasa ber District a ni a, April 4 khan Zobawk, Rahsi Veng, Rualalung, Buarpui-ah te Home Voting hi kalpui a ni.

General Observer in Assembly Segment officer in charge te kawm

Aizawl : 03.04.2024 tlai khan Lok Sabha inthlanpui 2024 a Mizoram tana ECI in General Observer to Mizoram atana a ruat Dr. Nipun Vinayak chuan DC Conference Hall-ah Assembly Segment Officer in-charge te chu kawm in, an mawhphurhna leh hmalakna hrang hrang te a sawipui.

   Inthlanna felfai tak Mizoramin a lo hmuh tawh thin chu chhunzawm zel a nih theih nan uluk taka hna thawk turin Observer chuan kalkhawmte a chah. He meeting ah hian DEO Nazuk Kumar, ARO Lalnunmawii, EO Lalnunfela Chawngthu te an tel bawk.

Election Observer hovin Nodal Officer meeting nei

Aizawl : April 3, 2024 khan DC Conference Hall-ah General Elections to the Lok Sabha, 2024 chungchangah General Observer, Dr. Nipun Vinayak, IAS leh District Election Officer Nazuk Kumar, IAS te chuan election buaipui tura ruat Nodal Officer hrang hrangte meeting an neih pui a.

   He hunah hian nodal officer-te chuan General Observer leh DEO hnenah an mawhphurhna leh hmalakna te an sawi a, an hmachhawp hrang hrang pawh an sawi bawk. General Observer Dr. Nipun Vinayak chuan nodal officer-te inthlahdah lo turin a fuih a, inthlanpui pawimawh tak a nih vanga theihtawp chhuah turin a fuih a ni.

Saitual District-ah SDRF hnuai ah tanpuina pe

Aizawl : April 3, 2024 khan Saitual District huam chhung a thli leh rial in an in leh lo leh bungrua a tihchhiat chungkaw thahnem tak chu SDRF hnuaiah tanpuina, Saitual DC Dr. Lalngura Tlau hmalakna in an account ah thun a ni a, tanpuina hi account kimchang thehlut khua te hnenah pek hmasak a ni.

   March ni 30 leh April ni 1 a Mizoram khaw tamtak a thli leh rialin chenna in leh bungrua tamtak a tihchhiat tanpuina chhungkaw 43 pek an ni a, heng chhungkua te hi Saichal, Keifang, Tawizo, Buhban leh Lailak khua te an ni.

   Tanpuina hi account kimchang thehlut hmasa khua te hnena pek annih avangin tanpuina la dawng lo Tualbung khua, chhungkaw 74 te pawh an account details an rawn thawn veleh thun sak nghal tur a ruahman a ni.

Art Workshop & Exhibition SVEEP Aizawl in buatsaih

Aizawl : Lok Sabha Inthlanpui 2024 lo awm tur atana SVEEP (Systematic Voters Education & Electoral participation), Aizawl District in election chungchang inhrilhhriatna leh zirtirna kawnga hma a lakna peng khat atan Millennium Centre Atrium-ah Art Workshop & Exhibition a buatsaih a. 03.04.2024 khan Aizawl District Election Officer Nazuk Kumar, DC Aizawl chuan khuallian niin a hawng. He Art workshop & exhibition hi ni thum (April ni 3 – 5, 2024) chhunga neih tur niin, Aizawl Art Gallery & School of Fine Arts nen thawk hova buatsaih a ni.

Thli tlehin Khawzawl District-ah In 77 tichhia

Aizawl : April 1, 2024 zinga ruah leh thli thawk khan Khawzawl District chhungah chhiatna a thlen nasa hle a. Thli tleh hian chenna in, dawr, tuizem, tuikhuah leh ran in engemawzat a tichhia a. Thli tleh vanga chhiatna thleng 77 report tawh a ni a, nunna chan erawh an awm lo a ni. Pathianni lama chhiatna thleng te nen In 148 thli vang hian a chhia a ni.

   Thli tleh vanga chhiatna thleng a hriat veleh 22-Tuichang bialtu MLA W Chhuanawma, Dy Govt Chief Whip chuan Khawzawl Bawrhsap K. Lalrohlua be nghalin vanduaina tawk te chhawmdawl dan tur ruahmanna an siam dun nghal a ni.

District Level Fire Prevention Committee thukhawm

Aizawl : District Level Committee on Fire Prevention, Aizawl District chu Kangmei chhuak thei ven kawnga hmalakna te thlirlet in April 1, 2024 khan an thukhawm.

   Aizawl District Bawrhsap Nazuk Kumar, Chairman, DLCFP chuan meeting a kaihruai a. He hunah hian Aizawl District chhunga Kangmei chhuak tur ven kawnga hmalakna report tlangpui Lalnunsanga Khawlhring, DFO Aizawl Forest Division leh Member Secretary ni bawk hnen atangin ngaithlak a ni.

   Report in a tarlan dan chuan kum 2024 kumtir leh tun inkarah Kangmei chhuak vawi 308 chhinchhiah niin he Kangmei chhuak hian ram hectare 498.61 a tuam a. Lo hal hun tur ruatah thingtlang khua ten lo an hal deuh vek a, Khawpuar chiahin lo hal hun bituk pelh ah lo an hal a ni. He dan bawhchhiatna chungchangah hmalak dan tur pawh rel ho nghal a ni.