BSF IGP tharin Governor hmu
Aizawl : BSF IGP thar Akhleshwar Singh  chuan Governor Hari Babu Kambhampati chu April 3, 2023 khan Raj Bhavan-ah a hmu a. Mizoram chhunga BSF hnathawh leh a kaihhnawih thil pawimawh a sawipui. Governor chuan Tunhnaia Mizoram state thenawm vela boruak thlirin BSF ten theih tawp an chhuah chhunzawm a ngai a ni a ti.

CIC-in IGNOU Convocation hmanpui
Aizawl: April 3, 2023 khan Mizoram State Chief Information Commissioner Lalnunmawia Chuango chuan Indira Gandhi National Open University (IGNOU) Convocation vawi 36-na programme chu khuallian niin a hmanpui. 
    IGNOU Regional Centre, Aizawl hian convocation hi Dawrpui Multipurpose Centre ah an buatsaih a, Lalnunmawia Chuaungo chuan zirlai hlawhtlinna chang tharte lawmpuiin an hmalam hun atan duhsakna a hlan. Zirlaite chu sawrkar hna ringawt ngaihven lo va, mahni kea din tum turin a fuih a. Khawi sawrkarah mah sawrkar hna hian mitin a daih seng lo tiin ram hmasawnna tur chuan private sector-te tihlen a ngai, a ti

Poshan Pakhwada 2023 khar
Aizawl :  Social Welfare & Tribal Affairs Development Minister Er. Lalrinawma chuan April 3, 2023 khan Poshan Pakhwada, 2023 kharna hun a hmanpui.
    Minister Er.Lalrinawm chuan eitur tha chu mihring chang nilo ransa te pawn an mamawh a, khawvelah eitur tha awmdan in mihring leh ransa population a nghawng a, kan nun khawchhuahna tur kawngah thui tak a in nghat a ni a ti a. Tunkum hi 'International Year of Millets' a puan a nih angin Millets (Buhtun) chu chaw tha a ni tih hre thar a, zunthlum veite tan pawh Glycemic Index hniam chaw niin, mitin tana ei him a ni a ti.

Conservator of Forest, Northern Circle Office leh Quarters hawng
Aizawl : April 3 khan Environment, Forest & Climate Change Department Minister TJ Lalnuntluanga chuan Conservator of Forest, Northern Circle Office leh Quarters, Project Veng, Kolasibah a hawng a. Hemi rual hian Extension of Forest Rest House, Bairabi a hawng nghal bawk a ni. 
    TJ Lalnuntluanga chuan Department hmalakna thuam chak lehzual nana Conservator of forest, Northern Circle pisa pawimawh tak, Quarters leh Conference Hall-te hawn theih a buatsaih a ni chu lawmawm a tih thu sawiin EF&CC department a thawktute leh Department dang leh khawtlang ten an hlutpui zia lantir nan a hawnna hun a an telpui chu lawmawm a tih thu a sawi.

Mizoram Council For Vocational Training meeting
Aizawl : Mizorama Vocational Training lama thuneitu sang ber, Mizoram Council For Vocational Training (MCVT) chu an Chairman Lalchhandama Ralte, Minister, LESDE Department hovin April 3 khan an thukhawm.
    Meeting-ah hian Mizoram sawrkar Notification 2018-a Mizoram State Policy on Skills & Entrepreneurship Development hnena thuneihna a pek angin, Mizoram Sawrkar hnuaia Skilling Activities Department hrang hrangin a kalpui mek chu huang khata kalpui (Convergence) dan tur sawi a ni a, Department hrang hrang te Skilling Activities & Training hnuaia information data an neih te chu LESDE Department in Skill Mizoram Portal a buatsaihah dah luh vek nise tih an rel.

DAY-NULM Scheme kalpui that vangin SPARK Award dawng
Aizawl : Mizoram sawrkar UD&PA Department chuan Central sawrkar DAY-NULM Scheme a kalpui that vangin April 4 khan SPARK Award cheng vaibelchhe 10 a dawng.
    Ministry of Housing & Urban Affairs (MoHUA) hian kum tin DAY-NULM Scheme atan State tin te target a pek mila hna thawk tha te tehfung SPARK (Systematic Progressive Analytical Real Time Ranking) chu kum 2019-20 Financial Year atangin a kalpui tan a. Incentive Award anga kalpui niin a hming ah SPARK Award vuah a ni. Financial Year khat a Central fund dawn tur bakah Incentive Award pek belh thin a ni.

PWD in Larsap hnenah an hnathawh dan thlen
Aizawl, the 5th April 2023 : April 5, 2023 khan Raj Bhawan-ah PWD hotuten Governor Dr. Haribabu Kambhampati hnenah an Department hnathawh leh hmalakna thenkhat – National Highway leh Pradhan Mantri Gram Sadak Yojana (PMGSY) chungchang presentation siamin an hrilhfiah.
    Larsap chuan PWD hotute a koh chhan sawiin hna hrang hrang an kalpui mek dinhmun te, hna a hun taka zawh a nih loh chhan te leh hemi kawnga harsatna an neih te hriat a duh vang leh hengte hi Ministry lamah amah pawhin sawipui leh thlen a duh vanga ko anih thu a sawi. 

RD minister-in Tlabung RD Block hawng
Aizawl : Rural Development Minister Pu Lalruatkima chuan April 5 khan Mizorama RD Block 28-na atan Tlabung RD Block a hawng. RD Block thar lawmna inkhawm hi Tlabung Rural Development Block Office Complex-ah buatsaih a ni.
    RD Minister hian Tlabung RD Block Office hawng nghalin Tlabung RD Block New Office building sakna tur lungphum a phum bawk a ni.
    Lalruatkima chuan Mizoram history-a hmun pawimawh tak luahtu, Mizoram kawtchhuah hmasa Tlabung-in RD Block an nei ta chu a lawmpui thu sawiin kum 30 chuang hnu zetah Mizoramin RD Block thar pahnih - Kawrtethawveng leh Tlabung RD Block-te a nei leh thei chu thil chhinchhiah tlak leh hmasawnna ropui tak a ni, a ti.

LC 3-ah Bye-Election
Aizawl : Aizawl Municipal Corporation huam chhunga Durtlang Leitan leh ITI Veng Local Council member pakhat ve ve-te hmun a ruak avang leh Zemabawk Local Council chu dissolved a nih tak avangin, heng Local Council member hmunruak hnawhkhat tura mawhphurhna a pek angin State Election Commission, Mizoram chuan April 19, 2023 (Nilaini) khian inthlan a buatsaih dawn a. Hemi chungchang ngaihtuah hian April 5 khan Aizawl DC hovin meeting neih a ni. 

Arecanut Leaf Plate Production Centre hawng
Aizawl : April 5, 2023 khan Bilkhawthlir South-ah Local Administration Department hnuai a Rashtriya Gram Swaraj Abhiyan kaltlanga sak, 'Arecanut Leaf Plate Production Centre’ chu LAD Minister K. Lalrinliana chuan a hawng.
    Minister Pu K.Lalrinliana chuan kuhva chin nana hmun tha tak, kuhva hmun enkawlna kawngah pawh tawnhriat nghah tawh tak Bilkhawthlira kuhva hnah hmang a thleng siam chhuahna hmun hawn theih a ni chuan intodelhna kawngah hmasawnna a thlen ngei a beisei thu a sawi a. Mizoram Sawrkarin Food, Civil Supplies & Consumer Affairs Department kaltlanga ram chhung ngei a tharchhuah buhfai lei tur a duh thu sawiin, Bilkhawthlir khua tharchhuah buhfai quintal 23 lei sak tawh a nih thu a sawi bawk.

Gauhati High Court Platinum Jubilee
Aizawl : April 5 kha Gauhati High Court kum 75-na champha a ni a; Platinum Jubilee of Hon’ble Gauhati High Court lawmna atan Gauhati High Court – Aizawl Bench leh Mizoram Legal Services Authority tangkawp chuan Seminar an buatsaih. 
    Seminar hi Governor Dr Hari Babu Kambhampati chuan khuallian niin a hmanpui a, Gauhati High Court Platinum Jubilee lawmna puala Seminar thupui hi, "Challenges and the way forward for the judiciary in Mizoram," tih a ni, a ni.
    Governor Dr Hari Babu Kambhampati chuan Platinum Jubilee of Gauhati High Court lawmna hunah a tel thei chu lawmawm a tih thu a sawi a. Mipui ten an aiawh an thlanna ram, a bikin India ramah Judiciary pawimawhna - Danpui humhalhtu a nihna te, Democracy lungthu dang pahnih - Executive leh Legislature te khalh ngil tu a nih thu te a sawi.

Oil Palm Seed Garden tlawh
Aizawl : State Planning Board Vice Chairman H. Rammawi, State Planning Board member-te leh Research Officer, Planning & Programme Implementation Department te chuan April 5 khan West Serzawl rama Oil Palm Seed Garden chu a hmunah an tlawh.
    Hmalak mek dan enin, hmalakna tura hmachhawp te Agriculture Director leh a enkawltu Officer-te an sawipui a, H.Rammawi chuan Oil Palm hlawk zia hriain, Mizoram sawrkar chuan 'Oil Palm Act 2014' a lo siam tawh a ni, a ti a. Mizoram chu ruahtui tlak thatna hmun anih avangin a hranpa a tui pek ngai lovin Oil Palm-chu awlsam zawk a chin theih anih thu a tarlang. Oil palm chu a hmanna a tam avangin kum khatah a man (price) vawi hnih tal a pung thin thu sawiin hei hi a chingtute tan thil lawmawm tak anih thu a tarlang bawk.

SEDP Family Oriented Phase II sawiho
Aizawl : April 6, 2023 khan State Planning Board Vice Chairman H. Rammawi hovin SEDP Family Oriented thawhhnihna (Phase II) kalpui dan tur sawiho a ni.
    Mizoram Sawrkar Flagship Programme SEDP thawhhnihna atan hian chhungkua 60000 hnenah tanpuina pek a ni dawn. SEDP Family Oriented Programme thawhhnihna hi Mizoram State E-Governance Society (MSeGS) te nena tangrualin online a kalpui tum a ni. Meeting ah hian MSeGS te chuan presentation an pe nghal a ni.

District ten PMJVK hamthatna dawng vek tawh dawn
Aizawl : District Council & Minority Affairs Minister Robert Romawia Royte chuan April 6, 2023 khan Union Minority Affairs Minister Smt. Zubin Irani a pisaah kawmin PMJVK Guidelines siamthaa Mizoram pum a scheme-in a tuam thei tawh tur chu lawmawm a tih thu a hrilh a. 
    Robert Romawia chuan Mizoram district 8 te chuan PMJVK hnuaia hamthatna an dawn theih loh avangin hengte cover tura Mizoram Sawrkarin projects a siamte chu ngai pawimawh turin a ngen. DC&MA Minister chuan kum kal taa PMJVK sanction thar awm lo chu pawi a tih thu sawiin, India ram state dangte ang thovin Mizoram tan pawh thil hrilhhaithlak tak a ni, a ti a, Mizoram chuan sum dawnsa tluang taka a hman theih avang leh a taka projects thawh zawh chin a san tawh avangin a bika ngaihtuah a phu a ni, a ti bawk.