MYC-a training chhuakte thlahna hun hmang

Aizawl: August 6, 2025 khan MYC Auditorium, MINECO ah MYC, Honda India Foundation leh Visan Foundation te tangkawpin an buatsaih Project Buniyaad Hotel Management (Food & Beverages) Phase II hnuaia batch 1-na leh batch 2-na training chhuak te thlahna hun (valedictory ceremony) hman a ni.

  Thla 2 chhunga training chhuak Mizo thalai mi 66 (sawmruk paruk) te hnenah Certificate hlan a ni.

Thalai training chhuak te hi heng India ram hmun hrang hranga hotel-ah te hian hna an thawk nghal dawn a ni.

1. Park Hyatt, Chennai

2. Regency Hyatt, Chennai

3. The Ritz Carlton, Pune

4. Raj Park Hotel, Chennai

5. Foodlink - Delhi, Mumbai & Ahmedabad)

6. Olive Bar & Kitchen, New Delhi

7. Hindustan Hotel, Bhubaneswar

8. Hotel Lakened, Udaipur

ZMC kum 7 tlin lawmna leh Intern hostel hawnna hun hmang

Aizawl: Zoram Medical College & Hospital (ZMC&H), Falkawn chuan August 7, 2025 khan 7th Founding Day lawmna hun an hmang a. Health and Family Welfare Department Minister Lalrinpuii chuan khuallian niin hun a hmanpui.

  Minister chuan thingtlang mipuite thleng phak healthcare service a ngaih pawimawh thu sawiin mizo mipuite tana ZMC&H hlutzia a sawi a. Tun hnaiah hmasawnna tam tak hmuh a ni chu lawmawm a tih thu a sawi. A hun leh ngaihtuahna zawng zawng Hospital hmasawn nana a sen thin thu a sawiin India rama Institution tha ber ber atanga zir chhuak thawktu ZMC&H in kan nei chu lawmawm a tih thu sawi. 

  Zirlaite chu Mizorama Cancer hluarna chhante leh natna dangte pawh zirchianga, tihtak zeta bei turin a fuih bawk. Vawiin vek khan MBBS Intern Hostel sak thar, khum 60 awmna Charles Robert Darwin Hostel tia vuah chu a hawng nghal a ni.

Upate Run tlawh

Aizawl: Social Welfare, Women and Child Development Minister Lalrinpuii chuan August 6, 2025 khan Upate Run, State Senior Citizens’ Home Ainawn Veng a tlawh a. Department hmalaknate thlir ho niin an harsatna leh an mamawhte ngaihthlaksak an ni.

  Minister chuan thu sawiin Mizoram State Sawrkarin Upate Run a nei chu lawmawm a tih thu a sawi a, tun dinhmunah mi 10 awm theihna ni mek chu mi 20 awm theihna tura hmalak a nih tur thu sawiin, rilru lama harsatna neite tana hmun bik, Mental Rehab pawh mi tam lehzual awm theihna tura hmalak nghal a nih tur thu a sawi.

  Upate Run, Senior citizens' Home hi kum 60 chunglam, enkawltu leh chawmtu mumal nei lo ten, hlim tak leh thlamuang taka a thlawna an belh theih tura duan niin Social Welfare & Tribal Affairs Dept hnuaiah, January ni 1, 1989 khan din a ni a. Tum khatah mi 10 awm theihna niin din a nih tirh atanga vawiin thlengin mipa 52 leh hmeichhia 26 enkawl tawh an ni a, tun dinhmunah mi 7 awm mekin, awm dil, endiklai mek mi 5 an awm bawk.

NSS Festival 2025 hawnna hmanpui

Aizawl: Sports & Youth Services Minister Lalnghinglova Hmar chuan August 6 khan Art & Culture Auditorium, Berawtlang-ah North East National Service Scheme (NSS) Festival 2025 hawnna hun chu khuallian niin a hmanpui.

  He kut hi Mizoram Sports & Youth Services Department hnuaia State NSS Cell leh Ministry of Youth Affairs & Sports hnuaia Regional Directorate of NSS-te buatsaih a ni.

  2014-a hman tan a nih atanga tun thlenga NE NSS Festival hman a la ni a, kum 2047 hmaa India ram Developed Country a hlankai a nih theihna atana hmalakna, Viksit Bharat, zulzuia inhmakhua na a ni

  Kum 1972-a Pachhunga University College-a NSS unit din kha Mizorama a hmasa ber a ni a. Tunah chuan zirna in 103-ah NSS unit din tawh niin, kum 1988 khan State NSS Cell din a lo ni tawh bawk.

  North East NSS Festival hian ni nga chhung, August ni 5, 2025 (Thawhlehni) atanga August ni 9, 2025 (Inrinni) thleng, a awh dawn a. Hmarchhak state hrang hrang - Mizoram, Assam, Manipur, Nagaland, Tripura, Sikkim leh Meghalaya – atangin NSS volunteer 250 vel leh Programme Officer-te a hmuna riakin an tel a ni.

Chief Minister leh NHDCL hotu inkawm

Aizawl: Chief Minister Lalduhoma leh National Handloom Development Corporation Limited Managing Director Commodore Rajiv Ashok (Rtd) te chu August 6, 2025 khan Mizoram House-ah an inkawm a, Mizo Handloom tihhmasawn dan tur an sawidun. 

  Mizorama Yarn dawr (Warehouse) siam dan tur te, Mizorama office hrang hrang leh sawrkar hmun pawimawha local handloom product hman tam dan tur te, product tha leh tlo zawk a awm theih nana modern electronics Jacquard handloom uar ve dan tur te, Weaver ho thiamna tihsan zel dan tur leh state pawna an intihlar deuh deuh theih dan tur te, National Handloom Development Corporation Limited mithiamten Mizoramin nasa zawka hma a sawn theih dan tur ruahmanna an rawn siampui dan tur te, Mulberry atanga yarn siam chhuah tam zawk Mizoramin a neih theih dan tur te an sawi dun a ni.

Larsap hovin PM TB Mukt Bharat Abhiyan hmang

Aizawl: Mizoram Larsap, General (Dr) Vijay Kumar Singh hovin August 6, 2025 khan Raj Bhavan-ah Pradhan Mantri TB Mukt Bharat Abhiyaan programme hman a ni.

  He hunah hian Food Basket Support hnuaia TB veite tana eitur hrisel leh tha thawhtu, Nikshay Mitra-thawh hlawkte chawimawina hun hman a nih bakah, Food Basket Support kaltlang hian TB veite hnenah eitur tha sem chhuah a ni a. He hun hi Health & Family Welfare Minister Lalrinpuii chuan a telpui bawk.

  He hunah hian Food Basket Support kaltlanga TB veite eitur tha pek kawnga thawh hlawk tak Nikshay Mitra pahnih - NEDFi leh Dr. Laxmi Narayan te hnenah Larsap-in chawimawina a hlan a. TB vei mi 4 te hnenah Food Basket hlan a nih bakah NEDFi in TB vei mi 100 te Food Basket Support kaltlanga an chhawmdawlna tur Rs 4,90,000/- cheque chu TB veite aiawhin Larsap chuan a dawn sak nghal bawk.

  He huna tarlan nih dan chuan Mizoramah TB vei enkawl mi 1,501 awm mekin, heng zinga 117 te hian Food Basket chhawmdawlna an dawng a, hei hi 7.8% a ni. Nikshay Mitra 76 awm mekin TB vei zinga 32.5% te chu taksa mamawh chaw tha dawng lo ni a chhut a ni. India ram State/UT te TB score siamah Mizoramin point 68 hmuin 12-na dinhmun a hauh a, a hlawhtlinna rate hi 79.50% niin, TB vei zinga 5% velin an thihpui anga chhut a ni. Kum 2024 khan TB vei 2,306 awmin thih pui 136 an awm a ni.

Lalrintluanga Sailo raln hun hmang

Aizawl: August 5, 2025 khan Mizoram Legislative Assembly member-te chuan July ni 21, 2025-a boral Pu Lalrintluanga Sailo, Dampa bialtu MLA ralna leh Death Gratuity hlanna hun, Aizawl, Luangmual-a a chenna inah an hmang a. Assembly Speaker Lalbiakzama'n he hun hi kaihruaiin, Home Minister K. Sapdanga’n hunserh a hmang a ni.

  Lalthangmawia, Additional Secretary, Mizoram Legislative Assembly chuan Section 16 of the Mizoram Salaries, Allowances and Pension of MLA Act, 1999 angin a nupui Lalbiakthuami hnenah Death Gratuity nuai 15 a hlan a ni.

  Ralna hun hmannaah hian Lalfamkima Deputy Speaker; Lalchhandama Ralte, Leader of Opposition; Dr. K. Beichhua, MLA leh C. Ngunlianchunga, MLA ten thlahna thu an sawi bawk a ni.

MZU NAAC A+ Grade hmuh lawm

Aizawl: National Assessment and Accreditation Council (NAAC) in zirchianna tunhnaia a tih chhuaha Mizoram University (MZU) in A+Grade (CGPA 3.30) a hmuh thar lawmna, MZU Auditorium-a buatsaih chu August 5, 2025 khan Larsap General (Dr) Vijay Kumar Singh, Chief Rector, MZU chuan khuallian niin a hmanpui a, MZU e-Office Portal a tlangzarh nghal bawk.

  Larsap General (Dr) Vijay Kumar Singh chuan MZU in NAAC A+ Grade a hmu thar chu a lawmpui thu sawiin, University la naupang tak kum 2000 a din, 2001 a kalpui tan MZU in hun reilote chhunga hlawhtlinna a hmu leh India hmarchhak bakah ram puma zirnna tha zinga chhiar tel a ni chu chhuanawm a tih thu a sawi a.

  NIRF-in India ram University tha zual a thlan chhuah top 100 zinga MZU a lang pha char char leh tunhnaia 77-na dinhmun a hauhte, Central University bik inelna IIRF tehnaah 15-na dinhmun a hauh phate chu chhuanawm a tih thu a sawi bawk.

  Larsap chuan MZU in hmasawnna a hmuh hrang hrangte tarlangin, National Education Policy 2020 leh Academic Bank of Credits tha taka kalpui a nite, research publication-ah h-index 98 a hmu leh patent 46 lai a neite, MOOCs leh SWAYAM hnuaia hmarchhak state zinga online course kalpui hmasa ber a ni thei leh DRDO Industry-Academia Center of Excellence nei chhun a nite chu fakawm a tih thu a sawi a ni.

Sawrkar damdawi in tha tehnaah Mizoram damdawi in pali tlin belh

Aizawl : India rama sawrkar damdawi in tha bik tehna-ah August 5, 2025 khan Primary Health Centre pahnih – Khawlailung PHC leh Bairabi PHC bakah Urban Primary Health Centre pahnih – Lawipu UPHC leh Sihphir UPHC te an tel thar.

  National Health Mission, Health & Family Welfare Department atanga thu kan dawn danin, chuan damdawi in tha bik tehna, National Quality Assurance Standards (NQAS)-ah Khawlailung PHC, Bairabi PHC, Lawipu UPHC, leh Sihphir UPHC chu an tling thar a, a tehnaah (a indawtin) 93.84%, 84.89%, 93.63%, leh 93.93% an hmu tih a sawi.

  Mizoram puma PHC awm zingah NQAS National Certificate hmu hi 28 awmin, Urban PHC zingah 5 an awm ta a ni.

  Heti hian Mizoram chhunga Sawrkar damdawi in 41 te chu NQAS National Certificate nei tawh an ni a. Tunah hian sawrkar damdawi in 18-in state level certificate neiin national certificate result nghak mek 3 an awm bawk a ni.