ZMC dincham vawi 6 na lawm

Aizawl : Health & Family Welfare Minister Lalrinpuii chuan August 7, 2024 khan Zoram Medical College (ZMC) din champhaphak vawi 6-na lawmna hun khuallian niin a hmanpui a, Crawford Gents' Hostel leh Hospital Management Information System (HMIS) a hawng nghal bawk.

   ZMC hi August ni 7, 2018 ah hawn niin NMC-in June ni 16, 2023 khan recognition a pe a. Khum 364 awm mekin tun dinhmunah zirlai 395, State chhung mi 288, State dang 48 leh NRI 59 an awm a. Faculty 112, Non Faculty Doctor 40 leh Non Teaching Staff 572 an awm mek a. Superspecialist leh Specialist Department 22 a awm.

Working Committee ten zirchianna report thehlut

Aizawl : August 5, 2024 khan Chief Minister Lalduhomahnenah TBC Lalvenchhunga, Adviser to CM kaihhruai Working Committee on Lengpui Airport te chuan an thil zirchianna report bu an hlan.

   Chief Minister chuan, huntiam chhunga report fel fai tak in peih hman avangin ka lawm hle a, in report atang hian in thawhrimzia chiang takin a lang a ni, tiin Working Committee on Lengpui Airport te hi lawmthu a lo hrilh a ni.

   Working Committee Member Secretary Vanlaldina Fanai, Commissioner & Secretary, GAD chuan Working Committee hian Airport enkawl zel dan tur thutlukna a siam lova, thutlukna hi Council of Ministers kuta awm a ni. Committee hi chuan zirchianna a theih anga chipchiara buatsaih a ni, a ti.

SDMA te thukhawm

Aizawl : Mizoram State Disaster Management Authority (SDMA) te chu an chairman Chief Minister Lalduhoma hovin, August 5, 2024 khan CM Conference Hall-ah an thukhawm.

   Chairman Lalduhoma chuan, Cyclone Remal vanga chhiatna rawn endiktu Inter Ministerial Central Team ten an report an thehluh tawh thu leh Finance Ministry lama a awm mek thu a sawi a. Tanpuina engemaw zat chu min rawn pek kan beisei, a ti.

   Meeting-ah hian kumin March atanga May thla thlenga leilung chhiatna vanga chenna in leh building dang chhia 5938 report a awm tawh thu te leh kumin chhunga disaster avanga nunna chan chhinchhiah mi 42 an awm tawh thu te sawi a ni.

Police-te hriselna leh physical fitness intuaitharna bultan

Aizawl : State pum huapa Mizoram Police-te hriselna leh physical fitness intuaitharna bultan nan August 5, 2024 zing khan Home Minister K. Sapdanga hovin 1st Battalion MAP Playground, Armed Veng, Aizawlah 'Train to Excel' tih thupui hmangin fitness parade, '45 Minutes for All Ranks of Mizoram Police' khuhhawnna neih a ni a; hemi rual hian Mizoram District hrang hrangah SP leh Battalion Commandant-te kaihhruaiin a khuhhawnna hun hman a ni bawk.

   He hunah hian Anil Shukla IPS, DGP Mizoram chuan inlawmna thu a sawi a, Khuallian K.Sapdanga chuan 45 Minutes for all ranks of Mizoram Police khuhhawnna puala kalkhawm Police rank hrang hrangte leh District hrang hranga programme hmangtute chibai bukin duhsakna a hlan a, Lalbiakthanga Khiangte IPS, IGP (L&O) chuan lawmthu a sawi a. PT Master kaihhruaiin Physical Training Exercise neih chhunzawm a ni a. Senior Police Officer-te leh an hnuaia Police rank hrang hrang, an vaiin mi 500 vel an tel a ni.

School Education Minister hovin National Space Day hmang

Aizawl : Indian Space Research Organisation, North Eastern Space Applications Centre leh Mizoram Remote Sensing Application Centre tangkawpin an buatsaih National Space Day, 2024 lawmna chu August 6, 2024 khan Dr. Vanlalthlana, School Education Minister-in khuallian niin a hmanpui.

   National Space Day, 2024 puala Quiz buatsaih lawmman semna khuallian hian a nei nghal bawk a. He Quiz intihsiakah hian School 25 atangin naupang 2 theuh an tel a. Lawmman pakhatna hi Govt. Saitual HSS-in dawngin pahnihna Govt. Mizo HSS leh pathumna Synod HSS an ni. School naupangte leh Scientist te hian inkawmho neiin zawhna leh chhanna hun hman zui a ni bawk.

Chanchinbu mite harsatna Parliament-ah thlen

Aizawl : Parliament session kal lai mekah 6.8.2024 (Thawhlehni) khan Mizoram MP (RS) K. Vanlalvena chuan Mizoram chanchinbu mite harsatna chungchang a sawi chhuak.

   Vena hian Chanchinbu registration title online-a dilna form-ah duh thlan theih tur Tawng hrang hrangte ziah tlarnaah Mizo Tawng telh a nih ve loh thu house a hrilh a. Mizo tawng hmangtute zinga chanchinbu chhuahna tur dilna form-ah Mizo tawng a tel loh avangin Mizo tawng chanchinbu a chhuah theih dawn loh tihna a nih avangin online-a dilna form-ah Mizo tawng telh ngei a phut thu a auchhuahpui a ni.

   K. Vanlalvena chuan Union Minister of Information and Broadcasting Ashwini Vaishnaw hnenah ziakin a thlen nghal bawk a ni.

NH-302 kawngpui zauh hna thawh enfiah

Aizawl : Lunglei District Deputy Commissioner R. Lalthazuala ruahmannain inspection team chuan August 7, 2024 khan Lunglei leh Tlabung inkar National Highway-302 kawngpui laih zauh hna thawh mek dinhmun leh fur ruahsur avanga lirthei tlan leh khualzinte'n harsatna an tawh thin sut kian a nih theih nana hma lak dan turte a hmunah kal chilhin an enfiah.

   NH-302 kawngpui zauh hna thawh mek hi Hrangchalkawn a?anga Tlabung thleng niin, kawng hluiah chuan kilometre 96-a thui a ni a. Tuna kawng thar ruahman ang chuan KM 75.070-a thui tur niin, kawngpui zauh leh siam that hna hi BRN Infrastructures Private Limited (BRNIPL) te'n thawkin, tun dinhmunah Package A-ah 38.20% leh Package B-ah 37.65% an zo tawh a. Kawng laih leh kawng luan bakah, lui kawr kanna tur lei dawh tur pali (major bridge 3 leh minor bridge 1) awm bawkin, lei dawh hna pawh hi thawh mek a ni.

National Highway 306 chungchangah thutkhawm

Aizawl : August 7, 2024 khan Kolasib DC Conference Hall-ah Robert C Lalhmangaiha, Kolasib DC hovin National Highway chungchangah thutkhawmna neih a ni a, tun hnaia kawng chhe lutuk leh chak zawka thawm that dan tur chungchang ngaihtuah ho a ni.

   Kawngpui chungchanga thutkhawmna neih zawh hian nikum Fire Prevention Award Kolasib District in a dawn chu Kolasib DFO in DC hnenah hlanna hun a hmang nghal bawk a ni.

   Thutkhawmnaah hian DC bakah NHIDCL hotute leh Contractors te, Sr EE Kolasib, DFO Kolasib, Sub Hqs YMA Kolasib, Jt VC - Kolasib, Kawnpui, Vairengte, Bilkhawthlir te, Bualpui VCP, North Chhimluang, Thingdawl, Khamrang, Mualkhang VCP te leh Landowners te an kalkhawm a ni.

Khawchhak Cigarettes Vaibelchhe 1.43 chuang man

Aizawl : Assam Rifles te chuan smuggling tihtawpna atana hma an lakna kawngah August 5, 2025 khan Mualkawi, Champhai district-ah foreign cigarettes case 110, Cheng nuai 143 man chuang an man.

   He hmalakna hi Assam Rifles leh Customs Preventive Force Champhai te tangkawpa buatsaih niin Case 110 hi Mualkawi-ah hian an man a, heng an thil man Rs 1,43,00,000/- (Vaibelchhe khat, nuai sawmli pathum) man hu hi Customs Preventive Force Champhai hnenah dan anga hma an lak theih nan an hlan.

Dragon Fruits Extravaganza Millenium-ah nei

Aizawl : August 8, 2024 khan Horticulture Minister Prof. Lalnilawma chuan Dragon Fruits Extravaganza chu Millennium Centre Courtyard (Millenium Centre tualzawl) ah neih tur chu a hawng.

   He Extravaganza hi Dragon Fruits chungtute leh Thalal hetiang lama tui mite tana buatsaih a ni. He hun hi Greenwave Farmtech ten Department Of Horticulture leh Dragon Fruits Farmer Association te hmalakna hnuaia buatsaih a ni. He hun hi Ni 3 chhung buatsaih a ni a, nimin khan khar a ni.