Sawrkarin July hlawh an pe chhuak

Aizawl ; Treasury hrang hrangte chuan August 8 khan sawrkar hnathawkte July hlawh an pe chhuak a, thla hmasa lam aiin hlawh hi pek chhuah tlai hret a ni.
    August 7 khan Provisional Employee-te hlawh (Wages) leh Workcharge-te hlawh pek chhuah a ni a. Thawhlehni khan regular te hlawh pek chhuah a ni chhunzawm nghal a ni.

ZMC kum 5-na lawm pahin Academic building thar hawng

Aizawl: August 7, 2023 khan Zoram Medical College chuan Academic Building tharah an Founding Day vawi ngana an lawm a, he huna khuallian Chief Minister Zoramthanga chuan ZMC Academic Building thar hi a hawng.
    Academic Building thar hi Ministry of Health & Family Welfare, Govt. Of India sum Rs. 60 crore senga sak niin 2018 khan a sak hna bul tan a ni a, nikum laihawl khan sak zawh a ni. A building hi chhawng ruka sang niin Department hrang hrang pariat, Lecture Hall pali leh Exam Hall te bakah Laboratory te dah an ni. Building pumpui zau zawng hi Sqm 13,500 a zau a ni.
    College hawn anih atanga a kum nga lawm lai hian thawktu 723 awm mekin MBBS zirlai batch 5 an awm a, zirlai 489 an awm mek. Batch tinah hian Seat 100 awmin chung zinga 70 chu Mizoram State quota a ni a, a dang 15 chu All India Quota niin a dang 15 hi Non Resident India quota a ni.

Governor in Rail Line thar Survey pawm a nih vangin lawmthu a sawi

Aizawl: Governor Dr Hari Babu Kambhampati chuan a Twitter Handle kaltlangin August 7, 2023 khan  Prime Minister leh a kaihruai Central Sawrkar hnenah Rail Way line thar kalna tur zawnchhuah pawm a nih a vangin lawmthu a sawi.
    Survey-in a tarlan dan chuan Sairang atangin Myanmar ramri dep, Mizoram chimlam hmawr tawp a Hmawngbuchhuah chu Rel kawngin a thlun zawm dawn a ni. 

December 31, 2023 thleng grace period

Aizawl : Transport Minister TJ Lalnuntluanga chuan August 9, 2023 khan chanchinthar lakhawmtute a kawm a, he hunah hian Road Tax, Passenger Tax, Goods Tax, Fitness Fee, Permit Fee te a hun taka pe lo ten penalty an chawi thin ngaihdamna hun chu August 16, 2023 atangin December 31, 2023 thleng hawn a nih tur thu a sawi. 
    Tun dinhmunah Mizoram pumah lirthei register awm zat chu 2,91,883 (as on 31st July, 2023) a ni a. Heng zingah hian document nung lo, chhiah ba zat chu 89,225 an ni a, Mizoram pumah lirthei register zawng zawng atanga 30% chu document nung lo, chhiah ba an nei tihna a ni. Tunah hian hian Driving Licence 4,83,312 a awm a, heng zinga engemaw zat hi renew ngai a ni bawk.

Mizoram pawnah Hnahlan Isabella Wine hralhchhuak dawn

Aizawl : August 8 khan Hnahlan Grape Farming & Processing Co-Op Society Ltd leh RR Sales, Delhi ten thawhdunna thuthlung MoU an ziak.
    2023 hian Hnahlan leh a chhehvel ah Grape seng mek a ni a, quintal sang chuang an seng tawh a ni. Hnahlan Winery ah hian kum hlui lama wine siamsa leh kumin a mi nen litre nuai hnih chuang hralh tur an nei tura beisei a ni. Hnahlan leh a chhehvel ah hian chhungkaw thahnnem takin grape chin hi eizawnnan an hmang mek. Kum 2010-a hawn Hnahlan Winery pawh production capacity tih len bakah khawl leh hmanraw changtlung leh thar zawka thuam thar tum a ni.

Plastic tui um tih ralna tur leh man chawia tui intur thianghlim leina tur hawng

Aizawl : Deputy Chief Minister Tawnluia chuan August 9, 2023 khan Aizawl Smart City hmalaknaa Aizawl khawpui hmun engemaw zata man chawia tui in tur thianghlim dawhna ‘Roadside Drinking Water Kiosk’ leh hmankhat daih plastic tui um tihriralna ‘Reverse Vending Machine’ an dah te mipuiin tangkai taka an hman theih tur mipuite hnena hlanna a hmanpui. 
    Programme tan hmain MINECO Main Gate kawta heng khawl pahnih dahte hi a hawng a, hetah hian kawngsira chawhmeh zuar te tan dawhkan changkang ‘Street Vendors Modular Kiosks’ Aizawl Smart City in a ruahman chu a hmangtute hnenah a hlan nghal bawk a ni.

Manipur buai Ni 100 na pual inkhawm nei

Aizawl : Manipur tualchhung buaina avanga Zofate leh Meitei indona chuan ni August 10, 2023 (Ningani) khan a ni za (100) na a thleng a. Mizo Zirlai Pawl (MZP) General Headquarters chuan Manipur tualchhung buaina avanga zofa nunna chan ta hriatreng nan August 10, 2023 (Ningani) zan dar 8:00 khan Aizawl Vanapa Hall-ah “Hnam tana nunna chante sunna leh inpumkhatna inkhawm” an buatsaih.

ITLF leh Shah inbia, tribal thite phumna hmunah inrem thei rih lo

Aizawl : Manipur-a tribal pawl hrang hrang inzawm khawmna, Indigenous Tribal Leaders’ Forum (ITLF) aiawhte leh Union Home Minister Amit Shah te chu August 9 khan an inbia a, tribal hruaitute duh angin an mi thite vuina hmun thu-ah erawh inremna mumal an siam thei rih lo.
    Nilaini tlaia Delhi-a Shah leh ITLF hruaitute inbiaknaah hian hmarchhak state-a chi leh chi inkara buaina chhuak meka tribal mi thite a hlawma phum chungchang leh Manipura muanna a awm zel theihna tur thil hrang hrang an sawi.

K. Vena’n na takin Amit Shah chhang

Aizawl : Mizoram Rajya Sabha MP K.Vanlalvena chuan parliament fur thutkhawm neih mekah Ningani chawhnu khan Union Home Minister Amit Shah-a thu sawi na taka chhang letin Manipur-a Zohnahthlakte thlavang na takin a hauh.
    Parliament thutkhawmah hian K.Vanlalvena chuan Manipur buaina chungchang sawi chhuakin tribal a nih thu a sawi phawt a, “Union home minister khan a thu sawiah ‘Manipur-a tribal-te chu Myanmarese’ tiin a sawi a, kan ni lo. Myanmar mi kan ni lo, India mi kan ni. British-ten India an awp hmain kan cheng tawh a, kum 200 zet kan lo cheng tawh,” tiin a sawi.

MP Lok Sabha C.Lalrosanga'n No-Confidence Motion thlawp

Aizawl : Mizoram MP (LS) C. Lalrosanga chuan August ni 10 tlai khan Narendra Modi a kaihhruai Union Council of Ministers rin tawk lohna, eptu member Gaurav Gogoi putluh, No-Confidence Motion chu Congress leh eptu party dangte tan vang pawh ni loin Manipur a tawrhna rapthlâk tak thlenga tlangmi zofate thlavang hauhna avanga August 8 zana Chief Minister Zoramthanga nen an lo sawi dun tawh angin No-Confidence Motion hi a thlawp ta a ni tih Rosanga chuan a sawi.