Chief Minister-in Mizo High Sikul Field chei thar hawng

Aizawl : Chief Minister Lalduhoma chuan August 13, 2026 khan Aizawl Smart City Limited sum Rs. 16.06 Crore senga chei that Mizo High Sikul Field chu a hawng. UD&PA Minister K. Sapdanga chu khualzahawm a ni a, EF&CC Minister Lalthansanga leh Health Minister Lalrinpuii ten an telpui bawk.

  He Field chei tharah hian a hnuai lamah lirthei dahna chhawng hnih a awm a, Four-Wheeler – 80 leh Two- Wheeler – 47 a dah theih a, tui litre 35,000 dahna a awm a. Public toilet leh Security Room a awm nghal a. Field chungah a kualin kea kalna (elevated jogging track) te, Field sira Cycle a tlanna kawng te, Cricket practice Pitch te a awm a, Stage, toilet leh store room te a nei a, naupang infiamna hmun leh open Gym a awm a, huan (garden) a nei a, Water Cooler a awm bawk a. Mizorama Biak in hmasa ber dinna (6.10.1896) hmun a nih angin, Biak in hmasaber ang tak in te sak a ni bawk.

  A field pui hi phullem phah a ni a, a sei zawng hi meter 73.35 leh a zau zawng meter 33.12 a ni a, mi 310 thut theihna a awm a ni. Hna hi Lushai Engineer te thawh niin June ni 10, 2022-ah Contract Agreement ziahpui an ni a, February ni 4, 2023 ah hna an tan a, kumin August ni 10 khan an zo fel a ni.

Heroin vaibelchhe 6 chuang man Police leh AR ten man

Aizawl : Mizoram Police leh Assam Rifles tangkawp chuan August 13, 2026 khan Keifang, Saitual District-ah Heroin No 4 tam tham tak an man a, an thil man hi cheng vaibelchhe 6.51 man nia chhut a ni.

  He an thil man kaihhnawih-ah hian mi pahnih Lirthei khalhtu Monwar Singh Barbhuiya leh a handyman Abdul Kayum Munna manin Saitual Police te chuan dan anga chhui zui a nih theih nan an mi man te hi an kawp nghal a, dan phal loh thil an man te hi cheng vaibelchhe 6.51 man nia chhut a ni.

Nuai 100 chuang man Kuhva ro man

Aizawl: Legal Metrology Department leh Assam Rifles te chuan August 13, 2026 khan Mualkawi, Champhai District-ah a kuhva ro cheng 1,29,95,200 man a chhut an man.

  Team pahnih te hian an thudawn bawhzuiin an thil manna lai bawr hi an dap a, kuhva ro bag 155, Kg 12,400 a rit hi an man a, an thil man hi Rs. 1,29,95,200/- man ni a chhut a ni a. Dan lova tawkhrul thil an man te lo bawhzui a nih theih nan Custom Preventive Force, Champhai District, Mizoram te hnenah an hlan a ni.

Mualṭhuam North-ah 'H. Lalramdinpuii Security project' kalpui dawn

Aizawl: Lunglei High Powered Committee (HPC) Vice Chairman, Lunglei North bialtu MLA V. Malsawmtluanga chuan August 12, 2026 khan mi kut tuara thi, Mualṭhuam North tleirawl H. Lalramdinpuii, 15 chu an chenna In-ah ralin, a chhungte tuarpuina a hlan a, 'H. Lalramdinpuii Security Project' kalpui a nih tur thu a sawi.

  V. Malsawmtluanga chuan H. Lalramdinpuii ralna atan pawisa fai ₹10,000/- chu a chhungte kutah a hlan a. Lunglei High Powered Committee (HPC) Vice Chairman hian H. Lalramdinpuii hriat reng nan leh nunau leh hmeichhiate himna atan Mualṭhuam North-ah "H. Lalramdinpuii Security" project kalpui nghal a nih tur thu a sawi.

Champhai-ah tanky tihfai tum mi pahnih thi

Aizawl : August 12, 2026 khan tui dahkhawlna tanky-ah Vanlalpeka (39) leh Vanlalengmawia (33) an thi.

  ZALEN thudawn danin August 12, 2026 khan Champhai Tlangsam Vengah Vanlalpeka leh Vannunmawia chu tanky tifai turin an inhlawh a, a lut hmasa zawk Vanlalpeka chu a luh rualin a tlu nghal a. Vannunmawia leh a bul hnaia hnathawk Vanlalengmawia leh Lalhmingthanga te chu chhanchhuak turin an lut ve nghal a ni.

  Nikhaw hre lovin Vanlalpeka, Vanlalengmawia leh Vannunmawia-te chu an awm a, Damdawi in panpui nghal ni mah se, Vanlalpeka leh Lalengmawia chu chhan theih an ni tawh lo a ni.

Hrangbana College hnenah B. Lalthangliana'n thil hlui a vawn te a hlan

Aizawl : Mizo historian B. Lalthangliana chuan Mizo history leh thu leh hla a zirna kawng hrang hranga lehkhabu leh thil hlui a lo lakkhawmte chu August 11, 2026 khan Government Hrangbana College kutah a hlan a, heng thil hlui dahkhawmna inhlanna leh hawnna hun hi College Library, Archive Room ah hman a ni.

  Hrangbana College-a kum 24 chuang lo thawk tawh leh he college-a a thawh chhunga Mizo thu leh hla tih hausak leh tih hmasawn nana sulhnu ropui tak hnutchhiahtu B. Lalthangliana chuan Mizo history zir chiang tura bul a tan dan te sawiin, thu leh hla leh culture nena inzawm thil hlui leh thil hlu a lo lâk khawmte chu uluk zawka vawn that a nih zel theih nan Hrangbana College Archive hnenah phal takin a pe tih a sawi.

MPSC pisa kai tur MZP-in dang

Aizawl: MZP bultumin August 10, 2026 khan MPSC office kai tur dan a ni a, an thil phut a hlawhtlin hma chu Peaceful Protest neih chhunzawm zel an tum.

  MZP chuan One Time Registration (OTR) chu tihtawp an phut a, a tul dan azira application form siam ni se an ti bawk a. OTR a document upload kim loh avanga reject zawng zawngte offline-a document te thehluhna hun siamsak an phut a. Written exam-a tling tawh, OTR a document upload kim loh avanga reject tawh te tan offline-a document thehluhna hun siamsak an phut bawk a. Mizoram Public Service Commission (MPSC) kalphung siam that vek phutin, sawrkarin reform committee/commission din se tih an phut bawk.

MYC bultumin North East Service Hub (NESH) Sensitization Programme buatsaih

Aizawl: August 13, 2026 khan Mizoram Youth Commission (MYC) Conference Hall-ah North East Service Hub (NESH) chungchang inzirtirna (Sensitization Programme) neih a ni.

  MYC chuan North East Service Hub (NESH) chu hman theih turin a kalpui mek a. NESH hi “HNA INPUI” (online job portal) tih thin tih changtlun nan leh huap zau zawk thei tura siam tumna a ni a. NESH hi peih fel a nih hunah chuan Mizoram mai nilovin North-East huam chhunga hna zawngte leh hna thawh tur nei ten, mobile phone hmangin awlsam taka inbiain hna an inpe thei dawn a, hei hian unemployment rate tihhniam kawngah pawh a pui dawn a ni. Ruahman dan chuan North East Service Hub (NESH) hi kumin October thla hian tlangzarh tum a ni.

Larsap-in MPSC Member atan K. Lalrinzuali, IAS (Retd) lalut

Aizawl: Mizoram Larsap General (Dr) Vijay Kumar Singh, PVSM, AVSM, YSM (Retd) chuan August 13, 2026 khan Mizoram Public Service Commission (MPSC) Member atan K. Lalrinzuali, IAS (Retd) chu Durbar Hall, Lok Bhavan, Aizawlah rinawmna thu tiam tirin a la lut.

  Lakluhna inkhawmah hian Chief Secretary Khilli Ram Meena chuan Larsap-in MPSC Member atana K. Lalrinzuali a ruatna notification a chhiar chhuak hmasa a. Hemi hnu hian Larsap chuan rinawmna thutiam chham tirin K. Lalrinzuali chu MPSC Member atan a lalut a ni.

  K. Lalrinzuali hi July ni 11, 1966-ah a piang a, thiamna lamah MA Public Administration Gold Medalist a ni a. Kum 1992 khan Mizoram Civil Service (MCS) a zawm a. Kum 2019-ah IAS ah promote niin AGMUT Cadre 2010 pek a ni a. Mizoram sawkara Commissioner & Secretary, Health & Family Welfare Department leh Power & Electricity Department hna a chelh laiin July ni 31, 2026 khan superannuation pension-in a chhuak a ni.

Tourism Department leh Central YMA ten thawhhona thuthlung ziak

Aizawl: Vawiin chawhma dar 10:30 khan Mizoram Tourism Department leh Central YMA te chuan August 11, 2026 khan Tourism Minister Lalnghinglova Hmar, pisa-ah thawhhona thuthlung (Memorandum of Understanding) an ziak. 

  Tourism Commissioner Vanlaldina Fanai chuan Tourism Department aiawhin hming a ziak a. Central YMA aiawhin President R Lalngheta’n hming a ziak a ni.

  Tourism Department Commissioner & Secretary Vanlaldina Fanai chuan Central YMA nen thawhhona thuthlung an ziak thei tur chu lawmawm a tih thu sawiin, Tourism lama hmasawn tumnaah Central YMA neitu chan chang taka che turin a sawm a. Central YMA President R Lalngheta pawhin theihtawp an chhuah tur thu a sawiin, YMA leh Tourism Department thawhona chuan rah tha a chhuah ngei a beisei thu a sawi a ni.

Lammual rama Dawrpui Veng khawtlang ram khawih danglam tur sawi ho

Aizawl : Minister B.Lalchhanzova, Aizawl East II bialtu MLA ni bawk chuan August 11, 2026 khan a pisaah UD&PA hotute leh Dawrpui khawtlang hruaituten Aizawl Lammual cheithat tura hmalakna kal mek chungchangah, Dawrpui vengchhung nghawng thil tul te an sawi ho.

  Assam Rifles in an chhuahsan hnua Lammual chei that dan tur Master Plan siamah Dawrpui Local Council, MHIP leh YMA te hmunhma neih mekna Bazar Bungkawn a mi chu Aizawl Square area ni tura ruahman niin khawih danglam a ni dawn a. Sawrkarin ruahmannna a siam sak dante sawiho turin meeting hi neih a ni.

  Aizawl square in a huam chin, Dawrpui Veng hmun thenkhat chei thatna tur Plan chu presentation hmanga thlirho niin, zawhna leh chhanna hun hman a ni a. Building awmsa thiah turah hian mi mal ram pali leh pawl hminga ram awm pathum a tel a ni.

Rulhut Dona Beihpui Thlak

Aizawl: August 10, 2026 khan CMO, Aizawl East District buatsaihin rulhut hlo pek beihpui “National Deworming Day August Round 2026” chu Neuhof English Medium School-ah Dr. Lallawmkimi Tochhawng, AMC Ward 5 Corporator chuan a hawng.

  He rulhut hlo pek beihpui hian rulhut avanga naupang thisen tlachham tur leh hrisel lo tur a veng a, an zirlaia an hnufum lohna tur leh an than chhohna kawnga harsatna thleng thei lakah a veng dawn a ni.

  He hunah hian Health Department-a thawktute, Women and Child Development Department leh Education Department staff te an tel a ni.