NH 44A siamna tur MoRTH atangin Vaibelchhe 48 chuang dawng

Aizawl: Sawrkar laipuia Ministry of Road Transport and Highway (Zone North East) chuan August 11, 2025 khan Mizoram PWD Secretary hnenah lehkha rawn thawhin NH 44A siamna tura sum dil chu pek an nih tawh thu a rawn hrilh.

  PWD Minister Vanlalhlana chuan hemi chungchangah hi sawiin, "July ni 23, 2025-a Union Minister Pu Nitin Gadkari, MoRTH hnena One Time Improvement (OTI) of by-pass road of old alignment of NH 44A sanction tura D.O. letter ka ziah chu Ministry of Road Transport & Highways (MoRTH) atangin nimin (August 11, 2025) khan Administrative Approval and Financial Sanction Rs. 48.63 crore kan hmu tih an rawn thawn a ni," a ti.

  Sum hmuh hi NH 44A (Lengpui to New Eden Road)-in a hel tak kawng pawimawh tak tak 5 te siamna atan hman tur a ni.

Heroin hawng 37 leh a neitu a puh mi pathum man

Aizawl: Excise & Narcotics Department, CADS (Central YMA) leh Assam Rifles thawkho chuan August ni 11, 2025 (Thawhtanni) zing khan Thuampui vengah Heroin gram 35 (Hawng 3) leh a neitu nia puh mi pakhat – Vanlalrinawma (22) s/o Lenmanga (L), Zarkawt-a khawsa nia inchhal chu an man.

  He thubuai chhuina kal zelah August 11, 2025 chhun khan Bawngkawn Venglai-ah heroin gram 253 (Hawng 22) leh a neitu mi pahnih - Agnes Lalrempuii (23) d/o Zoliansanga, Muthi, tuna Bawngkawn Venglaia khawsa mek nia inchhal leh Lalngaihpuii (31) d/o Zoramliana, Diltlang, Champhai District, tuna Durtlang Venglai-a khawsa mek nia inchhalte an man. Heng heroin neitute inpuanna atang hian hemi ni vek, chawhnu dar 2:45 khan Zuangtui-ah Heroin gram 135 (Hawng 12) man belh a ni bawk. Heroin man zawng zawng hi gram 323 (Hawng 37) a ni.

India aiawha khel turin Sanga leh Thazuala tling

Aizawl: India aiawha Yonex-Sunrise BWF World Junior Badminton Championship 2025 khel turin Mizoram player pahnih, C. Lalramsanga leh H. Lalthazuala te chu August ni 11, 2025 khan an invaw tling.

 August ni 9, 2025 atanga National Centre of Excellence, Guwahati, Assam-a a khel thei tur zawnna, selection trial neihah Mizo player pathum inlan zinga atangin Sanga leh Thazuala hi an tling a ni a, India team-a mi 28 awmnaah an tel dawn a ni.

  Mission Veng Badminton Club (MBC)-a khel mek, Sanga hi mixed doubles leh boy’s doubles trial tura koh niin mixed-ah hian Taarini Suri nen tangdunin vawi li khelhah vawi thum chakin khawvel huap inelna hmachhawn turin an tling a ni.

  Chanmari Shuttlers Club (CSC)-a khel, Thazuala hi boy’s singles-ah inlanin India No. 1 Ansh Negi pawh straight set-in a hneh thei a, vawi li khelhah vawi khat tlawm mah se India aiawh turin a invaw tling.

Larsap-in School Education Department hotute a kawm

Aizawl: August ni 14, 2025 khan Mizoram Larsap, General (Dr) Vijay Kumar Singh chuan School Education Department Secretary David Lalthantluanga leh hotu dangte chu Raj Bhavan-ah kawmin, Sawrkar laipui scheme hrang hrang kalpui dan, State education dinhmun, department hmalakna leh hmachhawp tlangpuite a sawipui.

  Larsap General (Dr) Vijay Kumar Singh chuan nakin lawka kan ram inghahna ni mai tur zirlaite enkawl leh zirna tha pek kawngah theihtawp chhuah tlan a tul thu sawiin, hemi tur hian Sawrkar scheme pawimawh tak takte leh National Education Policy 2020 te tha taka kalpui a tul tih a sawi a. Sawrkar laipuiin zirna tihhmasawn nan sum leh pai tam tak a sen thu leh Mizoramah school tha tak tak a din thu sawiin, Mizo mipuite chu Eklavya Model Residencial School, Kendriya Vidyalaya, Sainik School leh Jawahar Navodaya Vidyalaya-te chhawr tangkai tum turin a chah.

  School Education Secretary David Lalthantluanga chuan Department chanchin, dinhmun tlangpui leh hmalaknate a sawifiah a. School Education Director Angela Zothanpuii'n PM Poshan-Mid Day Meal kalpui dan a sawifiah a. State Project Director C. Lalthanzira'n Samagra Shiksha chungchanga pawimawhte a sawifiah bawk.

India rama Sawrkar damdawi in tha tehnaah Tawipui South PHC tling thar

Aizawl : India rama sawrkar damdawi In tha bik tehnaah August 14, 2025 khan Tawipui Primary Health Centre an tel thar a, heti hian Mizoram chhunga HWC-PHC 58 awm zinga 29 chuan National NQAS certificate an nei tawh a ni.

  National Health Mission, Health & Family Welfare Department chuan India rama sawrkar damdawi in tha bik tehna, National Quality Assurance Standards (NQAS)-ah Tawipui PHC chuan 84.78% an hmu tih a sawi.

  Heti hian Mizoram chhunga Sawrkar damdawi in 42 te chu NQAS national certificate nei tawh an ni a. Tunah hian sawrkar damdawi in 19-in state level certificate neiin national certificate result nghak mek 2 an awm bawk a ni.

National Sports Day hman dan tur rel

Aizawl: August 13, 2025 khan Minister Lalnghinglova Hmar, hovin a office chamber-ah August ni 29 a ‘National Sports Day, 2025’ hman dan tur rel a ni.Sports & Youth Services Department, Mizoram State Sports Council, Higher & Technical Department leh School Education Department hotute bakah NSS, NYK Aizawl hotute leh SAI Regional Director te an tel a ni.

  Mizorama ‘National Sports Day 2025’ lawmna pui ber chu August ni 29 ah SAI Training Centre, Mission Vengthlangah hman nise tiin meeting chuan a rel a. S&YS, MSSC, SAI officer leh staff te bakah Aizawl-a NCC leh NSS te, SAI leh KISCE trainee te chu group pali ah inthen in futsal (mipa), in arpa sual (mipa), volleyball (hmeichhia) leh inkawibah (hmeichhia) ah te an inel dawn a ni. 

Crore 82 Compensation tang hmalaksak turin ngen

Aizawl: August ni 12, 2025 tlai khan Lok Sabha MP Richard Vanlalhmangaiha chuan Border Road Organisation (BRO) Headquarter-ah an Director General, Lt. General Raghu Srinivasan chu a pisa ah a kawm.

   Richard Vanlalhmangaiha chuan Mizoram chhunga BRO enkawl kawngte leh hmasawnna hrang hrang an thawh mekte chu chak lehzuala hma la turin a ngen a. PUSHPAK Project hnuaia RCC bridge thawh mek chawlh lailawk te chu chhunzawm vat a nih theih nana hma la turin BRO Director Genenral hi a ngen bawk a ni.

  District pathum Lawngtlai, Siaha leh Champhai district-a Land Acquisition la pek fel lohte chu a hma lama pek fel a nih thuai theih nan hma la turin DG hi Mizoram Lok Sabha MP chuan a ngen bawk a. Siaha District-a Tipa-Laki-Lope-Lopu (LTTT Road) kawng laih meka Additionnal Compensation Cheng Vaibelchhie 82 la tang mek chu thifel thuai turin a ngen bawk a ni.

CM hovin Rally- Fight Against Drugs nei

Aizawl: Nasha Mukt Bharat Abhiyan (Drugs Free India Campaign) Mizoram State Level leh Aizawl District Level bultumin August 13 zing khan Aizawl-ah School leh College hrang hrang atanga zirlai 600 chuang ten kawngzawh (Rally- Fight Against Drugs) an nei a. Chief Minister Lalduhoma chuan a telpui.

  Hmun hnih, Chanmari leh Sikulpuikawn atangin kawng hi zawh a ni a, Lammualah lut khawmin Rally kharna buatsaih zui a ni. Chanmari atanga kawng zawhte hi Chief Minister hian a vailiam a, an zingah tel ve nghalin Lammual thlengin a kal.

  Chief Minister chuan, Mizoram hi ruihhlo siamna hmunpui Golden Triangle an tih mai depa awm kan ni a. A kal kawnga awm kan nih vangin ruihhlo hi hmuh tur a tam thin. Nimahsela, ruihhlo hian eng thil tha mah min pek loh avangin, kan ban phak lekah awm mah se kan ti ve tur a ni lo. A ruka zuarte pawh hi khawtlang hian hnawl ngam ang u. An phu tawk hremna hmu ngei rawh se. Mipuite tang tlang ila, he thil tha lo tak lakah hian kan hnam hi veng him ang u. Kan thalaiten eng ruihhlo mah hi lo ti chhin suh u. Tih chhin hi a bawiha luhna kawngka a ni, a ti. Ruihhlo bawiha tang mekte pawh huaisen taka kalsan ngam turin a fuih bawk.

Chief Minister leh minister pahnihin IEC Campaign on HIV hmanpui

Aizawl: I&PR Auditorium-ah Chief Minister Lalduhoma chuan Intensified IEC Campaign on HIV thawh hnihna leh HIV Test Drive Campaign 2025 chu August 12, 2025 khan a hawng. Lalrinpuii, Health Minister chu khualzahawm a ni a, Supply minister B. Lalchhanzova pawhin he hun hi a telpui.

  Chief Minister chuan, HIV hi kai tawh chuan a tihdamna a awm lova. A laka himna awm chhun chu invên chauh hi a ni. Invêng thiam tûr chuan, a chungchâng kan hriat a ngai a, uar taka kan inzirtir a tul hle. Tin, he natna hi hmun tinah a awm tawh avangin thingtlâng leh hmun kilkhâwr zâwk thleng phâk ngeia hma lâk a ngai, a ti.

  Kum 2024-25 sorkar kum chhûnga, HIV kai hmuh chhuah 68.13% hi sex atanga kai an ni tih thawktuten an sawi a, a dawttu chu ruihhlo ti thinte niin kai zawng zawng atanga teh a 29.25% an tling. Kan rama HIV darhna bul zaa 97.38 % hi Sex leh ruihhlo vang a ni.

DM&R Minister leh NDMA hotute inkawm

Aizawl : Disaster Management & Rehabilitation (DM&R) Minister Prof. Lalnilawma chuan August 12, 2025 khan National Disaster Management Authority (NDMA) hotute chu a pisa-ah a kawm a, DM&R Secretary K. Lalrinzuali leh official dangte an tel a ni.

  He hunah hian Mizoram chu khuarel chhiatna thlen nasatna hmun a nih anga district tina khuarel chhiatna hrang hrang leimin, tuilian, lirnghing leh adangte thlen theihna (Hazard Risk Vulnerability Analysis) enho a ni a. Mizoram chhunga khuarel chhiatna liantham lo thleng tawh hrang hrangte – 1992 Hlimen leimin, 1995 Siaha leh Lawngtlai-a ruahpui vanawn avanga chhiatna, 2013 Laipuitlang leimin, 2017 tuilian leh 2020-a Champhai-a lirnghingte pawh chipchiar taka enho a ni.

  DM&R dept official-te leh NDMA hotute chuan khuarel chhiatna avanga harsatna thleng thei tihziaawm dan (disaster mitigation) leh chhawmdawlna (rehabilitation) kawnga chak zawka thawhho dan tur hrang hrangte an sawiho a ni.

CM-in Thenzawl Peace City hmalakna UD&PA hotute sawipui

Aizawl : Chief Minister Lalduhoma chuan a office-ah UD & PA official pawimawhte kawmin, Thenzawl Peace City Master Plan siamtu tur zawnna kalpui meka an thlen chinte August 14, 2025 khan a sawipui. Chief Minister hi Vanlaldina Fanai, Commissioner & Secretary to CM in a tawiawm.

  Lalmalsawma Pachuau, Secretary, UD & PA chuan, thla liam ta July ni 22 a Master Plan siamtu tur zawnna hmahruai Request for Proposal for selection of Consultant an tihchhuah thu leh company lian tak tak sawm leh pariatten an rawn ngaihven thu a tarlang a. Heng Pre Bid Queries rawn nei zingah hian khawvel huapa company thate pawh an tel thu a tarlang.

Committee on Public Sector Undertakings ten CM hmu

Aizawl: Committee on Public Sector Undertakings, Mizoram Legislative Assembly te chuan August 11, 2025 khan Chief Minister Lalduhoma chu a office-ah an kawm a. Mizoram sawrkar hnuaia Public Sector Undertakings palite chungchanga an thil hmuh te an sawipui.

  H. Ginzalal, Chairman, Committee on Public Sector Undertakings chuan ZOHANDCO, MIFCO, MAMCO leh ZIDCO te kalpui zel dan tur, Committee in an rawtna neih tlangpui a sawi a. State dangahte an zin a, an kal dan an zir a. An thil zirte atanga ram tana tha ber tur nia an hriat report an siam a, House-a thehluh thuai a ni ang, a ti.