CM hovin Hand Holding Policy kalpui dan tur thlir

Aizawl : August 12, 2024 khan CM Conference Hall ah Chief Minister Lalduhoma hovin Mizoram State Policy Coordination Committee leh Implementing Department hotuten Hand Holding Policy kalpui dan tur (guidelines) an thlir ho.

   He hunah hian Chief Minister chuan, Hand Holding Scheme hi tlangzarh kan chak tawh a, tihtur tul la awm apiang te chin fel vat vat kan duh tawh hle. Kan sawi fo tawh thin angin he scheme hi bank te nena tangkawpa kalpui tur, central scheme awmsa thenkhatte nena convergence a kalpui tur a ni a ti.

   Member Secretary Lalmalsawma Pachuau, MSPCC leh Planning Secretary ni bawk chuan Hand Holding kalpui dan tur (guidelines) duan tawh te sawifiahna a nei a. ZIDCO MD LP Lalchangkima chuan Interest Free Loan kalpui dan tur leh guarantor-a sawrkar a tan dan tur ruahmanna te a sawifiah ve bawk.

Multi-Service Centre sakna tur lungphum

Aizawl : Social Welfare & Tribal Affairs, Women & Child Development Minister Lalrinpuii chuan August 12, 2024 khan Middle School Veng, Zemabawk-ah Mizoram Upa Pawl Multi-Service Centre sakna tur lungphum a phum. Minister hi Social Welfare & Tribal Affairs Director Dr. Lalhriatzuali Ralte, IAS chuan a tawiawm a ni.

   MUP Multi-Service Centre, Zemabawk hi Sawrkar laipui Ministry of Tribal Affairs hnuaia Article 275 sum cheng nuai 290 senga sak tura ruahman niin, hemi atang hian financial year 2023-2024 ah cheng nuai 100 hmuh tawh a ni.

Governor hovin Kawlphetha intodelh dan tur sawiho

Aizawl : Raj Bhavan Durbar Hall-ah Governor Dr Hari Babu Kambhampati hovin Mizoram chhunga Kawlphetha tam zawk siam tura hmalakna leh hmachhawp sawihona August 12, 2024 khan neih a ni a. He hunah hian Power Minister Pu F. Rodingliana pawh a tel a.

   Power & Electricity Department hotute, NEEPCO hotute leh Household Solar Electricity thlun hna thawktu private company aiawh ten Power Point Presentation an pe a. Uluk takin hmaklakna kal mek te thlirlet a ni a, chak zawka hmalak dan tur te sawiho a ni bawk.

CM leh Synod Social Front hruaitute inkawm

Aizawl : August 12, 2024 khan Chief Minister Lalduhoma chuan a office-ah Synod Social Front hruaitute a kawm.

   Chief Minister hian eirukna tibo tur leh eiruk chingte chunga dan anga hmalak anih theih nana Lok Ayukta an thuam chak chhoh mek dan te, India dan tharin a phut ang thlapa CBI hnena general consent an pek thu te, restricted tender chu dan ang thlapa kalpui an tum thu te social front hruaitute hi a lo hrilh.

   Synod Social Front hruaitute hian, kohhran chuan sawrkar hi tha taka thawhpui che u duh a. Mipui sawrkar tih ri ringawt pawh hi a mawi a ni. Chutihlaiin sawrkar kalphungah sawisel tur a awm chuan an sawi hreh dawn lo an ti ve bawk.

Mizo Diaspora Cell thukhawm

Aizawl : August 13, 2024 khan khawvel hmun hrang hranga Mizo awm te huikhawma a tul ang zela an tana hnathawk tura din Mizo Diaspora Cell te chu an Chairman Vanlaldina Fanai, Commissioner & Secretary to Chief Minister hovin CM Conference Hall ah an thukhawm.

   Tun tum hi Mizo Diaspora Cell te an thutkhawm vawi khatna a ni a. Tun hnaia ram dang leh state danga harsatna tawk sawrkarin an lo tanpui tawh dan report an ngaithla a. Placement Agency ten dan ang taka engkim an kalpui theih nana hmalak te, Labour, Employment, Skill Development & Entrepreneurship (LESDE) in Placement Rules an buaipui mek chu rang taka peih anih theih nana a tul anga bawhzui te an rel.

Larsap-in NIELIT tlawh

Aizawl : August 13, 2024 khan Mizoram Larsap Dr. Hari Babu Kambhampati chuan NIELIT (National Institute of Electronics and Information Technology), Zuangtui, Aizawl a tlawh a. NIELET Director Dr. T. Gunendra Singh, a thawhpui te leh zirlai naupang ten an lo dawngsawng.

   Larsap hian NIELIT building leh hmunhma te fangin, Cybersecurity Laboratory, Electronics Laboratory leh IT Laboratory te a tlawh bawk.

   Larsap chuan NIELIT hi thangkhat lian vel chauhva upa ala ni nâ-in, mi sang tam takin NIELIT hi an chhawr tangkai tawh a, tunah Lunglei NIELIT Extension Centre pawh bunfel tawh a nih thu ka hriat hian min ti lawm hle a ni, a ti.

   NIELIT a tlawh hriatreng nan Larsap hian Thingtiak(Lenhmui tiak) NIELIT kawtah a phun nghal a ni.

Tuihna humhalh leh Faina chungchang sawiho

Aizawl : PHE Minister Prof. Lalnilawma chuan a Pisa, MINECO ah Central Young Mizo Association (CYMA) hruaitute August 14, 2024 khan lengah sawmin tuihna humhalh leh faina kawnga thawhhona chungchang a sawipui.

   PHE Department leh Central YMA te hian kum 2012 atang khan 'Kan rama tuihna humhalh leh a awmsa tihpun' tih thiltuma neiin thawhdunna thuthlung an ziak a, hemi hnu hian thawhdunna thuthlung chhunzawmna tum hnih ziah a ni leh tawh.

   Tuna thawhdunna kalpui mek hi October ni 28, 2021 khan ziah niin kum 4 chhung, 2021-2025 thleng a awh dawn a, a zawh hnuah a tul anga ennawn leh tura tih a ni. Heng bakah hian kum 2017 atang khan tuihna humhalh bakah faina kawngah pawh an thawkdun tel bawk a ni.

Independence Day Pual Ruihhlo Do Kawngzawhpui

Aizawl : India ram Independence Day vawi 78-na lawmna atan leh ruihhlo dona atana Ruihhlo Do Kawngzawhpui – WALKATHON – Walk Against Drugs chu August 14, 2024 (Nilaini) zingkarah Excise & Narcotics Department chuan a huaihawt.

   He kawngzawha thupui chu – Together we can create a safer, healthier and drug-free community (Kan tanho phawt chuan khawtlang him zawk, hrisel zawk leh ruihhlo laka fihlim kan din thei ang) tih a ni. Ruihhlo Do Kawngzawhpui-ah hian Excise & Narcotics Department minister Lalnghinglova Hmar chu khuallian a ni.

   He kawngzawhpuiah hian School hrang hrang atangin zirlai 250 chuang an tel a. Central YMA OB leh Central YMA Kumpuan Committee te bakah Department thawktute leh ruihhlo dona kawnga mi thahnemngaite an vaiin mi 400 dawnin kawng hi an zawh a ni.

District & Sessions Judge, Aizawl-in mahni fanu pawngsualtu hrem

Aizawl : Spl. Judge POCSO Act, 2012 leh District & Sessions Judge Aizawl ni bawk Helen Dawngliani chuan ni 13.08.2024 (Monday) khan Judgment ti chhuakin, Aizawl District khaw pakhata a fanu naupang kum 13 mi mipat hmeichhiatna hman khawlohpuitu chu pawngsual thubuaiah thiamloh a chantir.

   He case pawi khawihna thlen hunlai hi kum 2020 kha niin vawikhat aia tam naupang kumtlinglo hi a pa in a pawngsual a, pawikhawihna hriat anih veleh Police hriattir an ni a, thubuai ngaihtuah chhungin Sawrkar lamin thuhretu 7 an nei a, thil tisuala puh hian thuhretu neih tul a ti lova, Court in a hrem ta a ni.

MSU leh RIPANS ten Aizawl DC kaihruaina hnuaiah inbiakna nei

Aizawl : Mizo Students' Union General Headquarters Aizawlin RIPANS hnalak chungchanga an hmalakna kal mekah August 14,2024 khan Aizawl DC Conference Hall-ah Aizawl DC Lalhriatpuia, MCS kaihhruainain MSU hruaitu leh RIPANS hotute chuan inbiakna an nei.

   RIPANS in June 25,2024-a Employment Notice an chhuaha Post 14 awmah Scheduled Tribe quota seat 1 chauh dah a ni chu MSU chuan dahbelh turin a ngen a, RIPANS hotute hian Central lam hotute dawrin DOPT-ah file hi lut tawhin MSU te chu lo nghak hram turin a ngen a, DOPT insiamrem lai anih avangin MSU chuan zahawm an ti a, hemi chhunga hnalak dang awm reng rengah Local Preference duhsak bik ni se an ti. RIPANS-in employment notice a chhuaha post 14 a post 4 Unreserved post dahah pawh Local mi ngei lak nise an ti bawk.

Operation Ginger 2024 nei tan

Aizawl : Mizoram hmun hrang hranga Sawhthing tam mek zirchiang tur leh hmalakna kalpui turin 16/8/2004 atang khan District tinah 'Operation Ginger 2024' an a, hemi atana inbuatsaih nan August 13, 2024 khan Horticulture Department-a Officer te leh Field Staff ten Sawhthing tam leh natnate ven dan leh enkawi dan zirin 'Training of Trainers for Operation Ginger' an nei.

   Kumin hian Mizoram-ah Sawhthing ching an tam a, tun hnaiah district hrang hrang atangin Sawhthing tam sawi a tam tan hle a, Horticulture Department chuan hma la nghalin District tina DHO ten report an thehluh a, tun thlenga report chinah khaw 263-a Sawhthing chingtu chhungkaw 6586 te Sawhthing a tâm tan tawh a ni.

Kawng siamthain YMA an hnatlang

Aizawl : 12.8.24 khan Taitesena Group YMA memberten NH 108 Tuidam -Darlak (via Sabuallui) kawngpui siamthain hnatlang an nei a, YMA member mi 600 chuang zet an thawk chhuak.

   Hnatlangte hian kawng khuar lutukte boulder hmanga hnawh leh kawnga leivung/chirh paih fai hna an thawh bakah, kawng zartu thingkih leh kawngba vai hna an thawk a ni.

Nuai 25.76 man Kuhva ro man leh

Aizawl : Assam Rifles leh Custom te hma an laknaah nimin August 12, 2024 khan Ngur, Champhai-ah Kuhva ro bag 46, heng an thil man cheng nuai sawmhnih panga leh sing sarih leh sang ruk man hu a chhut a ni.

   Assam Rifles leh Champhai-a inkulh Custom Preventive Force te hian an thudawn bawhzuiin hma an la a, heng an thil man Kuhva ro te hi Custom Preventive Force Champhai te hian chhui zui tana an kawl nghal a ni.