Serlui hnar-ah leivung leh hnawm paih khap

Aizawl : Aizawl District Bawrhsap Nazuk Kumar chuan Engineer-in-Chief, PHED, Mizoram, Aizawl atanga ngenna lehkha hmuh angin, fur laia Aizawl Water Supply Scheme tana hnianghnar taka tui pe thei tur Serlui 'A' Gravity Water Supply Scheme awmna Serlui hnar lamah lung, leivung leh thingtum te paih thin khapna chu August 14, 2023 khan a tichhuak.
Khapna hmun te : 
1) Serlui hnar dungah mi tumahin leivung an paih tur a ni lo.
2) Lui dungah lung lak khap a ni.
3) Thing kih hnawk te lui ah an paih mai mai tur a ni lo.
    He thupêk hian thla hnih (2 months) chhung a huam ang a. Thupêk bawhchhia an awm a nih chuan Section 188 IPC dân hmangin an chungah action lâk a ni ang.

RD Minister in sawrkar laipui dawr

Aizawl : 14.8.2023 khan Rural development Minister Lalruatkima chuan Ministry of Rural development hnuaia official te dawrin Mizoram mamawh te a thlen a, Ministry of Rural development, GOI hnuaia Rural Housing lam changtu Deputy Director General (RH) Gaya Prasad chu a pisa ah hmuin inkawmna hun a neihpui.
    He an inkawmna ah hian Mizoramin a mamawh mirethei leh harsa zawk te tana insak tanpuina (Rural Housing) chungchanga harsatna tam tak Mizoramin a tawhte sawipuina a nei a, Deputy Director General hian tun kar chhungin Mizoram tan Rs. 60 Crore released a nih nghal tur thu RD Minister hi a lo hrilh a ni. Deputy Director General (RH) hian Mizoram chu Rural Development Minister tha tak leh chak tak, mahni hna a in pe zo tak a neih avanga lawmawm a tih thu leh duhsak tlak a nih thu a sawi bawk a ni.

Independence Day vawi 77 na lawm

Aizawl : India Independence Day vawi 77-na chu August 15, 2023 khan India ram hmun dangte rualin Aizawl Lammual-ah lawm a ni a. Khuallian Chief Minister Zoramthanga chuan zing dar 8:00-ah India Hnam Puanzar pawt pharhin Parade Contingent 27 te chibai a chhang let.
    Mizoram mipuite leh khawvel hmun tinrenga India khua leh tuite duhsakna hlanin; kum 200 chuang zet awpbeha awm tawh India ramin zalenna a hmuh theih nana beitu hruaitu hmasate leh tha thawhtute zahna chibai a buk a ni.
    Zalenna boruak nuam tak hnuaiah India ram hmun dangte ang bawkin Mizoramin hmasawnna a hmu nasa tih sawiin; kumin phei chu India ramin G-20 Presidency a chelh kum a ni a, he mawhphurhna zahawm tak hi tha taka a hlen theih nan ram chhung hmun hrang hrangah inkhawmpui buatsaihin Mizoram pawhin G-20 Business – 20 Conference March ni 2, 2023 kan kan thleng a, ram 17 atangin palai an rawn kalkhawm a ni, a ti. 

PUC-in an kum 65 na pual hun hmang || Charity-ah Cheng 2,40,000 pe

Aizawl : August 15, 2023 kha Pachhunga University College Foundation Day vawi 65 na a ni. Kum 65 tlin lawmna hi August 16 hian an college seminar Hall-ah  an hmang a, Mizoram University Registrar Prof. Lalnundanga chuan khuallin niin a hmanpui. Home pali hnenah cheng sing ruk theuh an hlan.
    Chief Guest Prof. Lalnudanga chuan PUC-in hlawhtlinna a lo neih tawh te chu fakin, hmabak an la neih te huaisen taka hmachhawn a pawimawh zia a sawi. "Hlawhtlinna tam tak kan lo hmu tawh, eng nge hma kan sawn leh na tur?," a ti. Kalkhawm te chu inpekna leh tumruhna a awm loh chuan hlawhtlinna a awm loh thu a hrilh a, tumna sang zawk neia hmachhawn zel turin a fuih. 

I&PR Minister hovin N. Delhi-ah I-Day lawm

Aizawl: I&PR Minister Lalruatkima chuan August 15 khan India ram zalenna champha vawi 76-na lawmna hun New Delhi Mizoram House tualzawla buatsaih chu a hmanpui. Hnam puanzar pawt pharhin Independence Day 2023 pual thuchah a sawi a ni.
    Lalruatkima chuan Independence Day pualin mipuite leh Sawrkar hnuaia thawktute duhsakna chibai a hlan a. India ramin zalenna kum 76 zet  a neih hnuah remna leh muanna tluan tling Mizoram pawhin neiin, State puitling dinhmun kum 38 zet kan lo chuangkai ve ta a, hmasawnna chi hrang hrang a hmu chho mek zel hi a lawmawm takzet a ni, a ti a. 

Bravehearts of Mizoram tlangzarh

Aizawl: Governor Dr Hari Babu Kambhampati chuan August 16, 2023 khan ama hmalakna anga Raj Bhavan-in a buatsaih lehkhabu, Mizoram mi leh sa, India Sipai huaisen 56 te chanchin tawi tarlanna, “Bravehearts of Mizoram” chu a tlangzarh.
    Tlangzarhna program, Banquet Hall, Raj Bhavan a neihah hian Martar te chhung leh khat, mi 20 chuang an tel thei a ni. Lehkhabu tlangzarhna hunah hian Governor chuan Martar chhungte hnenah lawmthu a sawi hmasa. An hmangaih kal ta te chu kan tana pasaltha, mihuaisen leh Martar te an ni a ti. Lehkhabu te hi Martar chhungte hnenah Governor chuan a hlan a ni. 

Sawrkar hnathawkte'n badge dum an bel

Aizawl: Mizoram sawrkar hnathawkte chuan August 17, 2023 atang khan badge dum an bel a, hei hi dan anga DA rate hman an phut lantirna a ni. 
    Mizoram sorkar hnuaia thawk pawl hrang hrang intelkhawmna, Federation of Mizoram Government Em-ployee & Workers (FMGEW) Executive Committee tun hnaia thukhawm chuan, sorkar notification ding lai anga dearness allowance (DA) rate hman phut nan badge dum bel an lo rel tawh a ni.
    FMGEW chuan, DA chungchang sawipui tura Chief Minister an ngenin awmzia a nei thei lo tih sawiin, DA pek phut nan August 17-18, 2023 khan FMGEW member zawng zawngte chuan badge dum an bel a ni.

Pineapple Processing Plant’ lungphum phum

Aizawl: August 17 khan Sustainable Development Goals pakuana - ‘Fostering Industry, Innovation, Infrastructure and Livelihood Oppurtunities at Sialhawk, Lungleng and Seling’ hnuaia hmalakna pakhat ‘Pineapple Processing Plant’ lungphum phumna chu Sialhawk-ah neih a ni a, Deputy Chief Minister Tawnluia chuan he hun hi khuallian niin a hmanpui.
    Tawnluia chuan Sialhawk khuaa Pineapple Processing Plant bul tan a ni thei ta chu lawmawm a tih thu a sawi a. Sialhawk khawtlang, Village Council, Pineapple Growers Society-te tawiawmnaah lawmthu sawiin Pineapple Processing Plant chu Sialhawk mipuite taimakna leh thahnemngaihna in hrinchhuah a ni, a ti.

World Photography Day Exhibition

Aizawl : World Photography Day Kum 184-na pualin August 17, 2023 khan Mizoram Shool of Photography leh Photography Club of Mizoram te buatsaihin Milliennium Center Atrium-ah Photo Art Exhibition Vawi 7-na neih a ni. K. Vanlalvena, Mizoram Rajya Sabha MP, chuan Khuallian niin a hman pui. He Photo Exhibition hian ni 3 chhung a awh.
    K. Vanlalvena chuan World Photography Day Kum 184 na puala Mizorama hman a ni chu lawm awm a tih thu a sawi a. Photography tangkai na te sawiin Document pawimawh a nih dan te a sawia, thu a sawi mai a fiah tawk loh chang a fin fiah na a tan te a tangkai a ni a ti. Thlalak leh mihring nun hi tun ah chuan a inzawm tlat tawh a, chu mai bak ah mi tam takin eizawn nan an hmang a, Eizawnna tling leh tha a nih thu a sawi bawk.

Kum Upa te tan Free Clinic buatsaih

Aizawl : National Mental Health Programme (NMHP), National Programme for Health Care of Elderly (NPHCE), National Health Mission (NHM), Health & Family Welfare Department Mizoram leh Alzheimer's and Related Disorders Society of India (ARDSI) Mizoram Chapter tangkawp chuan August 17 khan Chanmari YMA Hall-ah kum upate pualin Free Clinic an buatsaih.
    He hun hi Dr. Eric Zomawia, Managing Director, National Health Mission (NHM) chuan a hmanpui a. "Hrisel tak leh harh vang taka dam rei" tih thupuia hmangin district tina Health and Wellness Centre awm thu leh heng hmunah te hian mi thiam rawn theih reng an nih thu a puangzar. Rilru lam harsatna neite tan TeleMANAS helpline 14416-ah engtik lai pawha biak rawn theih an nih thu a sawi. He hunah hian mi 100 an inentir a ni.

Mumbai-a zawrh tur Lakhuihthei vailiam

Aizawl : 17.8.2023 khan Agriculture Director James Lalsiamliana, Mission Organic Mizoram (MoM) Mission Director chuan Tuichangral Organic Farmer Producer Co. Ltd te tharchhuah Lakhuihthei quintal 6 chu Mumbai-a Josie’s Kitchen, North East Cuisines pan turin a vailiam.
    Agriculture Minister C.Lalrinsanga chuan lakhuihthei quintal 5 a lo vai liam tawh bawk a. Lakhuihthei te hi Mizoram State sorkar enkawl Mission Organic Mizoram leh Clover Organic Pvt. Ltd. te tangkawpin Central Scheme - Mission Organic Value Chain Development for the North Eastern Region (MOVCD-NER), Phase-III kaltlanga an thawn chhuah a ni.