Kum 60 hnuah Zoramthanga Degree Certificate hlan

Aizawl: MNF President Zoramthanga, Chief Minister hlui chuan August 20, 2026 chawhnu dar 2:30 khan ama puala hun buatsaih, Special Lecture-Cum Interactive Programme chu Gauhati University, Phanidhar Dutta Seminar Hall-ah khuallian niin a hmanpui.

  MNF President Zoramthanga hi kum 1966-a Gauhati University hnuaia awm thin D.M (Dhanamanjuri) College, Imphal aṭanga Bachelor of Arts a lo pass tawhna Certificate chu Gauhati University chuan August 20, 2026 khan an hlan a. Zoramthanga hian D.M College aṭang hian English Major lain final year a exam zawhah ram leh hnam tan zalenna suala Laldenga kaihhruai MNF movement a zawm tak avang leh inremna awm hnuah pawh politics ah a hun pum a hman zui tak avanga B.A Degree Certificate a lak ve tak loh chu hlan a ni ta a ni.

  Certificate hlanna neih zawh hian Special Lecture-Cum Interactive Programme neih zui niin Gauhati University zirtirtute leh zirlaite nen zawhna leh chhanna hun neih zui a ni bawk.

Assam atanga lakluh ASF kai vawk 45 leh phur tute man

Aizawl: Thawhlehni khan Assam aṭanga dan lova Mizoram lama vawk phurh luh, vawk puitling 45, Aizawla talh tura lakluh nia sawi te chu Zamuang-ah a phur luttu mi 5 te nen man an ni.

  Thu lakna tarlan danin, heng vawkte hi Assam lam aṭanga lokalin, lirthei 5 hmangin phurh luh a ni a. Zawlnuam Vety Check Post helin an kal a, Zamuang-ah man a nih hnu-ah Mamit panpui leh an ni.

  Heng vawkte leh a phurhna lirthei te hi man niin, District Bawrhsapin 'criminal complaint' thehlutin, Vety doctor ten 'random test' an tih hnu-ah African Swine Fever (ASF) an ni tih hmuhchhuah a ni a. Court thupek angin kahhlum vek an ni.

H. Lalramdinpuii Mualthuam North thattu hrechhuak

Aizawl: H. Lalramdinpuii, Mualthuam North thah a nih chungchanga Lunglei Police chuan he thubuai hi rei tak an ngaihtuah hnuah Denghmingthanga (20) leh Lalneihkima (34), Mualthuam North ve ve te chu August 20, 2025 khan an inpuang tih thuchhuah an siam.

  Lunglei Police chuan BNS hnuaia thubuai chu Lunglei Police Special Investigation Team (SIT) ten a tir atangin uluk takin hma an lain an chhui zui a. Rinhlelh kai thei tur thil awmte chhui chian nan mi hrang hrangte koh an ni a, Denghmingthanga (20) leh Lalneihkima (34), Mualthuam North ve ve te chu vawi tam tak thu zawh fiah turin koh an nih hnuah 20.08.2026 hian hemi te pahnih hi Lunglei Police SIT te hmaah an inpuang ta a ni, an ti.

  Inpuanna an neih hnu hian dan angin hemi ni chawhnu dar 1:00 PM khan man nghal an ni a, danin a phut angin Judicial Custody-ah dah nghal an ni bawk. 

Mizo Handloom Conclave ah cheng nuai 130 hu inhralh

Aizawl : Sorkar laipuiin National Handloom Day lawm tura state tinte a beisei angin Handloom Day pual programme an buatsaih a. Commerce, Industries, Geology & Mining Department (CIG&M) pawhin August ni 7 atang khan ni 14 chhung awh Mizo Handloom Conclave chu Millennium Centre Rooftop ah buatsaihin August ni 20, 2026 khan khar a ni.

  Exhibition chhung hian tlawhtu ni 14 chhungin tlawhtu mi 75,000 awm anga chhinchhiah a ni a. Hemi chhunga hralhchhuah zawng zawng zat chu cheng 130,00,000/- bawr vel a ni.

  Sawrkar laipuiin a ruahman angin kum 2015 atang khan kumtin August ni 7 chu National Handloom Day a hman thin a ni a. Mizoram pawh kumin hian a vawi 12 na lawmna neih a ni.

Adviser to Chief Minister-in Sakawrtuichhun panna kawng endik

Aizawl: Adviser to Chief Minister (Finance & Planning) leh bialtu MLA ni bawk TBC Lalvenchhunga chuan August 20, 2026 khan Sakawrtuichhun panna kawng, Ramrikawn—Zihnghalkawn inkar kawng siam mek chu a hmunah kalin a endik.

  TBC Lalvenchhunga chuan Ramrikawn—Zihnghalkawn kawng siam mek chungchangah hian "Joint Action Committee on Sakawrtuichhun Road" te chuan thuneitute hnenah lehkha an thlen tawh thu sawiin, khawtlang hruaitute nen an inbiak fo thu leh a line department leh central ministry lamah pavement siamna atan chak taka funding bawhzui mek a nih thu a sawi.

ZMC&H-ah a vawikhatna atan Lung Zai hlawhtling takin nei

Aizawl: August 19, 2026 khan a vawikhatna atan Zoram Medical College & Hospital (ZMC&H)-ah Open Heart Surgery (Coronary Artery Bypass Graft) chu hlawhtling taka neih a ni.

  Lung zai thiam Cardiothoracic Surgeon Dr Mary Hmingthantluangi leh phai lam atanga doctor thiam lo kal, Dr. Intekhab Alam, Cardiothoracic Surgeon, Apollo Excel Hospital, Guwahati ten hlawhtling takin damlo kum 69 mi hi an zai a. Damlo hian thla 6 kalta khan Heart Attack neiin, Lung natna ah chuan zai hautak ber chi - Triple Vessel Disease natna a vei a; darkar 6 leh a chanve chhung zet an zai a ni.

  Phai atanga Cardiothoracic Surgeon lo kal pawh hian he Open Heart surgery atana Surgery Team, Anaesthesiology Team leh Nursing leh mi dangte inbuatsaihna tha a tiin, a fak hle. Damdawi In lam hotute pawhin Lung zai hi an ngaihven a, ngun takin an vil reng a ni.

UD&PA Minister-in ‘Zo Hall’ a hawng

Aizawl: Aizawl Smart City Ltd. (ASCL) hnuaia sak 'Zo Hall', Chaltlanga mi chu August 19, 2026 khan Urban Development & Poverty Alleviation (UD&PA) Department Minister K. Sapdanga’n khuallian niin a hawng. Tourism Department Minister Lalnghinglova Hmar chu khualzahawm a ni.

  Zo Hall hi Urban Development & Poverty Alleviation (UD&PA) Department hnuaia Aizawl Smart City Mission hmalakna pakhat niin, Aizawl Smart City Ltd. (ASCL) ten an sak zawh hnuah Tourism Department kutah an enkawl zui tura hlan a ni. Zo Hall, Chaltlang hi cheng 18,92,93,390/- senga sak a ni a. Zo Hall-ah hian hmanraw pawimawh leh hmunhma pawimawh tak tak dah a ni.

MLP (Amendment) Act 2025 hnuaiah manufacturing licence mi 11 hnenah pechhuak

Aizawl: Chief Minister Lalduhoma hovin August 19, 2026 khan a pisaah Mizoram Liquor (Prohibition) Amendment Act, 2025 hnuaia Local Fruit Beer manufacturer leh Winery licence pekchhuah tur thlangtu tura din Selection Committee-te an thukhawm a, dilna 99 lut zingah Selection Committee-in a endik tawh mi/firm 11 pawm an ni. Meeting hi Excise & Narcotics Department Minister Lalnghinglova Hmar chuan a telpui.

  Local fruit beer siam dil hi mi 96 leh Winery din dil mi pathum an awm a. Selection Committee chuan diltute tan interview a buatsaih bakah a a theih ang angin a hmunhma an endik a. Endikna behchhana Selection Committee in rawtna a siam atangin vawiina meeting chuan local fruit beer siam dilna 11 a pawm a, dilna dang 13 te chu hun pek belh a, endik leh phawt nise, an ti.

PWD Minister Vanlalhlana’n Ngaizel lung tlakna enfiah

Aizawl: PWD Minister Vanlalhlana chuan August 19, 2026 khan Ngaizel lung tla thin laka kawngpui âna awm te leh kawngpui zawhtu mipui leh lirthei te an him zawk nan a, ADDMA, PWD, G&M ten lung tla mai thei tur an karthlak (Scaling) zawh tawh te leh lung tla te direct taka kawngpuia an tlak lohna tura kopang/kham tuam hna “draping” an thawh te a enfiah.

  Ngaizel kham/kopang tuam nan hian Green Draping HDPE roll 13 hman niin, cheng nuai ₹19 sen a ni. He Green Draping HDPE hi ADDMA (Aizawl District Disaster Management Authority) in a lei a ni.

  Minister chuan tuna “Green Draping HDPE” aia tha zawk leh tlo zawk tur “Shotcrete” hmanga lungtla te venna tur Shotcreting Machine (wire mesh a tuama, cement, balu, etc. chawhpawlh a phuhna khawl) leina turin PWD lamin proposal te siamin, Shotcreting Machine leina tur hian Quotation koh mek a ni a, estimate nen an la submit thuai dawn a ni, a ti.

Impact Study Committee ten Final Draft Report an thehlut

Aizawl: Impact Study Committee on KMMTTP and Railway Link between Bairabi and Sairang-te chuan August 19, 2026 khan Chief Minister Lalduhoma hnenah an zir thil chianna Final Draft Report an thehlut.

  Chief Minister hian Impact Study Committee-te chu lawmthu lo hrilhin, thla 12 chhunga report thehlut tura tih an nih laiin thla 10-ah an rawn inpeih thei chu an thawkrim tih a chiang hlein a hriat thu a sawi. Bawhzui ngaite sawrkarin a bawhzuina kawngah study team-te thawhpuina an mamawh zui zel dawn a ni, tiin lawmthu a hrilh a, sawrkar an thawhpui zel a tul thu a hrilh.

  Study Committee hi an Chairman T. Lalhlimpuia, MLA chuan a ho va, Zomuana, Member Secretary leh member dangte an tel a. An report kimchang hi a buin an siam a, an zirchianna tinah rawtna an siam zel a, a taka bawhzui kawngah pawh sawrkar an thawhpui zui zel dawn a ti.

Indane EXTRALITE NOW FTC gas cylinder tlangzarh

Aizawl: Food Civil Supplies & Consumer Affairs Department Minister B. Lalchanzova chuan August 18, 2026 khan State Guest House, Chaltlang-ah, Indane EXTRALITE NOW FTC Gas cylinder chu mipui vantlang hman theih turin a tlangzarh.

  Indane EXTRALITE NOW FTC gas cylinder pangngai aiin a zan zawk bakah, a chhung lang tlang thei tura siam a nih avangin gas tui awm zat a hmuh theih a ni a, refill hun tur pawh awlsam taka hriat theih a ni dawn a ni. Gas cylinder thar hi 10 kg composite cylinder (fiber glass) hmanga siam a ni a, tuiek (rust) ve lo tur leh kangmei chhuak thei lakah pawh him zawk tura beisei a ni.

  Cylinder hi hmang tura in-register leh refill duhte tan Indian Oil ONE App leh Indian Oil Customer website (cx.indianoil.in) atang te a tih theih tura ruahman niin, Whatsapp booking pawh tih theih tura hmalak mek a ni a. Vawikhat in-register man hi cheng 4900 vel niin, a refill man hi cheng 1800 vel ni tura ruahman a ni.

CM Lalduhoma MGYA Golden Jubilee lawmna a hmanpui

Aizawl: Chief Minister Lalduhoma chuan August 18, 2026 khan Dawrpui Multipurpose Hall-ah Mizoram Gorkha Youth Association (MGYA) Golden Jubilee lawmna hun chu khuallian niin a hmanpui a, Golden Jubilee Lungphun a hawng.

Central YMA President R. Lalngheta pawhin a telpui bawk.

  Mizorama Gorkhate hi British lo luh rual khan an lo lut ve nghal a, an pension hnuah an rama kir tawh lovin Mizoramah an khawsa zui zel a, a hunlai khan sawrkar pawhin an chenna tur hmunte a ruahmansak a, an hnam dan anga an inenkawlna turte pawh a siamsak a. Kum 1950 chhiarpuiah khan Aizawl District-ah mi 2557 an awm tling tawh a, tunah hian mihring 8000 vel Mizoramah hian an awm mek a ni.

  Mizoram Gorkha Youth Association hi kum 1976 August ni 18-ah Khatla Venga Gorkha thalaiten bul tanin an din a, Mizoram pum huapin kum 1976-ah a kal tan a, tunah hian Branch 17 an nei mek a ni.

Minister Dr Vanlalthlana’n nurse-te tana buatsaih State Level Workshop hawng

Aizawl: Minister Dr Vanlalthlana chuan August 17, 2026 khan Mizoram College of Nursing (MCON) Hall, Falkawnah nurse-te tana buatsaih “Clinical Skills and Competency for Nursing Managers” workshop a hawng.

  He State level Workshop hi Multi-Modal Training and Teaching Centre (MMTTC), Mizoram University, leh Continuing Nursing Education, ZMC&H te tangkawp buatsaih a ni a. Nursing Manager te thiamna tipung tur leh hruaitu (leader) tha an nih theihna tura inzirtirna atan he workshop hi August ni 22 thleng neih a ni.

Chief Minister-in MHIP General Headquarters Building Lungphum a phum

Aizawl: Chief Minister Lalduhoma chuan Mizo Hmeichhe Insuihkhawm Pawl (MHIP) General Headquarters Building, Treasury Square-a sak thar tur lungphum chu August 17, 2026 khan a phum.

  MHIP General Headquarters Building hlui hi April ni 20, 1993 atangin luah tan a ni a. Building thar hi a hmun ngaiah, SASCI 2025-26 sum cheng nuaih zathum leh sawmsarih (Rs. 3.70 crore) senga sak tura ruahman a ni.