UD&PA in Aizawl Hmathlir buatsaih

Aizawl : August 22, 2024 khan Aijal Club R.B McCabe Hall ah Urban Development & Poverty Alleviation Department buatsaihin Aizawl Hmathlir buatsaih a ni a. Chief Minister Lalduhoma chuan he hun hi a telpui.

   Dr. Andrew H. Vanlaldika, Director, UD & PA chuan thupui pahnih: Aizawl khaw chhunga veivahna tha zawk ruahmanna (Aizawl Sustainable Urban Transport Project) - Ropeway/cable car, city bus service changtlung zawk, corridor & junction improvement, skywalks, regional Truck, Bus & Maxi Cab terminals, vertical mobility, multi level off street parking leh Assam Rifles insawn huna ram hman dan tur an ruahmanna te a lem nena entirin sawifiahna a nei a. Aizawl Sustanable Urban Transports Project bik hi Asian Development Bank funding hmanga thawh tura duan a ni.

   Lalchuangkima, CEO, Aizawl Smart City chuan thupui pahnih "Aizawl- Khawpui fai" tih leh "Integrated Command & Control Centre (ICCC) hman tangkai dan tur" hmangin thusawina a nei bawk a.

AMC Ward VI By-Election nei zo

Aizawl : Vawiin khan Aizawl Municipal Corporation hnuaia Ward VI atan Corporator thlanna By-Election buatsaih chu 22.08.2024 khan neih a ni. AMC Ward VI ah hian vote tla percentage chu 47.38% a ni.

   He inthlannaah hian Candidate pathum - Chawnghmingthanga (BJP), H. Lalremtluanga (Zoram People's Movement) leh Lalrinfeli (Independent) an awm a. AMC Ward VI Corporator ni lai boral avanga seat ruak hnawhkhat tura By-Election hi buatsaih a ni.

Lok Ayukta Judicial Member leh MPSC Member thar lalut

Aizawl : Governor Dr Hari Babu Kambhampati chuan August 22, 2024 khan Mizoram Lok Ayukta Member leh Mizoram Public Service Commission (MPSC) member thar te chu rinawmna thu tiam tirin a lalut a. Mizoram Lokayukta Judicial Member ruat thar hi Joel Joseph Denga, MJS Retired niin MPSC Member ruat thar hi K. Lalhmingliana, MCS Retired a ni thung.

   Swearing in Ceremony program hi Dr Renu Sharma, Chief Secretary chuan a kaihruai a. He hunah hian Chief Secretary chuan appointment order a chhiar chhuak hmasa, hemi hnu hian Governor Dr Hari Babu Kambhampati chuan Mizoram Lok Ayukta Judicial Member thar leh MPSC Member thar te chu rinawmna thu tiam tirin a lalut a ni.

   Mizoram Lok Ayukta Member leh MPSC Member thar lakluhna Inkhawmah hian Chief Minister Lalduhoma a tel a. Speaker Lalbiakzama, Cabinet Minister te, Minister te, MLA te leh mi pawimawh dangte an tel tha hle a ni.

Zoliana Royte Memorial Indoor 5S Hockey Tournament

Aizawl : Sports & Youth Services Minister Lalnghinglova Hmar chuan August 19, 2024 khan LPS Arena, Falkland-a Zoliana Royte Memorial Indoor 5S Hockey Tournament buatsaih chu khuallian niin a hawng a, Sawrkarin infiamna uar bik tur a thlan zingah hockey a tel thu a sawi.

   Zoliana Royte (L) Indoor 5S Hockey tournament-ah hian mipa team 18 leh hmeichhe team 15 an chhuak a, pool pali ah ve ve then niin, pool tina a sang te’n knockout stage an khelh a. Nizan khan final leh tournament kharna neih a ni.

CM hovin Mizoram State Council on AIDS thukhawm

Aizawl : August 19, 2024 khan Mizoram State Council on AIDS te chu an chairman Lalduhoma, Chief Minister hovin CM Conference Hall-ah an thukhawm.

   National AIDS Control Organization (NACO) hnuaia estimate lam thiamten kum 2023 a Mizoram dinhmun an chhut danin puitling zinga za zela 2.73 (%) te hi HIV kai thei (state wise Adult HIV Prevalence in % in 2023) dinhmuna ding niin a ngai a. Hei hi India ramah a sang fal hle a, national level chu 0.2% chauh a ni. Hetianga Mizoram prevalence rate a san chhan hi Mizoramin HIV kai hmuhchhuah tam vanglai (peak level) a thlen tlai bik vanga ngaih a ni.

   MSACS thawktute hian tuna an kal dan anga HIV/AIDS do hna hi tha taka a kal zel chuan a darh zel tur hi khuahkhirh theih hun a la thleng theiin an ring.

Sports Meet neih hun tur leh hmun turte duang

Aizawl : Mizoram Civil Services Sports & Cultural Association chu Director, Sports & Youth Services office chamber-ah 19.8.2024 meeting neiin Sports Meet neih hun tur leh hmun turte an duang.

   Meeting-ah hian Annual Sports Meet neih dan tur an rel a, Badminton, Table Tennis, Chess, Carrom, Chinese Checker, Tennis leh Cultural Items-ah te inelna hi buatsaih an rel.

CM hovin Lunglei High Powered Committee thukhawm

Aizawl : High Powered Committee Lunglei te chu an Chairman Lalduhoma, Chief Minister hovin August 19, 2024 khan a office-ah an thukhawm.

   Meeting-ah hian HPC dan ang taka kalpui dan tura hmalak an rel bakah Lungleia Multi Level Car & Smart Parking leh Ring Road project siam an rel a. HPC Fund hman dan phung pawh tlem tihdanglam an rel a ni. Heng bakah hian Serkawn Bazar Shed thar sak chungchang te, Agricultural link road laih chungchang te, Mizoram chhim lama Airport siam chungchang leh thil pawimawh dang te an sawi bawk.

World Photography Day vawi 185-na A&C Minister hovin hmang

Aizawl : August 19, 2024 khan Vanapa Hall-ah I&PR Department, Mizo Photographers' Society (MPS) leh Photography Club of Mizoram (PCOM) tangkawp te'n World Photography Day vawi 185-na pualin programme an buatsaih a. Art & Culture Minister C. Lalsawivunga chuan khuallian niin programme a hmanpui.

   World Photography Day pual hian thlalak inelna buatsaih a ni a. Photographers 97 ten thlalak 468 an thehlut a ni. Heta a tha zual 100-te hi Exhibition gallery-a phochhuah an ni. Thalak te hi Category 3: One Earth, Colour leh Monochrome-ah thenin, Category tinah lawmman 1-na atangin 3rd thleng leh consolation prize mi 5 hnenah pek theuh an ni bawk.

4 star emaw a aia sang Star Hotel-a siam dan tur an rel

Aizawl : August 19, 2024 khan CM Conference Hall-ah Empowered Committee for Investment te chu an chairman Lalduhoma, Chief Minister hovin an thukhawm a, Chaltlang Tourist Lodge tun aia changkang zawk, 4 star emaw a aia sang Star Hotel-a siam dan tur an rel.

   India hmarchhakah hian Star Hotel 57 a awm mek a. Heng star hotel te hi private enkawl vek niin, sawrkar hmunhma a nih pawhin private firm te enkawltir vek an ni. Mizoram-ah Star hotel hi a la awm ve lo. Mizoram-in Sustainable Investment Policy a neih tak avangin nikum atanga hmalakna lo kalpui tan tawh Chaltlang Tourist Lodge Star Hotel atana thuam that chungchang hi bawhzui a ni leh ta a ni.

Redressal Portal 'Vahui' tlangzarh

Aizawl : Health & Family Welfare Minister Lalrinpuii chuan August 19, 2024 khan Health & Family Welfare Department hnuaia Office leh Damdawiinte laka vuivaina leh lungawilohna thlen duhte tana Online hmanga thlen theihna tur Online Grievances Redressal Portal 'Vahui' tia vuah chu a Office Chamber, MINECO ah a tlangzarh.

   Vahui Online Grievance Portal hi Health Facility leh Office zawng zawngah Grievance Redressal Committee din niin Nodal Officer-te ruat an ni a. www.vahui.in ah vuivainate thlen tur hian mimal information ziah luh hmasak a ngai a, a ziakluttu phone number-ah Tracking ID SMS in pek a ni ang a, he ID hmang hian an thu thlen chu a thlen chin a chhui theih a, thuneitute'n an chinfel hnuah SMS in chinfel a nih thu hriattirna a dawng ang a, web portal-ah hian chinfel a nih dan a chhuizui theih dawn a ni.

Hostel-ah heroin Hawng 15 man

Aizawl : Excise & Narcotics Department leh Kumpuan Committee, CYMA thawkdun chuan August 20, 2024 zan khan Heroin gram 197 (Hawng 15) an man.

   Excise & Narcotics Department leh Kumpuan Committee, CYMA thawkdun chuan August 20, 2024 (Thawhlehni) zan dar 11:55 khan NRSPG Hostel, Room No. 15, Bawngkawn veng ah Heroin gram 197 (Hawng 15) leh a neitu nia puh – Lalnipuia (29) s/o K. Zilua, Republic veng, Aizawl, tuna Bawngkawna khawsa mek nia inchhal chu an man.

Ambulance driver-in nau chhar

Aizawl : August 19, 2024 zan khan Saitual District Hospital Ambulance Driver, Rodinngheta'n Aizawl Civil Hospital-a nau nei tura phurh thlak chu Tuirial Airfield peng bul an thlenin nau a chhar.

   Rodinngheta hi Saitual Dawrvenga cheng a ni a, nu pakhat nau nei turin Tualbung atangin August 18 tlai khan District Hospital Saitual an pan a, District Hospital-a nau nei tura ruahman ni mah se, nau tuibawma tui a tlem avang leh naute a no lutuk dawn avangin enkawlna lamah damdawiina thuneituten hmunpui lama refer a ni a.

   Saitual atangin Aizawl Civil Hospital-a nau nei turin Rodinngheta hian a phur thla a, Tuirial Airfield peng bul an thlenin nau hi a chhar ta a ni.

Police thlavang hauhin Chakma MLA te chenna kawtah MZP pungkhawm

Aizawl : Borapansury khuaa Chakma-in Mizo Police pahnih an sawisaknaa mawhphurhtute case siam sak phutin August 21, 2024 khan Chakma MLA pahnih te chenna kawtah MZP an pungkhawm.

   MZP General Headquarters Executive Committee thukhawm chuan, Borapansury khuaa Mizo Police pahnihte sawisaa, kutthlaktu Chakma-te chu case siam sak a, an phu tawk hremna pe ngei turin Sawrkar a lo ngen tawh a. MZP ngenna anga hmalakna a awm loh avangin, MZP chuan Chakma pawn chhuah a khap a ni.   

   Chakma-te pawn chhuah khapna chu zawm a nih leh nih loh enfiah turin, August 21 khan MZP chuan hnatlang a ko a. Chakma House Hunthar leh Chakma MLA pahnihte chenna Legislator Home Tuikhuahtlang kawt-ah te pungkhawm bawk a ni.

Misualin lirthei suam

Aizawl : Misual mi 5 ten August 18 zan khan Lunglei district, Mausen khaw bul, Tlawng lui kamah hnamdang vai motor lo ti dingin an suam a, Rs. 30,000 an chhuh sak.

   Pawi khawihtu mi 5 te hi August 20, 2024 khan Lunglei Police lam chuan an man kim vek a, thu zawhfiah turin Lunglei Thana ah an la kawl mek niin hriat a ni.

   Hnamdang vai suamtu mi 5 zinga pathumte hi Lunglei thlang, Kau chhuaha awm an nia, pahnih dangte hi Tlabung khaw per, Chakma khuaa cheng niin hriat an ni.

CM Bungalow thlang leimin vangin In 10 inthiarchhuak tawh

Aizawl : August 20, 2024 zan khan CM Bangla thlang/Thlithaw veng leimin avangin Dawrpui Vengthar-a PC Sapnela (L) te kawmchar C. Lalchhuanawma vawk vulhna hmun leh Changliana (L) leh 7th Day (SOG) Biakin inkar chu a hnawl a, he lei tawlh avangin hian chhungkaw 10 lai an inthiarchhuak tawh.

   Hranglawta te In hlui luahtu hnamdang cement mistiri te chu a zan la la in an inthiar chhuak nghal a. August 21 chhun ruah sur khan lei hi a tawlh leh a. C.Lalchhuanawma te vawk in hnawl thla a, lai lamah a bul hnai a chengte bungraw thiar chhuah hnatlang koh a ni.