Synod Hospital 3 Tesla MRI thar hawng

Aizawl : Synod Hospital, Durtlang-ah 3 Tesla MRI khawl thar leh a room chu Rev. R.C. Lalnghakliana, Moderator, Mizoram Synod-in July 31, 2025 khan Pathian hnena hlanna leh hawnna hun a hmang

  He hun hi Rev. Dr. K. Lallawmzuala, Executive Secretary i/c Hospital-in a kaihruai a, Rev. R.C. Lalnghakliana,. Moderator, Mizoram Synod-in Pathian hnenah hlanin a hawng a. Dr. Lalnunnemi, Medical Superintendent-in MRI khawl lei tura Synod-in a rel dan te, hmalak dan te, tihhlawhtlin a nih tak dan leh technical report a pe a; Dr. R.L. Sanghluna, Director, Synod Hospital-in lawmthu a sawi.

  3 Tesla MRI khawl hi Rs. 14,80,00,000/- (cheng nuai sangkhat zali sawmriat chiah)-a Synod-in a lei a ni a, MRI khawl hi March 30, 2025-ah a lo thleng a, a dahna room siam leh installation-te tihfel hnuah hman theihin hawn a ni ta a ni.

  3 Tesla MRI hi Mizoramah chuan a hmasa ber a ni a; North East India-ah hian 3 Tesla MRI hi 10 chauh a awm a, a nei thei zinga Synod Hospital an tel hi Hospital thuneitute chuan lawmawm an ti. 

Ruang chhar vuiliam nghal

Aizawl: Falkland venga khawsa mipa kum 60 bawr vel mi ruang chu July 30, 2025 khan chhar niin tlai-ah vuiliam nghal a ni.

  Falkland veng atanga ZALEN thudawn danin, ruang chhar hi Sanji-a tia hriat, Jharkhand lam mi, Falkland a kum engemawzat hnathawk a awm tawh a ni a, tun Pathianni zan atang khan a chin hriat a ni lo a, zawn a nih hnuah July 30, 2025 chawhma khan Falkland leh Chite inrina, Lei thlang luikawr sirah a ruang hmuh a ni.

  Ruang an chhar, Sanjia tia hriat hi quarry a hnathawk thin niin, Thawhtanni kha an khua Jharkhand a haw a tum ni niin, ticket pawh a la fel vek tawh a ni.

Central YMA-in inven dan tur ngaihtuah

Aizawl: Ni 28.07.2025 zana Central YMA Executive Committee thukhawm chuan, tunhnaia Assam-a Bangladesh atanga dan lo awm te hnawh chhuah an nih avanga lo inven dan tur a ngaihtuah.

  Central YMA thuchhuah tarlan danin, Assam atanga hnawh chhuah te, thenawm state a an luh lohna turin hma an la mek hlawm a. Kan state-ah pawh engemaw zat rawn lut ve thei an nih avangin, lo inven dan turah sawrkarin ruahmanna a la siam lo a nih chuan, siam thuai tur leh ILP pek chhuah kawngah pawh fimkhur lehzual turin an ngen.

  State dang atanga dan lo a lo lut te ven kawngah ramri a awm Sub-Headquarters, Group leh Branch YMA te pawh a tul anga hma la turin Central YMA chuan a hriattir bawk a ni.

Hachhek District Demand Committee din

Aizawl: Hachhek bial chhung khaw hrang hrang VC/YMA/YBA kalkhawm te chuan July 28, 2025 khan Hachhek District Demand Committee an din.

  Kum 2021 khan Kawrthah All NGO leh Joint VC te chuan Kawrthah District Demand Committee a lo din tawh a. Kawrthah District Demand Committee te hian ngun taka an ngaihtuah hnu ah khawbil anga hmala zui zel loin, Hachhek biala khaw hrang hrang VC/YMA/YBA te nen July 28, 2025 khan inrawnkhawmna Kawrthah PWD Staff Lodge-ah neih a ni a. Kalkhawmte chuan inlungrual takin Hachhek District Demand Committee tia hming thlakin hruaitu tur pawh an ruat nghal bawk. 

PMJVK-ah Mizoram duhsak turin Union Minister ngen

Aizawl: BJP Mizoram President Dr. K. Beichhua chuan July 28, 2025 khan Parliament session chawlh lailawk laiin Union Finance Minister Nirmala Sitharaman nen an inhmuh hnuah Union Minister for Minority Affairs Kiren Rijiju chu a hmu bawk a, Mizoram tana hmalak dan tur pawimawh a tihte a titi pui. 

  BJP president Dr K. Beichhua chuan Ministry atanga Mizoram tana hmalakna kalpui dan tur sawipuiin, PMJVK atanga Mizoram-in project a thehluh thinte chu a tam thei ber lo pawmsak a, Mizoram chu a bik taka lo duhsak thin turin a ngen nghal bawk. 

  Union Minister Kiren Rijiju pawhin State BJP President thil thlente chu a lo ngaihpawimawh sak tur thu leh a thu thlente chu lo enzuisak a tur thu a lo hrilh a ni. 

Home Minister hovin Sipai bangte dinhmun bihchianna nei

Aizawl: July 30, 2025 khan Sainik Welfare & Resettlement dinhmun bihchianna review meeting chu Directorate of Sainik Welfare & Resettlement-ah neih a ni a. He hun hi Home Minister K. Sapdanga chuan khuallian niin a hmanpui.

  Tun dinhmunah Mizoramah hian registered ex-servicemen 6,355 leh registered widows 2,550 an awm a. Sainik Welfare & Resttlement chuan Aizawl, Lunglei, Champhai leh Kolasib-ah te district office an nei a, office atan mimal in luahna district-ah te office sak dan tur ngaihtuah ho a ni a. Integrated Sainik Rest House/Complex sak tharna tur leh War Memorial thar din tura hmalak mek a ni. State sawrkar hmalaknain ex-servicemen leh an chhungte’n (dependent) a thlawna computer an zir theihna tur Sainik Computer Training Centre chu 2003 atang khan hawn niin, hemi centre atang hian mi 389 in an zirchhuak tawh a ni.  

Cooperative Minister hovin thisen pek runpui nei

Aizawl: Office of the Registrar, Cooperative Society buatsaihin International Year of Cooperatives - 2025 hnuaia hmalakna peng pakhat ‘Thisen Pek Runpui’ chu July 30, 2025 khan RCS Office, Babutlang-ah neih a ni a, Co-operation Minister P.C. Vanlalruata chuan khuallian niin hun hi a hmanpui.

  Minisiter P.C. Vanlalruata chuan khawvel nuam zawk leh boruak tha zawk siama, midangte tana luanchhuah chu Co-operative thil tum pawimawh tak a nih thu sawiin UNO pawhin a ngaih pawimawh avangin kum 2025 pawh International Year of Cooperatives (IYC) tia a puan hial thu a sawi a. 

  Thisen pek pawimawhzia sawiin ‘thisen chu mihring nunna bul leh midangte nena inkungkaihna thuk tak lantirtu a ni’ a ti. ‘Thisen pek chu IYC thil tum nen pawh thil inhmeh tak niin mite tana malsawmna nih theihna leh mi tam tak nun chhan theihna a nih avangin thil intihhmuh chi tak a ni’ a ti bawk.

Super Specialty Cancer & Research Centre chungchang sawiho

Aizawl: Chief Minister Lalduhoma hovin July 30, 2025 khan CM Conference Hall-ah Japan International Cooperation Agency (JICA) sum hmanga sak tur Mizoram State Super Specialty Cancer & Research Centre chungchang sawiho a ni.

  Mizoram State Super Speciality Cancer & Research Centre sakna tur sum hi JICA loan beisei niin, Rs 700 cr senga din tum a ni a, chung zinga Rs 560 Cr chu loan puk tur a ni. DPR hi Public Health Foundation India ten an siam a, kum 2023 February thlaah khan Loan Agreement hi Government of India leh JICA lam ten an ziak a. Loan interest rate hi 1.5% a ni a, kum 2033 atanga rulh tan tur a ni ang.

  Ruahman danah chuan he centre ah hian cancer hospital building, nuclear medicine block leh staff quarters te sak an ni ang a. Equipment lamah hian PET scan/SPECT Scan, MRI 1.5 Tesla, CT Scan 128 Slices, PACS, RT-PCR/NGS te leh a dangte a awm ang. Chu bakah a thawktute buatsaihna lam te, cancer chungchang zau taka mipuite hnena zirtirna kalpui thlengin a awm dawn a ni.

UD&PA Minister-in AMC Building sak belhna tur lungphum

Aizawl: July 29, 2025 khan AMC Building, Thuampui, Aizawl-a mi sakbelhna tur lungphum phumna hun, Ch. Chhunga Bus Terminal, Thuampui-ah hman a ni a. UD&PA Minister K. Sapdanga chuan khuallian niin hun hi a hmanpui a, PHED Minister Prof. Lalnilawma pawhin telpui.

  Building sakna tur hi SASCI, Part-IV (2023-2024) atanga hmuh niin AMC Building awm sa sak zauh belh a ni dawn a. Building awm sa hnunglam leh hmalam bakah in chunglamah chhawng 3 sak belh tur niin, Basement leh Ground-floor chu Garage atana hman a ni ang a, 2nd floor chu Shopping Mall atana hman tur a ni ang a, 3rd - 5th floor chu Office tur niin 6th floor chu Conference Hall ni tura ruahman a ni a, Building sak hna thawk tur hian Contractor - BM Infrastructures thlan an nih thu leh April thlaah work order pawh pek an nih a ni.

Chhungkaw 35 te hnenah Chawmdawlna hlan

Aizawl: July 29, 2025 khan Bawngkawn Hmar veng KPP Hall-ah Khuarel chhiatna avanga harsatna tawk chhawngkaw 35 te hnenah HT Parekh Foundation Mumbai in chawmdawlna Mission Foundation Movement(MFM) kaltlanga a rawn pek chu sem a ni a. He hun hi DM&R Minister Prof Lalnilawma chuan a hmanpui.

  Chawmdawlna semchhuah takah hian chhungkaw panga chuan Tuizem pakhat theuh an dawng a, chhungkaw 30 ten Buhfai leh Alu bag an dawng thung a. MFM hian HT Parekh Foundation Mumbai, CSR kaltlang a fund hmuh hmangin he project hi an kalpui a, Vaivakawn vengchhunga chhungkaw 35 hnenah tanpuina an lo sem tawh bawk a ni.

LR&S Minister-in Digitally-signed ROR/LSC hmasa ber hlan

Aizawl: Land Revenue & Settlement Department Minister B. Lalchhanzova chuan July 29, 2025 khan Directorate of Land Revenue & Settlement Conference Hall, Aizawlah, LR&S Department hnuaia e-RAM portal kaltlanga Digitally-signed ROR (LSC) hlanna hun chu khuallian niin a hmanpui.

  Minister-in Digitally-signed ROR/LSC a hlante hi Lalchhanhima, Tuithiang Veng leh H. Lalsangzuala, Chaltlang te an ni a. Minister vek hian kumin February ni 19 khan e-RAM portal hi a taka hman tan turin a hawng a. e-RAM portal hmang hian mipui ten awlsam zawk leh online-in ram teh, hming thlak, ram then leh dilna hrang hrang an theh luhte chu a hmasak dan indawt zela detailment siamin, hei hi empanelled surveyor ten lo tehin portal kal tlang vek hian process leh a ni a. Land recording fee leh a tul dangte tihfel hnuah diltute mobile phone-ah download mai theihin digitally-signed LSC/ROR hi pek chhuah thin a ni.