MZP-in ramria Assam hmalakna tlawh

Aizawl : July 31 khan MZP General Headquarters hruaitute chuan, Assam leh Mizoram ramri, Assam-in hmathar an lakna hmun Aitlang, Vairengte an tlawh.

   Joint YMA Vairengte leh Joint VC hruaitute nen Joint meeting neih niin, inkawm khawmnaah hian MZP hruaitute chuan; ralkhat atanga rawn thlir ringawt lo a khawtlang hruaitute atang ngei a thil chiang zawk hriat an tum vang a ni tih an sawi. Vairengte khawtlang hruaitute chuan an camp panna kawng motor tlan theihna tura blacktop emaw block phah a nih ve loh thu leh awlsam taka kal zung zung theih a la nilo chu MZP hruaitute hnenah hian sawrkar chak zawka nawr turin an lo ngen.

Work from Home hmangin an lungawilohna lantir

Aizawl : February 2023-a AH&Vety Department hnuaia contract a thawk tura lak Mobile Vety Unit te chuan kumin-ah hlawh an la lak loh avangin July 1, 2024 atang khan 'Work from Home' hmangin an lungawilohna an lantir.

   Mobile Vety Unit te hi African Swine Fever dona zau zawka hmalak a nih theihna tura lak an ni a, Doctor 26, Vety Field Assistant (VFA) - 26 leh Driver - 26 tunah hian an awm mek, anni hi RD Block tina awm tura lak an ni. Thudawn danin an thawh hlim atangin hlawh hi an la mumal lo a, kuminah hlawh an la lak loh avangin tun tumah hian 'Work from Home' hmangin an lungawilohna hi an lantir ta a ni.

Mistiri te Children home tan thawk chhuak

Aizawl : August 30, 2024 khan Mizoram Mistiri Association (MMA) Day pualin MMA Mamit Branch te chuan Joshua’s Children Home-ah an mamawh hrang hrang tihsakin an hnatlang a, member 20 vel an thawkchhuak.

   Joshua’s Children Home thawktute pawhin hetianga Mamit Mistiri Association ten an lo tih fo thin tawh anga an ni pawimawha a tan a tha leh zung, sum leh pai an seng thin chu lawmawm an ti hle.

   Joshua's Children Home, Mamit hi kum 2018 ah din niin, Social Welfare WCD hnuaia awm an ni a. Tunah hian thawktu mi 10 awmin naupang 12 an en kawl mek ani.

Ram pumah TKP Day hmang

Aizawl : July 30, 2024 kha Mizoram Baptist Kohhran hnuaia Thalai Kristian Pawl din champha vawi 73-na a ni a. Mizoram chhung leh pawna TKP Unit hrang hrang ten an mahni remchan dan angin an lawm. Kumin Thupui atan hian “I Pathian tawk turin inpeih rawh” Amosa 4:12 tih hman a ni.

   Tunah hian Mizoram TKP hnuaiah Pastor Bial 95 awmin Unit 439 an awm mek a. Member 48793 (Mipa - 29791 & Hmeichhia - 19002) an ni.

Lunglei HPC Vice Chairman court-a thiam chang

Aizawl : Lunglei High Powered Committee Vice Chairman V. Malsawmtluanga, MLA chu a lirthei khalh chetsualna-a a mi phurh a thih avanga an khinnaah July 29, 2024 khan thiam a chang a, chutihrualin a motor insurance a neih loh avangin pawisa chawitir a ni.

   Hun eng emaw chen thubuai hi ngaihtuah a nih hnuah Laltlansangi Fanai, Judicial Magistrate First Class chuan he thubuai hi ti tawpin, 279/304A/337 IPC-a an charge na ah a thiam lohna a hmu lo a, mahse an accident na motor kha insurance a tih loh avangin 196 MV Act ah a convict a, Rs 2000/- a chawi tir.

Cheng Vbc. 61 chuang hu Meth man

Aizawl : Zokhawthar police leh Assam Rifles ten July 29, 2024 khan Rs. Vbc. 61.99 man hu Methamphetamine an man.

   Meth an man zawng zawng hi kg. 20.66 vel niin, nimin 28.8.24 khan Zokhawthar police leh Assam Rifles tangkawp ten, Champhai district chhung Zokhawtharah an man a, an thil man hlut zawng hi international market rate a chhutin Rs. Vbc. 61.99 man hu a tling.

Hathkargha Mela/State Handloom Exhibition hawng

Aizawl : August 1, 2024 khan Exhibition Hall, Millenium Centre Rooftop-ah 10th National Handloom Day lawmna puala Ministry of Textiles, Govt. of India leh Commerce & Industries Department-te tangkawp buatsaih ‘Hathkargha Mela/State Handloom Exhibition’, August ni 1 atanga ni 14 thleng awh tur chu Commerce & Industries Minister F.Rodingliana’n a hawng.

   Heritage handloom te’n an kutchhuak thuam chi hrang hrangte phochhuakin entirna hun an hmang a. State Handloom Exhibition-ah hian Stall 60 an in phochhuak a, August ni 14, 2024 thleng a awh dawn a ni.

Assam Excise hotute nen inkawm

Aizawl : Excise & Narcotics Minister Lalnghinglova Hmar chuan July 31, 2024 khan Guwahati-ah Assam sawrkar Excise Department hnuaia mi pawimawhte ruihhlo do chungchang a sawipui a, indawr zui zel bakah hmalak zel dan turte an rel.

   Assam Excise Minister ruahman angin Assam sorkara Excise Department Secretary Indreswar Kalita, IAS leh Commissioner of Excise Jitu Doley, IRS te nen ruihhlo do kawnga State pahnihte thawhho dan sawihoin inkawmna hun tha tak an nei zui bawk.

Lok Sabha MP leh Israel Ambassador inkawm

Aizawl : Lok Sabha MP Richard Vanlalhmangaiha chuan 31.07.2024 khan India rama Israel palai Ambassador Naor Gilon chu a chhena inah hmuin, Mizo te tana hamthatna awm thei tur thil chi hrang hrang an sawi dun.

   Richard Vanlalhmangaiha chuan Mizo thalaite tana Israel lama hnathawh theih dan tur a sawipui a. Israel Ambassador chuan Gaza buaina avanga hnathawk tur an ramah an mamawh nasat thu lo sawiin, Mizo thalai tam zawk in Israel lama hna an hmuh theih dan tur Mizoram MP chu a hi a lo sawipui bawk a ni.

Village Council 88-te hnena Computer Set pe

Aizawl : July 31, 2024 khan LAD Minister C.Lalsawivunga Officer chamber-ah Village Council 88-te hnena Computer Set semna programme hman a ni a. .

   Computer an sem te hi Rashtriya Gram Swaraj Abhiyan (RGSA) Scheme hnuaia mi niin; Ministry of Panchayati Raj kaltlanga dawn a ni a. Mizoram tana RSGA Nodal Department chu Local Administration Department a ni. RGSA Scheme hian a tum ber chu tualchhungah Sustainable Development Goals (SDGs) an tihhlawhtlin theihna tura Village Council-te tihchak leh thuamchak a ni.

K. Vena'n House-ah lawmthu sawi

Aizawl : Parliament Session kal lai mekah K. Vanlalvena chuan 30.7.2024 khan Union Budget sawihona hunah Mizoram chu North East state 8-te zingah Assam tih lohah chuan MORTH hnuaia motor kawngpui siamna atana budget chang tam ber a ni chu lawmawm a tih thu a sawi.

   Vena chuan tun hmaa darkar 14 chhung tlan thinna Aizawl to Tuipang chu tunah chuan darkar 8 a thlen theih tawh thu te, darkar 10 hman thinna Aizawl to Champhai pawh darkar 5-ah thlen theih tawh thute sawi chhuakin; hei hi Mizoram tana hmasawnna ropui tak a nih thu a sawi lang bawk a ni.

Aizawla Trauma Centre Building sak mek tlawh

Aizawl, 30th July, 2024 : Vawiin chhun khan Mizoram State Project Monitoring Committee (MSPMC) chuan Civil Hospital, Aizawla Trauma Centre Building sak mek chu tlawhin an enfiah. MSPMC Team hi R. Lal Rinawma, IRS (Rtd) Vice Chairman-in a ho a ni.

   Civil Hospital Aizawl Trauma Centre sakna project sum hi Ministry of H&FW, Govt. of India atanga cheng nuai 121.50 leh Govt. of Mizoram (NEDP) cheng nuai 450.00, avaiin cheng vaibelchhe 5.71 a ni. Nodal & Executing Deaprtment hi Directorate of Hospital & Medical Education a ni a. A sak hna hi ni 17.02.2022 khan tan niin, 16.02.2024 a zawh tura ruahman a ni.

UD&PA leh Save the Riparian te thawkho dawn

Aizawl : UD&PA Department hnuaia Swachh Bharat Mission (Urban) 2.0 leh Save the Riparian te chuan July, 2024 atanga July, 2025 chhung atan Faina leh Thianghlimna kawnga Mizoram khawpuiten hma kan sawn theihna turin 30.07.2024 khan thawhhona thuthlung an ziak.

   He thawhhona hi UD&PA Director Dr. Andrew H. Vanlaldika leh Save the Riparian atangin President Ngurthanzaua Sailo ten an ziak a ni. Kumin kum 2024 chhung hian UD&PA nena tangkawpin District Headquarters tinah awareness campaign neih tura ruahmanna siam a ni bawk.

Durant Cup 2024 Kokrajhar Chapter hawng

Aizawl : July 30, 2024 khan Lalnghinglova Hmar, Minister of State, Sports & Youth Services Department, Government of Mizoram chuan SAI Stadium, Kokrajhar, Assam-ah Durant Cup 2024, Kokrajhar Chapter chu khuallian niin a hawng a. Kokrajhar-a Durand Cup hawnna-ah hian Bodoland FC leh ISL Club North East United FC te an intum a ni.

   Indian football calendar khuhhawnna Durand Cup hi kum 1888 a khelh tan niin kumin hi a vawi 1330-na tur a ni a, Asia khawmualpui a football tournament upa ber a ni. Khawvel huap pawhin English FA Cup leh Scottish FA Cup te nen football tournament upa pathum zing ah a tel pha a ni.