Chin hriat loa bo H. Ramdinpuii thi in hmuh a ni

Aizawl : August 3, 2026 zan atanga chin hriat loa bo H. Ramdinpuii (kum 15), Mualthuam North chu August 5, 2026 khan thi in hmuh a ni.

  H. Ramdinpuii hi August 3,2026 zana an in atanga a chhuak chu chin hriat lohin a bo a, khawtlangin an zawng a.August 5, 2026 chawhma dar 10:15 vel khan an khaw chhunga awm Govt. Middle Scool, Mualthuam North hnung hnim karah thi in hmuh a ni.

Silai leh a mu tam tham tak Thingsai Police ten an man

Aizawl: Thingsai Police Station August 3, 2026 khan Thingsai leh Khawhri inkar Tuiphai Lei-ah AK silai pasarih leh a mu 2,050 an man, hemi kaihhnawihah hian mi pathum an man bawk.

  Hemi kaihnawih-ah hian Lalruatfeli (42) d/o Zopianga Lunglei Chanmari III, Lallunghnema (3)0 s/o Lengluai, Leisen, Myanmar leh lirthei khalhtu Mesak Lalvensanga (27) s/o C. Lalduhawma, Cherhlun te an ni. Thingsai Police Station-ah thubuai ziah luh a ni.

  AK pakhat hi Rs. 5,00,000 zel-a hralh tur niin, a mu hi pakhat hi Rs. 500 man zel a ni bawk. Thil man hlut zawng hi a vaiin Rs. 45,25,000 vêl niin chhut a ni.

Indian Organ Donation Day hman a ni

Aizawl : Directorate of Hospital & Medical Education auditorium-ah August 3, 2026 khan taksa peng a thlawna pek pawimawhna inzirtirna hun leh 16th Indian Organ Donation Day hman a ni. He huna tel docor te chuan Aizawl-ah thin thlakna a taka kalpui thuai tum a nih thu an sawi.

  Indian Organ Donation Day a khuallian H&FW Principal Director Dr. Lalthlengliani chuan midang ten nun an neih theihnan taksa peng midang tana pek chu a pawimawh a, hemi atan hian tanrual a pawimawh tih a sawi.

  Kumin Indian Organ Donation Day thupui atan hian 'Nunna chhan nana taksa peng pek beihpui thlak' tih chu hman a ni.

Anti Corruption Bureau-ah FIR thehlut

Aizawl : ZPM Thalai General Headquarters chuan Economics & Statistics Directorate Building, MINECO sak a nih dan chungchangah corruption a awm nia an hriat avangin August 6, 2026 khan Anti Corruption Bureau (ACB)-ah Corruption Complaint/FIR an thehlut.

  General Secretary Boris Zoremsiama, Vigillance Dept. ZPM Thalai General Headquarters hmingin complaint thehluh a nih thu tarlangin, ACB-in thu hi ngun taka chhuiin, corruption a awm a nih chuan mawhphurtute chungah dan anga hremna la ngei turin an ngen bawk.

CEO Office buatsaihin International Seminar neih a ni

Aizawl: Chief Electoral Office, Mizoram buatsaihin August 6, 2026 khan Hotel Regency ah International Seminar on “Democracy for Peaceful Coexistence” neih a ni. 

  Mizoram Chief Electoral Officer (CEO) Pi Garima Gupta, IAS chuan Seminar neihchhan leh thukamkeuna sawiin, Democracy hlutna leh pawimawhna hrang hrang a sawifiah.

  Seminar hi session thumah then niin session khatna hi Prof. J.Doungel, MZU chuan kaihhruaiin Rumbidzai Kandawasvika-Nhundu, International IDEA leh Dr. F. Lalram­hluni, Soochow University, Taipei ten thupui an sawi a. Session hnihna hi Prof. Lalmalsawma Khiangte, Govt. Aizawl College chuan kaihruaiin Dr. Irwin Lalmuanpuii Hnamte, Delhi University, Dr. Roluahpuia, IIT Roorkee leh Prof. Rahul Tripathi, Goa University ten thupui an sawi a. Session thumna hi Dr. Joseph Lalfakzuala, Govt. T. Romana College chuan kaihruaiin Laldinkima Sailo,International Affairs and Public Policy, Singapore thusawi­ngaihthlak a ni bawk. 

Lalnghinglova Hmar leh Union Tribal Affairs Minister inkawm

Aizawl: Lalnghinglova Hmar, Minister of State (i/c), Sports & Youth Services, Tourism, LESDE leh Excise & Narcotics leh Jual Oram, Union Minister for Tribal Affairs te chu August 5 tlai khan New Delhi-a Union Minister chenna inah an in kawm a, Tribal Affairs Ministry kaltlanga Mizorama hmalakna awm thei hrang hrangte sawidunin ruahmanna an siam.

  Lalnghinglova Hmar chuan Mizoram chu tribal hlang deuhthaw, mihring zaa sawmkua aia tam Scheduled Tribe awmna a nih thu sawiin, Ministry tan pawh ngaihsak leh duat ngai a nih thu Union Minister a hrilh a.

  Union Minister chuan Mizoram sawrkar hmalakna tha tak takte a lo hriat thin thu sawiin, Sports Minister in mamawh a thehluhte pawh tihhlawhtlin dan kawng a zawnpui tur thu a lo hrilh a ni. Mizoram Tourism Minister in festival hrang hrang denchhena zin tura a sawmna chu kumin chhunga tih ngei a tum thu a sawi bawk.

Bangalore Baptist Hospital, Karnataka-in MUHCS zawm

Aizawl: August ni 4, 2026 (Thawhlehni) khan Mizoram State Health Care Society leh Bangalore Baptist Hospital-te chuan Bangalore Baptist Hospital-ah inremna thuthlung, Memorandum of Agreement (MoA) chu H&FW Minister Lalrinpuii hmaah an sign. 

  Mizoram State Healthcare Society aiawhin Lalzarmawii, Comissioner & Secretary, H&FW-in sign-in Bangalore Baptist Hospital atangin Dr. Spurgeon R, Director & CEO, Bangalore Baptist Hospital chuan a sign a ni.

  Minister Lalrinpui hian Presidency University Bengaluru a tlawh bawk a, Minister hi Presidency University Bengaluru Chancellor Dr. Nissar Ahmed; Vice Chairperson Dr. Nafeesa Ahmed; Vice Chancellor Dr. S.J. Thiruvengadam leh Pro Vice Chancellor Dr. Vidya Shankar Shetty te chuan lo dawngsawngin, zirlaite nen inkawmhona hun an hmang.

CM-in Student Induction Programme - Deeksharamb hmanpui

Aizawl: Chief Minister Lalduhoma chuan August 5, 2026 khan Assam Royal Global University, Guwahati, Student Induction Programme - Deeksharamb chu khuallian niin a hmanpui.

  Chief Minister chuan, tun hnaia Assam state-in tuilian nasa tak a tuar chu Mizoram mipuiten an tawrhpui thu a sawi a. Nunna chan te, chin hriat loha awm mek te leh in leh lo chante an lainat em em a, in chanchin an ngaihven reng thu a sawi.

  Zirlai naupang kalkhawmte chu hlawhtling taka University kal chhuak vek turin duhsakna a hlan a. Mizoram atanga he University lutte chu Zo nun ze mawi chhawm nung chunga zirlai tha ber ber nih tum turin a chah.

  Assam Royal Global University hi kum 2017 a din a ni a, tunah hian academic programme 130, faculty 500 vel neiin zirlai naupang pawh 9000 chuang an nei a. Foreign student pawh ram 28 atangin mi 400 chuang an nei mek a. Assam state-a University tha ber pawla ngaih niin Dr. AK Ansari chu Chancellor a ni a, Prof. Dr. Alak Kumar Buragohain chu Vice Chancellor a ni.

Minister P.C. Vanlalruata'n PACS-te hnenah Computer a sem

Aizawl: Centrally Sponsored Project - Computerisation of Primary Agricultural Credit Cooperative Societies (PACS) Phase-III hnuaia PACS Computerised tur 50-te hnenah August 4, 2026 khan computer set sem a ni a. He hun hi Cooperation Department changtu Minister PC Vanlalruata chuan a hmanpui.

  Computerisation of PACS Project hi Ministry of Cooperation hnuaia Centrally Sponsored Project kalpui mek a ni a. Phase-III ah hian PACS 50 computerise turin thlan chhuah an ni a. Hemi atan hian field verification te neih a ni tawh. He Project-ah hian National Level PACS Software Vendor (NLPSV) atan ‘Intellect Company’ thlan niin, an ni hian India ram pumpuia computerised PACS te hman tur ERP Software-te siamin, chu chu Mizoramah pawh hman a ni. 

CM hovin SCRAM Governing Council thukhawm

Aizawl: August 3, 2026 khan Planning & Programme Implementation Department Conference Hall-ah ‘The Society for Climate Resilient Agriculture in Mizoram’ (SCRAM) Governing Council chu Chief Minister Lalduhoma hovin an thukhawm.

  SCRAM hi sawrkar hnuaia 'Fostering Climate Resilient Upland Farming System' (FOCUS) project kaltlanga Mizoram chhunga lo neih leh thlai tharchhuah kawngah leh khawchhe laka invenna atana hmalakna hrang hrang tihlawhtling tura din a ni a. He meeting-ah hian project FOCUS 2.0, International Fund for Agricultural Development (IFAD) puihna nena kalpui tur chungchang sawiho a ni.

  FOCUS 2.0 Project hi kum 6 chhung- April 1, 2026 aṭanga March 31, 2032 thleng kalpui tura duan chhin a ni.