Lunglei SP sawnna order sut

Aizawl : Mizoram sawrkarin Lunglei DC leh DIG (Southern Range) bakah SP atan hnamdang a dah chu Lunglei mipuiin an helh avanga an ngenna siam angin sawrkar chuan November 28, 2024 khan a thuchhuah sut leh nghalin SP sawn a ni ta lo.

   YMA thuchhuahin a tarlan danin, Superintendent of Police (SP) tura Shivam Siddarth IPS dahna Order sut a ni ta chu YMA Sub Hqrs. Lunglei chuan lawmawm a ti a, SP thar tur hi an duh loh hrim hrim vang a ni lo a. District awptu atana Mizo tawng hmang theilo vek an awm hi an rawngbawlsak mipuite tana harsatna lian tak tling a, an tan pawh thil tha ber ni ah an ngaihsak lo an ti. 

Cooperative Bank tha lawmman pakhatna dawng

Aizawl : National Federation of State Co-operative Banks (NAFSCOB) Diamond Jubilee lawmna November 26 atanga New Delhi - Bharat Mandapam, Pragati Maidan neih-ah Mizoram Cooperative Apex Bank chuan kum-2 chhung a zawnin 2022-23 & 2023-24 ah India ram pum a 'Annual Performance Award For Best Performing State Cooperative Bank II-Tier Structure' zinga tehfung hrang hrang a tehna pakhatna lawmman chu Hon'ble Union Home & Cooperation Minister Amit Shah kut atangin Lalnunsanga, Chairman leh A. Lallungmuana Chief Executive Officer ten an dawng.

   APEX Bank hotute chuan Best Performing State Cooperative Bank Award kum 2 chhung a zawna dawng theia an awm hi Mizoram mipuite te leh Mizoram Sawrkar leh Share Holder te tawiawmna vang tiin lawmthu an sawi.

Police leh AR ten nuai 190 man chuang Heroin man

Aizawl : November 26, 2024 khan Police Department, Zokhawthar leh Assam Rifles tangkawp te chuan Melbuk (Thingruang Kai, Uilui) ah Heroin No. 4 cheng nuai 193 man an man.

   Kenbo bik (125) khalh Tiu rawn kan atangin hetiang zat Heroin hi an man a ni. Team pahnih te hian sahbawn bawm 22 ip var-a thun chhawn leh atang heng Heroin te hi an man a, a kengtu Vanbiakmanga, 42, Webula, Myanmar a cheng nia insawi hneh atanga hetiang zat ruihhlo an man leh a lirthei te hi hren nghal a ni.

Buh vuakna-ah in tipalhin boral

Aizawl : T Lalthlamuana (47) h/o Lalthianghlimi, Hruaikawn, Champhai dist. chu November 26, 2024 khan buh an vuakna-ah in tipalhin a boral.

   ZALEN thudawn danin T Lalthlamuana te hian an leilet-ah tractor (khawl) hmangin buh an vua a, tlai lam thim hlim velah khawlah a inbarh lut palh a, rang takin Champhai damdawiin panpui ni mah se, a hliam tuar loin November 26 zan dar 8:20 khan a boral a ni.

India-ah Ramsanga te thian dun champion leh ta

Aizawl : Khawvel huap badminton inelnaa Mizo zinga medal la hmasa ber a lo ni tawh, C. Lalramsanga leh a kawppui chuan Odisha-a ram pum huap inelnaah champion tura rinkai Seeded No. 1 leh 3 inkar hneh vekin India champion an ni..

   Bhubaneswar, Odisha-a khelh Yonex-Sunrise 47th Inter State – Inter Zonal & Junior National Badminton Championships 2024-ah Durtlang rawlthar hi a kawppui, Vishakha Toppo nen mixed doubles-ah an champion a ni.

MAL-in lehkhabu 'Pho Chhuah Runpui' buatsaih

Aizawl : Mizo Academy of Letters (MAL)-in kum 60 tlin lawmna (Diamond Jubilee) pualin Aizawl Vanapa Hall-ah Pho Chhuah Runpui an buatsaih chu November ni 25, Thawhtanni khan MAL Donor Member, Prof. Laltluangliana Khiangte chuan a hawng.

   Pho Chhuah Runpui-ah hian Aizawla lehkhabu dawr hrang hrang 23 leh mimal lehkhabu nei mi 10 in an lehkhabu an pho chhuak a. Heng lehkhabu te hi man tlawm zawka hralh chhuah a ni. Lehkhabu bakah hian Mizo ziak mi te kutziak leh an hmanraw hlui te, Mizo Academy of Letters-in Academy Award a lo hlan tawh te, MAL Book of the year lo dawng tawh te thlalak leh an lehkhabu te pho chhuah a ni a, a duh tan lei theih a ni bawk.

   MAL Diamond Jubilee lawmna pui ber hi November ni 29, 2024 (Zirtawpni) khan Pi Zaii Hall, Synod Conference Centre-ah hmang a ni.

Hualtu khaw kum 400 tlin lawmna hun hmanpui

Aizawl : Vawiin khan Hualtu khua chuan November 28, 2024 khan an khaw kum 400 tlin lawmna leh Hualtu Branch YMA Golden Jubilee lawmna, Alu Hmun Field, Hualtungamtawna Runah an buatsaih a.

   He hunah hian Home Minister Pu K Sapdanga chu khuallian niim, Agriculture Minister Pu PC Vanlalruata, bialtu MLA ni bawk chu khualzahawm a ni. Hualtu khua kum 400 tlin lawmna Lungphun chu Home Minister chuan a hawng nghal bawk a ni.

Chief Secretary tharin a hna a zawm tan

Aizawl : November 28, 2024 chawhnu khan Chief Secretary thar Khilli Ram Meena chuan a hna zawmin Pisa a kai tan.

   Khilli Ram Meena hian November 27 khan Aizawl a rawn thleng a. tlailamah Chief Minister Lalduhoma a hmu a. November 28 chawhma khan Governor Dr Hari Babu Kambhampati a hmu bawk a ni.

PM Vishwakarma Exhibition-cum-Trade Fair hawng

Aizawl : November 28, 2024 khan Branch MSME Development & Facilitation Office, Aizawl leh Commerce & Industries Department, GoM tang kawp chuan ni 3 awh tur PM Vishwakarma Exhibition-cum-Trade Fair AR lammualah a buatsaih a. Commerce & Industries Minister F. Rodingliana chuan khuallian niin a hawng.

   Exhibition-cum Fair-ah hian district 9 atang participant awmin, stall 50 chuang hawn a ni a. An kut themthiam deh chhuah thil te pholan leh zawrh a ni. Bank, National Small Industries Corporation, Khadi leh Village Industries Commission, Common Service Center (CSC), GeM, RDSDE etc. ten stall hungin, an chanpual hnuaia schemes leh hamthatna awm zawng zawng te detailed information an pe chhuak a. PM Vishwakarma Scheme hnuaia la in register lo kut themthiam te tan Common Service Center (CSC) stall-ah an in register thei nghal a ni.

Mizoram Bana Kaih (Handholding) Scheme 2024 atan DC Office chanvo pe

Aizawl : Mizoram State Policy Coordination Committee chuan October ni 30, 2024-a a lo rel tawh angin Mizoram Bana Kaih (Handholding) Scheme 2024 atan DC Office te hnenah November 27, 2024 khan heng chanvo hi a pe:

   1. Scheme chungchang handholding a thawhpui tur te tana inhrilhhriatna.

   2. Mahni district chhunga Search Team te hnathawh endik leh thlithlai.

   3. Handholding a thawhpui te hnathawh endik leh tanpuina pek.

   4. CM Special Package hnuaia dilna lo dawna tul anga office dang hnena hlan chhawn.

8th North East Mini Jamboree kharna hmanpui

Aizawl : November 27, 2024 khan Lalnghinglova Hmar, Sports & Youth Services Minister leh Mizoram Bharat Scouts and Guides Vice President ni bawk chuan State Training Centre, Tanhril-a buatsaih, Bharat Scouts and Guides 8th North East Mini Jamboree kharna hun chu khuallian niin a hmanpui a, Jamboree chhunga inelna hrang hranga tithate lawmman hlanna a nei nghal bawk a ni.

   North East Mini Jamboree hi India hmarchhak hmun hrang hrangah buatsaih thin niin, kumin hian a vawi riatna chu Mizoramin a thleng a. India ram hmarchhak hmun hrang hrang atanga Scouts and Guides-a inhmang zirlai kalkhawmte chuan UN-in Sustainable Development Goals a duante milin activities hrang hrang an neih bakah, Mini Jamboree hi India ram chhung hmun hrang hranga chengte inpumkhatna tur lam hawiin mahni hnam ziarang theuhte tarlang chunga kalpui a ni.

AMC hnenah Bawlhlawh Paih Motor (Truck) 20 hlan

Aizawl : UD&PA Minister K.Sapdanga hovin November 27, 2024 khan AMC hnenah Bawlhlawh Paih Motor (Truck) 20 hlanna leh “Tripartite Agreement on Construction of Material Recovery Facility Centre at Luangmual” signing Programme hman a ni.

     Aizawl Municipal Corporation, UD&PA leh Smart City tangkawp hmalakna Faina Hmathlir ‘Comprehensive Plan for Municipal Waste in Aizawl’ hnuaiah hmalakna a ni. Tripartite Agreement hi Aizawl Municipal Corporation (AMC), Aizawl Smart City Ltd. leh NEPRA Resource Management Pvt. te inkara sign niin, AMC aiawh Joseph H. Lalramsanga, Municipal Commissioner, ASCL aiawh CC. Lalchhuangkima, Chief Executive Officer, ASCL leh Sandeep Patel, Co-founder & CEO NEPRA ten an sign a ni.

Hmeichhe naupang venhim leh zirtir chungchang inhrilhhriatna nei

Aizawl : School Education Conference hall-ah November 26, 2024 khan hmeichhe naupang venhim leh zirtir chungchang inhrilhhriatna School Education Directorate Conference Hall-ah neih a ni a, School Education Minister Dr Vanlalthlana'n khuallian niin he hun hi a hmanpui.

   Minister chuan November ni 25 atanga December ni 10 thlenga hman tur, '16 Days Awareness Campaign for Eliminating Gender- based Violence' chu khuh-hawnna a nei nghal.

   School Education Department leh Women & Child Development ten an buatsaih hi School Education Special Secretary Lalthantluanga'n a kaihruai a, School Education Director Angela Zothanpuii Director chuan mi thenkhatin hmeichhiate hi chawikan an ngai tawh lo an ti thin a, amaherawhchu POCSO case hi a la awm reng a, hei hian a lantir chu hmeichhiate hi chhanhim a, venhim an la ngai reng a ni a ti.

CM-in Education Department Review Meeting neihpui

Aizawl : November 26, 2024 khan Secretariat Conference Hall ah Chief Minister Lalduhoma chuan Education Department hmalakna hrang hrang enpuina (Review Meeting) a neihpui.

   Chief Minister chuan, review meeting tel tura district officers te kokim taka an rawn tel avangin lawmthu a sawi.

   Meeting hi Dr. Vanlalthlana, Minister, Education chuan a kaihruai a, Chief Minister-in department te hmalakna enpui a meeting a buatsaih hi tunhma lama la awm ngai lo thil thar a ni a. A lo neihpui tawhten an hlawkpuizia an hrilh thu leh Education Department a neihpui chu an phur a, officials te an kal tha a, district officers te thlengin an rawn kal tha hle a ni, a ti.

I&PR Minister-in Sikkim Press tour-a kalte vailiam

Aizawl : November 26, 2024 zing khan I&PR Minister Dr. Vanlalthlana chuan Sikkim Press Tour a kal tur, Journalist te leh I&PR Official te chu Lianchhiari Run kawt, I&PR Office atangin a vailiam.

   Sikkim Press Tour-ah hian MJA atangin Pu C.Lalhmachhuana, Vice President leh member dang 9, an vaiin 10 an tel a. I&PR atangin Zonunchama Ralte, DIPRO, Lawngtlai leh Hmingmawia, AVPA-I, Lunglei te an kal a ni.