Dan lova khaw din pathum tlawh

Aizawl: Mizo Students' Union (MSU) ten Dan lo a khaw din tih tawp a nih theihnan an hmalakna kal zel ah December 8 & 9 khan Lunglei District a khaw thenkhat an enfiah.

  MSU in an khaw enfiah te chu : Pangtlang (New Vuakmual ti a sawi bawk) Putlungasih VC ramchhung a mi), In 68 awmna niin mi cheng 300 bawr vel leh vote nei mi 109 awmna khua.

  Phairuangchhuah, Belthei VC ramchhung a mi In 42 awmna, mi cheng 200 bawr vel leh vote nei 98 awmna khua.

  Sihphirtlang, Lungsen II VC huam chhung a mi, In 39 awmna, mi cheng 150 vel awmna leh vote nei mi 49 awmna ,khua te niin a mi cheng te hi Chakma deuh vek an nih thu an sawi a ni.

  MSU hruaitute chuan heng dan lo a khaw din ah te hian Sawrkar hmalakna Electric Connection, Tui Connection leh 15th Finance Commission atanga hnathawh te awmin, Zirna In bakah Kohhran hrang hrang hmalakna a awm thu sawiin Dan lo a khaw din sawmpakhat (11) awm ah khaw pariat (8) an la hmabak thu leh enfiah vek an tum thu an sawi a ni.

Rel-ah coach pahnih dah belh

Aizawl: Indigo thlawhtheihna engemawzat khaihlak avanga khualzin tam takin harsatna an tawh tihziaawm nan Northeast Frontier Railway chuan Sairang leh Guwahati inkara tlan rel-ah coach pahnih chu December 8 atang khan a dah belh a, kar kalta nilaini atang khan special train pahnih a tlan tir bawk.

  Northeast Frontier Railway chuan khualzin phur thlawhtheihna thlawk tur tam tak khaihlak avanga khualzin an pun avangin December ni 6 atang khan Guwahati-Sairang Express-ah coach pahnih AC leh Sleeper a dah belh a, December ni 7 atangin Sairang - Guwahati Express ah coach pahnih AC leh Sleeper dah belh lehin heng coach an dah belh te hi dah belh hlen tur nilovin khualzinte tana a remchan zawkna tura an dah lailawk a nih thu an sawi bawk.

  Hei bakah hian AC 3 Tier coach pahnih, Sleeper class coach 10 leh GSLR coach 2, a vaiin coach 14 awmna Special train chu tun thla December 11, Ningani khan Nagaland khawpui pakhat Dimapur atanga Sairang thleng tlan tir a, December ni 12, Zirtawpni khan Sairang atanga Guwahati thleng tlan tir a ni bawk ang.

CM-in Krishi Mela Cum State Level Farmers Workshop a hmanpui

Aizawl: ICAR Research Complex for NEH Region, Mizoram Centre, Kolasib in December ni 11-12, 2025 chhung awh Tribal Sub Plan (TSP) hnuaia 'Krishi Mela cum State Farmers Workshop' hawnna inkhawm a buatsaih chu Chief Minister Lalduhoma chuan a hmanpui.

  He hun hawnnaah hian Kolasib, Mamit leh Hailakandi district atangin loneitu 300 chuang an tel a. District chhunga loneitu hlawhtlingte hnenah hmanraw pawimawh tak tak - Lei lehna khawl (Power tillers), Ke a rah Aieng zai sawmna (Pedal-operated turmeric slicer), Hmarcha leh thil ro rawt sawmna (Spice Pulverizer), Pa (Mushroom) chi khawrna leh sawngbawlna (Straw spawn filling and compaction unit) te, ar note leh vawk note te sem a ni a, innovative farmers te hnenah chawimawina hlan a ni bawk. Khuallian hian lehkhabu pahnih leh ran vulhtute tana tangkai tur mobile app 'Gau Bandhu' a tlangzarh bawk a ni.

  He workshop chhung hian Line department hrang hrang, FPO leh loneitu hlawhtling ten an thil thar chhuah pholan nan stall 25 an hawng bawk.

Halpuah, Halmawi leh puakthei thil Prohibitory Order chungchangah meeting

Aizawl: Home Minister K.Sapdanga hovin Secretariat Conference Hall-II, MINECO- ah kumin Krismas leh kumthar vuakveta halpuah, halmawi leh puakthei thil khapna thupek (Prohibitory order) leh “The Mizoram Firecrackers (Regulation & Control) Bill, 2025” chungchangah December 11, 2025 khan meeting neih a ni.

  Meeting-ah hian “The Mizoram Firecrackers (Regulation & Control) Bill, 2025” chu kumina hmang nghal tur chuan hun a tepter tawh si a. Nakum budget session-a regular bill anga putluh tha zawkin meeting chuan a hria a, chutiang tur chuan a rel a ni.

  Meeting chuan kumin hi halpuah leh halmawi halin mihring leh ran laka nghawng tha lo a nei theihzia inzirtir uar kum “Year of Awareness Campaign on the harmful effects of Firecrackers” tan hman ni se, kum dang zawng aiin Awareness campaign uar ni se, tiin a rel. 

Ruihhlote buaipui dan tur zirtirna ASHA tan buatsaih

Aizawl: Directorate of Social Welfare hnuaia Ruihtheihthil/Drugs lam buaipuitu Mizoram Social Defence and Rehabilitation Board (MSD&RB) leh Health & Family Welfare Department tangkawp chuan Accredited Social Health Activist (ASHA) Workers te tan ni hnih awh “Two days capacity building program on drug abuse prevention for ASHA Workers” chu December 11, 2025 khan MSD&RB Training Hall, Chaltlang Dawrkawn ah an buatsaih.

  He hun hi National Institute of Social Defence (NISD), New Delhi leh Nasha Mukt Bharat Abhiyaan Aizawl District te nen tangkawp a buatsaih tel a nih bawk avangin MSD&RB hnuai a State Level Co-ordinating Agency (SLCA) a zirtirna pe thin tute chu he training ah hian Resource Person an ni.

Governor leh First Lady te'n Mizoram Creators' Fest 2025 kharna hun an hmanpui

Aizawl: Mizoram Governor General (Dr) Vijay Kumar Singh, PVSM, AVSM, YSM (Retd) leh First Lady Pi Bharti Singh te chuan zanin khan December ni 8, 2025 atanga neih 'Mizoram Creators' Fest 2025' kharna hun chu December 10 zana Aijal Club Park-a neih chu an hmanpui.

  He Fest-ah hian Mizoram mai bakah State pawn atangtein YouTuber, Influencer leh Social Media Personality-te tel a, Company lar leh hriat hlawh tak takte'n an hmanraw neihte chhawp chhuakin training an buatsaih bawk a ni.

  Governor General (Dr) Vijay Kumar Singh leh First Lady Bharti Singh te chuan programme zawhah hian Mizoram Creators' Fest puala stall buatsaihte fangin a nghaktute an kawm a ni.

RD&AD Minister-in Solar Sprayer sem

Aizawl: Rural Development & Administration Minister Prof. Lalnilawma chuan MzSRLM leh SELCO Foundation te thawh hona hnuaia hmalakna peng pakhat atan December 10, 2025 khan Solar Sprayer a sem chhuak. 

  Solar Sprayer semna hun hi Minister Chamber-ah buatsaih niin, Rural Development & Administration Minister Prof. Lalnilawma chuan loneitu mi 11 thlan chhuahte hnenah Agricultural Solar Sprayer hi a hlan a ni.

  MzSRLM leh SELCO Foundation te hian April 2025 khan thawh hona thuthlung (MOU) an ziak a, loneitute hnena solar sprayer sem takte pawh hi, he thawh hona kal zela hmalakna pakhat a ni. He thawh hona hian a tum ber chu, loneitute leh ei zawnna hrang hrang kalpuitute tana ni zung chakna (solar energy) hmang khawl chi hrang hrang - solar dryers, solar sprayers, deep freezers, tailoring units, handloom lighting systems leh a dangte hmang tangkaia, an dinhmun chawisan leh tanpui te a ni.

MSPMC General Body Meeting vawi 7-na thukhawm

Aizawl : Chief Minister Lalduhoma kaihhruaiin Mizoram State Project Monitoring Committee te chu December 9, 2025 khan CM Conference Hall-ah an thukhawm a. Kumin chhunga Project an endik 40 te report an thlirho. Hei hi MSPMC General Body Meeting vawi 7-na a ni.

  Project Monitoring Committee hian nikum chhungin project 47 an endik a, kumin April thla atanga vawiin thlengin project 40 an endik a. Project an endik tawh zawng zawng hi 87 a ni. Meeting-ah hian kumina an endik bikte report an thlirho a. Kumina an endik project 40 te hi Social sector-ah project 13, Education, Health leh Agriculture sector-ah te project 5 theuh, Communication (Road & Bridges) ah leh Industrial sector-ah project 4 ve ve, Vety leh Public Health sector-ah project 1 ve ve leh Energy sector-ah project 2 te an ni.

  General Body Meeting hian Project thar thawh tur DPR ah Life Cycle Costing chipchiar tak telh thin ni se - tia rawtna chu an sawi hova, project pakhatah pilot anga kalpui chhin tha an ti a.

12th LADC-MDC Inthlanpui result chhiar zo

Aizawl: 12th LADC-MDC inthlanpui 2025- a vote tla chu December 9, 2025 zing dar 8:00 AM atang khan Govt. Lawngtlai College Hall- ah chhiar a ni a, chawhnu dar 1:30 PM ah zawh fel a ni.

  Vote chhiar nan hian Counting Hall pathum awmin, Counting Hall- 1, (5 Tables), Counting Hall- 2, (8 Tables) leh Counting Hall - 3, (9 Tables) ah te chhiar a ni. 12th LADC- MDC inthlanpui 2025- ah hian MDC bial - 25 ah vote thlak niin, vote - 56, 873 awmah , EVM - a vote tla zawng zawng - 47, 769 niin, Postal Ballot-ah vote - 453 a tla bawk a ni.

  12th LADC- MDC inthlanpui 2025-ah hian BJP- 2 ; INC- 7

; MNF- 8 ; ZPM-6 leh IND- 2 ten seat hi an la a, Donny Lalruatsanga (Returning Officer), David Lalrinawma (Returning Officer) leh H. Zonunmawia (Returning Officer) te chuan MDC thlan thar te hnenah hian ' Certificate of Election' an hlan nghal a ni.

MZU-ah Himalaya chhak lam chungchang seminar nei

Aizawl: Art & Culture Minister C. Lalsawivung chuan December 9, 2025 khan Department of History & Ethnography, Mizoram University buatsaih, ni thum chhung awh tur International Seminar on ‘Beyond Borders and Texts: Reframing the History and Polity of Highlanders in the Eastern Himalayan Borderlands’ chu MMTTC Lecture Hall, Mizoram University-ah khuallian niin a hawng.

  Seminar hian ni thum chhung - December ni 9 atanga ni 11, 2025 - a awh a. Mithiam hrang hrangin thu sawiin paper an present dawn a ni. Hetih lai hian tunlai thlawhna cancel avanga buaina avangin Mizoram pawn atanga seminar-a lo tel turte chu an lo kal thei hlawm lo a, online-in thu an sawiin presentation an nei hlawm dawn a ni.

CM-in Ministry of Finance-a Expenditure hotu kawm

Aizawl: Chief Minister Lalduhoma chuan December 9, 2025 khan a office-ah Vumlunmang Vualnam, IAS, Secretary, Department of Expenditure, Ministry of Finance chu kawmin, thingpui a inpui.

  Chief Minister hian tun hnaia SASCI Project thar central sorkar-a Mizoram sawrkarin a thehluh chungchang te, sawrkar sum leh pai enkawl chungchang te, Public Financial Management System (PFMS) chungchang te leh sawrkar sum leh pai chungchang thil pawimawh tak takte a sawipui a ni.

NCEL leh MIZOFED ten thawhon ththlung ziak

Aizawl: Co-operation Department minister PC Vanlalruata uapna hnuaiah December 8, 2025 khan National Cooperative Exports Limited (NCEL) leh Mizoram State Co-operative Marketing & Consumers’ Federation Limited (MIZOFED)-te chuan thawhhona thuthlung Memorandum of Understanding (MoU) an ziak.

  Hei hi Mizorama agriculture sector leh a kaihhnawhte’n an thil tharte cooperative sector kaltlanga ram pawna an thawnchhuah theihna tura hmalakna a ni a, MoU hi Lalhruaitluanga, Managing Director, MIZOFED leh Unupom Kausik, Managing Director, NCEL-te’n pawl pahnih hotute hriatpuinain an hming an ziahhnan a ni.

  Thawhhona thuthlung hi kum thum chhung nung tur a ni a, he thawhdunna hian Mizoram tharchhuah pawimawh zualte (flagship produce) – Sawhthing, Aieng, Hmunphiah leh Hmarcha te theh larna kawngah nasa takin kawng a sial dawn a. NCEL thiamna leh thawhpui neih sate hmangin he’ng thlai tharchhuahte hi ram pawna zawrhchhuah an nih chuan Mizoram tan hmasawnna a thlen dawn a ni.

UD&PA Minister-in Aizawl Sumtual, MINECO-ah hawng

Aizawl : Urban Development & Poverty Alleviation (UD&PA) Minister K. Sapdanga chuan December 8, 2025 khan Aizawl Smart City Ltd. (ASCL) hmalaknaa din ‘Aizawl Sumtual’ MINECO-a mi chu a hawng a. He hawnna inkhawm hi Lalmalsawma Pachuau, Secretary, UD&PA chuan a kaihruai a ni.

  Aizawl Sumtual hi Rs. 10,12,65,060 senga sak niin, hna thawktu (contractor) atan M/S Mizoram Development Agency rawih an ni a, September 5, 2023 khan an thawk tan a, November 30, 2025 khan zawh fel a ni. He hmun enkawlzui tur hian open tender chhang sang ber Mizoram Handloom Industry, Tanhril Vengpui thlan an ni a, thla tin Rs.3,55,555 ASCL-ah an chhunglut dawn a. Mipui tan December 15 atangin tlawh theih a ni dawn a ni.

Kuhva kut hmanpui

Aizawl: Chief Minister Lalduhoma chuan December 8, 2025 khan Rengdil Sports Centre-a Rengdil khuaa Kuhva chingtute leh Land Resources, Soil & Water Conservation Department tangkawpin Kuhva Kut an buatsaih chu a hmanpui. Lalfamkima, Dy. Speaker chuan Chief Minister hi a tawiawm a, Lalthansanga, Soil Minister chu Kutpa a ni.

  Chief Minister chuan, Kuhva chingtuten kuminah rate tha tak maia Kuhva an hralh chu lawmawm a ti a, an beih nasatzia an hrereng a, a rah duhawm tak an tel chho mek chu an aia nasa mahin an lawm tih a sawi.

  Kumina Hachhek biala HBKCP khaw 21-a Kuhva chingtute sum lakluh belhkhawm hian nuaih sangnga leh sawmriat pasarih a chuang tawh a. An la hralh kal mek a, a fur rahte pawh hralh tur an la nei leh dawn a. An lakluh hi a pung chho dawn a ni. Hachhek bial chhunga kumina Kuhva hralh tam ber chuan cheng nuaih sawmli a lalut tawh a ni.