Sawrkar hnathawk hlawh pechhuak ; thlai thar leina turin vaibelchhe 110 dah

Aizawl : December 11, 2023 khan Chief Minister Lalduhoma chuan a department enkawl pahnih Finance Department hotute leh Planning & Programme Implementation department hotute chu a pisaah meeting a neih pui. Hlawh pechhuak nghal turin ruahmanna an siam, thlai thar leina tur vaibelchhe 110 dah a ni bawk.

   Meetingah hian Chief Minister duh danin November thla hlawh vawiin thlenga sawrkar hnathawkten an la lak loh chu pek chhuah nghal a ni a, Healthcare bill tang pek tur cheng vaibelchhe sawmli (40 crore) leh Thlai thar leina, sawrkar policy-in a huam thlai palite leina tur cheng vaibelchhe 110 (110 crore) an ruahman nghal bawk.

Black Day hmang

Aizawl : December 11. 2023 khan Mizo Zirlai Pawl (MZP) General Headquarters, Aizawl chuan North East India State danga Zirlai pawlte rualin 'Black Day' an hmang.

   North East Students' Organisation (NESO) chuan India rama Citizenship Amendment Bill pass tura hmalakna nasa takin a dodal a, Mizoramah ngei pawh theihtawp a dodal a ni. Chuti chung chuan ni 11 December, 2019 khan Rajya Sabha -ah pass a ni ta a. He ni hi North East Students' Organisation (NESO) chuan North East India mipuite palzutnaah a ngai a, lungawi lohna ni atan kum tin he ni hi 'Black Day' in a hmang ta a ni.

Central YMA in ngenna tichhuak

Aizawl : December 12, 2023 khan Central YMA chuan thuchhuah siamin, halmawi leh halpuah chi hrang hrang lei lo tur lehzuar lo turin mipuite an ngen.

   Central YMA chuan nu leh pa ten krismas pual a an fate infiamna hmanrua an lei sak thinah silai lem (a mu kapchhuak thei) te chu mi ti na thei a nih avangin, lei sak lo tur leh sumdawngte pawh zuar lo turin an ngen a.

   Krismas leh kumthar hun puiah ruihhlo chi hrang hrang a hluar thin avangin, mitinte theihtawp chhuah a heng thil tha lote hi do tlang turin an ngen a, YMA branch te pawh mahni huamchhung theuhvah theihtawp a tan la turin an ngen.

ZPM Legislature party ruat

Aizawl : December 12, 2023 khan ZPM MLA ten ZPM Legislature Party Secretary leh Treasurer tur Assembly ZPM MLA Recess room-ah an ruat fel.

   Rawtna awm angin lungrual takin Secretary atan TBC Lalvenchhunga, MLA Aizawl West – I leh Treasurer atan Lalchhuanthanga, MLA Aizawl South – II te an ruat.

   December ni 5, 2023 (Thawhlehni) zan dar 8 khan ZPM Legislature Party-te Lalduhoma in Chawlhhmun a inhmukhawm chuan Leader tur leh Dy.Leader tur te an lo tifel tawh a. Leader atan Lalduhoma leh Dy.Leader atan K Sapdanga te an lo ruat tawh bawk a ni.

Dialysis room thar

Aizawl : Synod Hospital-a Dialysis Unit room thar chu December 13, 2023 (Nilaini) chawhma dar 10:00 khan Rev. HC. Khaicho, Hospital Chaplain-in Pathian hnenah a hlan.

   Dr. Joseph Lalhmachhuana, Nephrologist (Super Specialist)-in Dialysis Unit Report a pe. Dialysis room siam thar hna hi August 16, 2023 khan ?an a ni a, room thar siam nan leh Dialysis khawl thar lei nan a vaiin Rs. 29,34,780/- sen a ni.

   Synod Hospital Dialysis Unit hian khawl 7 neih mek a ni a. Kum 2023 chhungin Dialysis vawi 2331 tih tawh a ni. Tunah hian Nephrology Ward siam turin hmalak mek a ni bawk.

ASHA te hlawh pe

Aizawl : Chief Minister Lalduhawma leh Health Minister Lalrinpuii te hmalakna in NHM hnuaia Accredited Social Health Activist (ASHA) te lawmman hun engemaw chen atanga pekchhuah tawh loh chu ni 13.12.2023 atang khan pekchhuah tan a ni.

   ASHA te hian hun engemaw chen hlawh an la tawh lo a, anni hlawh tur pekchhuak rual hian National Health Mission (NHM) pawisa Rs.24.47 crore pawh ni 13.12.2023 vek hian Treasury atanga release a ni bawk.

MoS tlukpui Advised to CM pali ruat

Aizawl : Chief Secretary in December 14, 2023 khan Notification tichhuakin, Minister of States (MoS) tlukpui tur Adviser to CM pali (4) ruat thar an ni.

   CS in Notification a tihchhuah a tarlan a nih danin, Hrangturzo bialtu MLA Lalmuanpuia Punte chu Adviser to Chief Minister (Political) atan ruat niin, Aizawl West I bialtu TBC Lalvenchhunga MLA chu Adviser to Chief Minister (Finance) atan ruat a ni.

   Champhai North bialtu H. Ginzalala, MLA chu Advider to Chief Minister (Technical) ah ruat a ni a, Lawngtlai East bialtu Dr. Lorrain Lalpekliana Chinzah, MLA chu Adviser to Chief Minister (Health & Family Welfare & Agriculture) ah ruat a ni.

Leader of Opposition in a office luah tan

Aizawl : Mizoram Legislative Assembly-a Leader of Opposition Lalchhandama Ralte, M.L.A chuan December 14, 2023 khan Assembly Secretariat Annexe Building-a a Office a luah lut.

   Leader of Opposition-in Office a luah luh naah hian MLA dang ten an tawiawm a ni.

   The Mizoram Salaries and Allowances of the Leader of Opposition Act, 1999 in a tarlan danin Leader of Opposition hi hlawh leh facilities-ah Cabinet Minister tlukpui a ni.

Aizawl Bawrhsap-in fimkhur turin mipui a ngen

Aizawl : Aizawl District Magistrate Nazuk Kumar, DC Aizawl chuan 14.12.2023 khan mipui ngenna tichhuakin Room Heater leh Christmas cheina Lights fimkhur taka hmang turin mipui a ngen. Theih tawpa fimkhur turin a chah.

SEDP zirtirtute chhawr rih dawn

Aizawl : Chief Minister Lalduhoma'n SEDP zirtirtute chu tun financial year (2023-24) tawp thleng a chhawr zui an nih tur thu December 14 khan house a hrilh.

   SEDP zirtirtu zingah 'unqualified' tam tak erawh an awm tih sawiin, 'Chuti chung chung chuan keini chuan fiancial year zo rawh se kan ti a, an thawk zui ang a, a bak chu kan education minister in tul a tih angin a kalpui turah kan ngai," a ti bawk.

Winter Festival 2023 Cum Mega Exhibition

Aizawl : Mizoram Tourism buatsaih Ni ruk awh tur Winter Festival 2023 Cum Mega Exhibition, AR Ground a neih chu Lalrinpuii, Tourism Minister chuan December 11khan khuallian niin a hawng.

   Nimina tiak ta Winter Festival 2023 Cum Mega Exhibition hawnnaah hian Cheraw, Hlado, Chheih Zai te bakah Zaipawl, Band leh Solo te ngaihthlak a ni a. A hmunah hian Food Court tiamin Stall hrang hrang 100 siam a ni a. Thil chi hrang hrang, Mizo kutchhuak thiamthil hrang hrangte mipuite lei theih tura phochhuah a ni.

Minister ten Office luah lut

Aizawl : December 11, 2023 khan Cabinet Minister leh Minister of State te chuan an office an luah lut vek a, luah luhnaah hunah hian thiantha leh official ten an tawiawm a, Inhlanna hun an hmang hlawm a ni.

Speaker in a Office luah lut

Aizawl : December 12, 2023 khan Lalbiakzama, Mizoram Legislative Assembly Speaker thar chuan a Office a luah lut.

   Speaker Lalbiakzama hi Chalfilh bial atanga MLA a thlan tlin niin a Office luah tan ni hmasa berah hian a thiantha leh chhungkhat laina te'n an telpui a. H. Thansanga, Mizoram Legislative Assembly Speaker hmasa ber hnenah a malsawmna la turin a kal bawk a ni.

   Speaker-in a Office luahluh tanna hi Rev. Lalrinsanga chuan hunserh hmangin Pathian hnenah a hlan a. Speaker hian Press mite a kawm zui nghal bawk a ni.

CM-in CM hmasaber nupui tlawh

Aizawl : December 12, 2023 khan Chief Minister Lalduhoma leh a nupui Liansailovi te chuan Mizoram Chief Minister hmasa ber Ch. Chhunga nupui Rothangi chu a chenna in, Saron vengah an tlawh.

   Lalduhoma te nupa hian duhsakna chibai bukin pangpar an hlan a. Rothangi pawhin sawrkar tluang tak a kaihhruai theih nan duhsakna hlanin a lawmpui thu a lo hrilh a, Bungalow-a an luh hunah la tlawh ve ngei a tum thu a sawi a ni.

Chief Minister Discretionary Grant sem

Aizawl : December 13, 2023 khan Chief Minister Lalduhoma chuan Chief Minister Discretionary Grant, 2023-24 atangin Mizoram chhunga Hospitals, Orphanages, Rescue Centres leh Home hrang hrang sawmkua (90) te hnenah Christman thilpek cheng nuai hnih singli leh sangkhat a pe chhuak.

   Christmas thilpek hi Aizawl district-a, Home, Hospitals, Ophanage, Centre 25, Lunglei district ah 13, Siaha district ah 7, Lawngtlai district ah 6, Champhai district ah 8, Mamit district ah 6, Serchhip district 8 Kolasib district ah 9, Saitual district ah 2, Hnahthial district ah 3 leh Khawzawl district ah 3 te hnenah pek an ni a, heng district Deputy Commissioner te kal tlanga thilpek hi hlan tur a ni.

Council of Ministers meeting

Aizawl : December 13, 2023 khan 9th Mizoram State Legislative Assembly Council of Ministers thutkhawm hmasa ber, Assembly Recess Room ah Chief Minister Lalduhoma kaihhruaiin neih a ni a. Sawrkar hmalakna tur hrang hrang sawmpakua pawm a ni. 

Viksit Bharat@2047: Voice of Youth tlangzarhna Video Conference kaltlangin chhim

Aizawl : Prime Minister Narendra Modi chuan December 11, 2023 khan Video Conferencing kaltlangin ‘Viksit Bharat @2047: Voice of Youth’ a tlangzarh.

   India ram hi Developing Country a ni mek a, Viksit Bharat @2047 hmalakna atangin kum 2047 ah chuan India ram hian Developed Country nih a tum a ni.

   Governor Dr Hari Babu Kambhampati chuan he program hawnna hi Video Conferencing Room, Raj Bhavan atangin a lo chhim a. Virtual Launch Program zawh veleh MZU, ICFAI leh NIT a Vice Chancellor leh Registrar te hmalak dan tur a sawipui nghal a ni.