DOWNLOAD OUR APP

Read latest news on your phone
app-store
The Week that Was on December 3, 2023
Dec 03, 2023

Sairang Jt. MHIP ten Bairabi an tlawh


Aizawl ; November 27, 2023 khan Sairang Joint MHIP te Bairabi ah an kal a, Bairabi south VC leh MHIP Bairabi South hruaituten Bazar Shed Bairabi South Zero point-ah an lo dawng sawng a, Sairang Joint MHIP te hi an president Mathangi hoin hruaitu hrang hrang pakua an kal a, Zero point Bazar Shed-ah hian inkawmhona an nei.

   Sairang Joint MHIP te hian Sairang-ah Rel a luh hnaih dawn tawh avangin lo inven dan turte leh lo in ruahman lawk tul a an hriat avangin Bairabi lam lo inven dante zirchiang tura kal an ni.

   Bairabi South VC leh MHIP hruaitute hian Bairabi lo inven dan leh tun thleng a hmalakna kalpui reng a nih dan tlangpui hrilhin, inven dan leh inruahman dan ah sawi lawk vek theih a nih loh dante sawiin, tawnchawp thil harsatna hrang hrang a awm thu te an sawi.


KTP General Conference 2024 Hla Bu tlangzarh


Aizawl ; KTP General Conference 2024 Hla Bu chu kar kalta Zirtawpni zan khan Synod Conference Centre-ah tlangzarh a ni.

   General Conference 2024 hi Diamond Jubilee a nih angin, Hla Bu ah pawh hla 60 dah a ni a, a hu hova sak nuam tur chi a tam thei ang dah a ni bawk.


A nupui Chemte-in vithlum


Aizawl : November 27, 2023 zan dar 6 vel khan B. Chhingpuii (60), Amòbyuh-Ch (Maubawk-Ch), Siaha District chu a pasal N. Hnemsanga (51) in chemtein a vit hlum.

   An inhnialna atangin a pasal hian an inchhunga a nupui tapchhak-a vawk chaw chhum lai chu a hnung lam atangin a nak ding lamah Chemte-in a vit a, ka pawh chhawn hman loin a boral zui nghal nia sawi a ni.

   N. Hnemsanga hian a nupui a vit zo chiah hi pawnah a tlanchhuak nghal a, an in bulah a vihna chemte hi a paih a. An in atanga hla vak lo a awm Taxi chu hire in Siaha Police-ah inpe turin an kal nghal a ni.


In thiahsak


Aizawl : National Highway-54 laihzauh leh siamthat hna thawh mekah Serchhip District chhunga zangnadawmna la tawh, mahni In la thiat lo te chu November 28, 2023 khan Executive Magistrate te kaihhruaina hnuaiah endik niin, In pakhat thiah sak a ni.

   In thiahna ah hian Serchhip atangin Police thahnem tak kalin kawngpui enkawltu NHIDCL leh Contractor te bakah khawtlang hruaitute an tel bawk a, buaina leh harsatna awm lova hmalak niin District thuneitute chuan zangnadawmna la tawh, mahni In la thiat lo te chungah dan anga hmalak chhunzawm zel a nih dawn thu an sawi a ni.


Vawk vulh dan phung tih danglam tum


Aizawl; AMC hotute leh Aizawl City Local Council Association (ACLCA) hruaitute chuan November 28, 2023 khan AMC Mayor Office Chamber-ah Joint Meeting neiin Aizawl khawpui chhunga vawk vulh chungchanga inkaihhruaina dan an enho.

   June ni 28, 2023 a AMC Board of Councillors meeting in thutlukna a lo siam tawh angin Aizawl khawpui chhung a lo thianghlim a, mipui hrisel zawk nan leh leimin vanga chhiatna thleng a tlem zawk theih nan mihring chenna in atanga feet 100 aia hnaia vawk vulh chu January ni 15, 2024 atangin khuahkhirh a ni dawn a ni.

   Vawkvulh chungchanga harsatna bik neite chuan Local Council atanga recommendation lain AMC-ah exemption dilna thlen theih a ni.


Hmeichhe zinga Aide-De-Camp (ADC) hmasa ber atan ruat


Aizawl : Governor Dr Hari Babu Kambhampati chuan November 29, 2023 khan Indian Armed Forces atanga India rama Woman Aide-De-Camp (ADC) hmasa ber atan Sqn. Leader Manisha Padhi, 2015 batch Indian Air Force Officer chu a ruat.

   Sqn Leader Manisha Padhi hian November 29, 2023 chawhma khan Mizoram Governor Office-ah a hna hi a zawm nghal a. He hna a rawn thawh hma hian Sqn Leader Manisha Padhi hi posting pathum - Air Force Station, Bidar, Air Force Station, Pune leh Air Force Station, Bhatinda-ah te a lo thawk tawh a ni.


Raltlan tan thuam khawn


Aizawl: Aizawl huamchhunga Mizo Hmeichhe Insuihkhawm Pawl (MHIP) branch hrang hrang te chuan November 27 atang khan raltlante puihna tur thuamhnaw leh mutbu an thawhkhawm te chu an headquaters office, Treasury Square-ah an thehkhawm mek.

   Tunah hian MHIP hian Aizawl khawpui chhunga branch 99 an nei mek a, he thu buatsaih lai hian branch 35 velin an pe lut tawh a, dahna lamah harsatna an nei tan tih a buaipuitu lam chuan an sawi. Branch engzatin nge rawn pe lut dawn tih an la hriat loh thu ZALEN an hrilh.


China rama pneumonia hri leng mek chungchang sawiho


Aizawl : November 29, 2023 khan SAD Conference Hall, MINECO-ah Health Department Principal Secretary Esther Lalruatkimi hovin China rama pneumonia hri leng mek chungchang leh he hrileng laka Mizoram a him theihna tura hmalak tul te sawiho a ni.

   Health Department Principal Secretary Esther Lalruatkimi chuan Ministry lam atanga lehkha rawn kalah pawh tun dinhmunah chi-ai na tur a awm loh thu an ziak tih sawiin mipuite chu chi-ai lo turin a chah nghal a. Hmalam hun hriat lawk a nih loh avangin kan phak tawk china lo inbuatsaih hi a pawimawh a ni a ti. COVID hripui len laia inkaihhruaina dan te kha fimkhur thilah zawm tur chin te ngaihtuah a, health sector a thawktute dinhmun leh damdawi, hmanraw neih te lo in hrechiang tura hriattirna dawn a nih thu a sawi.


Martarte zahna chibai buk


Aizawl ; November ni 29 kha Chhattisgarh-a Naxal hel beihna-a 2nd IR sipai 10 te thih champha vawi 16-na a nih angin, Mizoram Police te chuan anmahni zahna chibai an buk.

   Mizoram Police thuchhuaha tarlan a nih danin, Kum 16 kal ta khan an thawhpui mihuaisen tak takte hian Chhattisgarh-a Counter Insurgency Anti- Naxal Operation nei tura dah an nih laiin, mipuite tana remna, himna leh muanna a awm theih nan an nunna hlu tak an hlan a, Martara an thih champha vawi 16-na hi an hrereng a, zahna chibai an buk tih an tarlang a ni.


Nilai leh Beihrual Thupui bu


Aizawl; Mizoram Presbyterian Kohhran chuan nakum 2024 atana Nilai leh Beihrual Thupui zirlaibu tur chu tunkar chho khan tichhuak a, Synod Bookroom Branch Distribution Center-ah te lei theiha chhawp chhuah a ni ta.

   Nilai leh Beihrual Thupui bu hi Mizo lehkhabu malkhaiah Puitling Sunday School zirlaibu tih lovah chuan copy chhut chhuah tam ber a ni a. Copy 70,000 chhut a ni.

India leh Myanmar Border Fencing
India leh Myanmar ramri hung tum chungchang hi eng nge i ngaihdan?
Hung hi tha ka ti lo
Hung se ka ti
Ngaihdan ka nei lo

Latest News & Chhiar Hlawh